3 Quej nopa nielqui pampa amo niquijyohui para amo niquixtocas quema niquitac quenicatza tapijpiyayayaj nopa masehualme cati mohueyimatij huan cati taixpanoj.
4 Itztoque cuali ipan nochi ininemilis, huan amo mococohuaj.
5 Amo quinajsi taohuijcayot yon tequipacholi, quej sequinoc quipiyaj.
6 Yeca quema mohueyimatij, quiitaj para cuajcualtzi quej se costi cati tachijchihuali ica piltetzitzi cati pajpatiyo. Huan quema quichihuaj cati amo cuali, quiitaj quej iniyoyo cati cuajcualtzi.
7 Nopa taixpanoca masehualme ya quijquisa iniixteyol pampa tahuel motomajtoque, huan ya quipixtoque nochi cati iniyolo quinequi.
8 Inijuanti san quihuetzquilíaj Toteco huan quintemajmajtíaj imasehualhua. Mohueyimatij quema camanaltij.
9 Fiero quitaijilhuíaj Toteco Dios cati itztoc ipan ilhuicacti. Huan quintelchihuaj cati itztoque ipan ni taltipacti.
10 Yeca Toteco Dios quinhualicas sempa nochi imasehualhua ipan ni inialtepe, huan quipiyase miyac at nochi inijuanti.
11 Huan quiijtose: “¿Anmoilhuíaj Toteco quimatis taya onca? ¿Anmoilhuíaj Yaya Cati Más Hueyi quichihuilía cuenta cati pano nica?”
12 Xiquitaca, ni masehualme cati amo teno quineltocaj amo teno ininpati. Quipiyaj se cuajcualtzi nemilisti huan talojtzitzi quimiyaquilíaj más inintomi.
13 ¡Amo teno nechpalehuía para nijpiya noyolo tapajpacti, huan san tapic nimocuatotonía para amo nijchihuas tajtacoli!
14 Pampa nochi se tonali nechtatzacuiltíaj huan nechtaijyohuiltíaj sese ijnaloc.
15 Sinta nicamanaltitosquía quej inijuanti, huajca niquincajcayajtosquía nochi momasehualhua.
16 Quema nijnejqui nijmatis para ten itztoque cuali nopa masehualme cati quicualancaitaj Toteco, elqui tahuel ohui para nijmachilis.
17 Pero se tonali nicalajqui ipan motiopa, Toteco Dios, para nimoyolilhuis ten nopa tamanti, huan huajca nijmachili taya quinchiya.
18 Tiquintalijtoc ipan se ojti cati tahuel alaxtic. Quema tiquincuatopehuas, huajca nimantzi huetzise ipan se hueyi ostot huan nopona tzontamise.
19 Quena, ica se talojtzi tamis nochi ininpaquilis. Huan itztose ipan majmajti para nochipa.
20 ¡Nochi ininemilis eltoc quej se temicti! Quena, quej quema se cochtoc huan isatiquisa, Toteco, quej nopa quema timotananas huan tiquinhuejcamajcahuas.
21 Quema niquitac ya ni, nelía tahuel nicualanqui huan hasta nechcocohuayaya noyolo.
22 Pampa niquitac para tahuel nihuihuitic nieltoya. ¡Hasta ninesiyaya moixpa quej se nitapiyali cati amo quipiya italnamiquilis!
23 Pero masque ya ni nopantic, nochipa niitztoc mohuaya ta, Toteco, huan techitzquitoc ipan nomanejmat.
24 Huan nijmati para motamachtil quisenhuiquilis nechyacanas ipan nochi nonemilis. Huan teipa, quema nimiquis, techselis nepa mochaj campa tacuajcualtzi.
