1 NoTeco Dios, xijtachili notequipachol. ¡Xijmanahui nonemilis ten nocualancaitacahua cati quinequij nechmictise!
2 Techtati ten ni amo cuajcualme cati ixtacatzi quisencahuaj para nechchihuilise cati fiero.
3 Nochi inincamanal ajsi ipan noyolo, huan tahuel nechcocohua quej elisquía se cuataminti.
4 Inijuanti amo majmahuij para nechtatzacuiltise. Motatíaj campa amo aqui hueli quinita, huan quinmajcahuilíaj cuataminti masehualme cati amo teno quichijtoque. Yon quentzi amo majmahuij ica cati fiero quichihuaj.
5 Se ica seyoc mofuerzajmacaj para quichihuase más cati fiero. Ixtacatzi mosentilíaj para quitalise taquetzti. Huan quiijtohuaj: “Nica tijtalise ni taquetzti campa amo aqui huelis quiitas.”
6 Ica miyac cuidado quisencahuaj quenicatza quichihuase para temictise. Ica yolic quitemohuaj quenicatza quichihuase cati fiero quisencajtoque quichihuase para ma quisa cuali. Iyolo huan italnamiquilis se masehuali tahuel quimati quisencahuas cati fiero para quichihuas.
7 Pero Toteco Dios yaya iselti quintamicocos. Elis quej quinmajcahuilis cuataminti quema amo quichiyaj, huan nimantzi quintanis.
8 Quena, huetzise huan motzontamiltise, por nopa camanali cati quiijtojtoque. Huan nochi cati quinitase momajmatise.
9 Huajca nochi masehualme quitepanitase Toteco Dios huan quiimacasise quiixpanose. Tepohuilise nochi cati yaya quichijtoc. Huan huajca quimachilise para san ya quichihua huejhueyi tamanti.
