7 Le' wdape chi'o neto' nich bi be gok gongak cheto' benne' ka' bi ẕḻé'egekle' neto' chawe'. Beno' ga bedoé'egekle benne' ka' ẕžá'agake' neto'.
8 Ni'a chio' Le', Dios, sóatezto' ḻo yeḻa' ba nez, na' to chi'ize wx̱én ḻáže'to' Le',
9 san wléj yichjo' neto', na' beno' ga žedoe'elto', na' bi žéjḻeno' benne' cheto' ka', benne' žjake' ḻo wdiḻe.
10 Beno' ga bẕonnjto' ḻawgak benne' ka' ẕdíḻ-ḻengake' neto', na' benne' ka' ẕží'igake' cheto' beká'agake' yógo'te da' wdapto'.
11 Bdio' neto' ka ẕila' ka' ḻo na'gak benne' ka' žótgake' neto', na' besḻaso' neto' ladjw benne' zi'to' ka'.
12 Bdezo' neto', benne' chio' ka', ḻo ná'gake', na' bi be bezi'o.
13 Beno' ga benne' yež gawze ka' ẕnnégake' cheto'. Benne' zej nyechjle' neto' ẕká'ngake' neto' ka'ze, na' žẕížegake' cheto'.
14 Bzo' neto' ka to da' ẕnnagak benne' wláž cheto' ka' naken to da' nyáche'ḻe'e. Kate' ẕḻé'egekle benne' ka' neto', ẕta yíchjgake', na' žebángekle' ka žak nyache' ḻáže'to'.
15 Tža tža žedoé'etezla', na' žé'teza' ḻo da' zedḻe'e.
16 Ẕnnégake' chia', na' ẕzóagake' neda' cheḻa'ale. Benne' ka' bi ẕḻé'egekle' neda' chawe' ẕži'igake' chia', na' žóngake' neda' ẕia.
17 Yógo'te da' ki žákgaken cheto', san bi na' gaḻ ḻáže'to' Le'. Bi na' wzoato' cheḻa'ale x̱tižo'o dan' bénḻeno' neto'.
18 Bi na' wsán ḻáže'to' Le', na' bi na' wzoato' cheḻa'ale da' bchi'lo' neto'.
19 ¿Biẕ chen' bzo' neto' cheḻa'ale lo latj chegak bia snia ka', na' bzo' neto' gan za' gatto'?
20 Chela' goḻ ḻáže'to' Dios cheto', o chela' bka'n ẕento' lo'a ka',
21 ¿bi žaḻa' ža'a Dios neto' ni'a che da' ki? Ḻe' nnézkzele' da' yo'o ḻo yichj ḻáẕdo'gak benne' ka'.
22 Dan' nakto' chio', tža tža zóagake' gótgake' neto'. Béngake' neto' ka ẕila' za' gótgake'-ba'.
23 ¡Bebán, X̱anto' Dios! ¿Biẕ chen' ẕtaso'? ¡Bebán! ¡Bi so' zi'to' to chi'ize!
24 ¿Biẕ chen' bkache' kwino', na' bi žákbe'elo' kan ẕzáka'ḻe'eto', na' kan ẕkóngekle benne' ka' neto' žin?
25 Ba nat ni'a na' be' da' nakkzto', dan' bzéx̱jwgake' neto', na' žx̱óbgake' neto' ḻo yo.
26 ¡Wzó ža'! ¡Gokḻen neto'! ¡Ḻo yeḻa' žeyache' ḻaže' chio', beslá neto'!
