3 Ximotemachi ipan TOTECO huan xijchihua catli cuali. Quen nopa tipajcaitztos ipan motlal huan amo tleno mitzpolos.
4 Ximohuampoxchihua ihuaya TOTECO, huan yaya mitzmacas catli moyolo quinequi.
5 Xijcahuili TOTECO ma mitznextili campa tinemis. Ximotemachi ipan ya, huan yaya quichihuas.
6 Quipannextis catli xitlahuac tijchihua. Quena, quichihuas para nochi ma quiitaca motlalnamiquilis quen nochi quiitaj quema tlahuía tonati ipan tlajcotona.
7 Xijpiya moyolo quema tiitztoc iixpa TOTECO. Amo ximolini. Xijchiya para yaya quichihuas catli monequi. Amo xicualani ininhuaya catli quipiyaj nochi catli quinequij ama. Amo xiquinchihuili cuenta inijuanti catli quichijtinemij sesen tlamantli catli fiero quisencajtoque.
8 Amo ximocualancamaca. Xijtlalcahui cualantli, pampa cualantli noja más hueyi mochihuas huan mitzcocos.
9 TOTECO quintzontlamiltis catli mosisiníaj, pero catli motemachíaj ipan ya quintiochihuas huan moaxcatise nopa tlali.
10 Ayacmo huejcahuas noja itztose amo cuajcualme, teipa masque titlachiyas campa itztoyaj, amo quema sempa tiquinpantis.
11 Pero masehualme catli moicnonequij iixpa Toteco itztose ipan nopa cuali tlali huan tlahuel paquise, pampa yaya quintiochihuas hasta mocahuas.
12 Masehualme catli quicualancaitaj Toteco mosenilhuijtoque tlaque fiero tlamantli huelis quinchihuilise inijuanti catli xitlahuac nemij. Quintlachilíaj ica cualantli huan motlanhuehuechotzaj iniixpa.
13 Pero Toteco quinhuetzquilía nopa masehualme, pampa quimati para monechcahuía nopa hora quema quintzontlamiltis.
14 Masehualme catli quicualancaitaj Toteco quicopinaj ininmachete para quintlahuisolise catli teicneltzitzi. Quihuitolohuaj inincuahuitol huan quinmelactlachilíaj catli moicnonequij iixpa Toteco. Quena, quinchiyaj para quinmictise catli xitlahuac monejnemiltíaj.
15 Pero catli inijuanti ininmachete calaquis ipan ininyolo, huan inincuahuitolhua pojpostequis huan cuechtic elis.
16 Más cuali nopa quentzi catli quipiya se cuali masehuali huan amo quen imiyaca nochi tlamantli pajpatiyo catli quipiyaj tlajtlacolchihuani.
17 Pampa TOTECO quinquixtilis ininchicahualis catli amo itztoque tlapajpacme iixpa, pero quinfuerzajmacas catli monejnemiltíaj cuali iixpa.
18 Mojmostla TOTECO quitlachilía catli quichihuaj masehualme catli itztoque xitlahuaque iixpa, huan nopa tlali catli quinmacas para iniaxca huejcahuas para nochipa.
19 Quema ajsis tonali catli amo cuali, quinmocuitlahuis para amo más tlaijiyohuise. Quema oncas mayantli, quinmacas catli quicuase hasta mocahuas.
20 Pero amo cuajcualme miquise. Quena, quen huaquij nopa yejyectzitzi xochime sacapetlapani huan ayacmo nesi ininyejca, nojquiya polihuise icualancaitacahua TOTECO. Quena, polihuise quen poctli catli quisa huan ayacmo nesi.
21 Se masehuali catli amo cuali iyolo motlanehui se tlamantli huan ayacmo quicuepa. Pero masehualme catli cuajcualme quipiyaj hueyi ininyolo huan temacaj hasta mocahua.
22 Catli TOTECO quintiochihua quiselise nopa tlali catli yaya quinmacas, pero catli TOTECO quintelchihua quintzontlamiltis.
23 TOTECO quichihua ma eli temachtli sesen paso ipan inemilis se cuali masehuali, huan nopa masehuali paqui miyac pampa nemi cuali.
24 Masque huetzis nopa cuali masehuali, amo mocahuas nepa huetztoc, pampa TOTECO quitlananas ica imax.
25 Na nojquiya nitelpocatixtoya huan ama ya nihuehuentzi, pero amo quema niquitac TOTECO quitlahuelcahua se masehuali catli itztoc xitlahuac iixpa. Niyon iconehua se cuali masehuali amo niquinitztoc sintla motlaejehuíaj para ica panose.
26 Mojmostla se cuali masehuali quintlasojtla sequinoc huan quintlanejtía catli monequi. Iconehua se cuali tlacatl tepalehuíaj.
27 Huajca sintla tijnequi tiitztos para nochipa, xijtlalcahui tlajtlacoli huan xijchihua san catli cuali.
28 Pampa TOTECO quipactía catli xitlahuac huan amo quema quinhuejcamajcahuas iaxcahua catli itztoque temachme. ¡Amo! Techmocuitlahuis para nochipa. Pero quintzontlamiltis nochi masehualme catli amo cuajcualme, huan amo quincahuilis niyon se iniixhui.
29 Masehualme catli itztoque xitlahuaque iixpa TOTECO moaxcatise nopa tlali catli yaya quinmacas, huan nepa itztose para nochipa.
30 Se masehuali catli itztoc cuali iixpa Toteco camanalti ica tlalnamiquilistli huan quiijtohua catli xitlahuac.
31 Quipiya Icamanal Toteco Dios ipan iyolo, huan yeca amo huetzis ipan tlajtlacoli.
32 Masehualme catli quicualancaitaj Toteco Dios quintlachilíaj masehualme catli monejnemiltíaj xitlahuac. Quitemohuaj quenicatza huelis quintelhuise para ma quinmictica.
33 Pero TOTECO amo quincahuas para cuali masehualme ma mocahuaca ininmaco inincualancaitacahua. Quema ajsise iixpa se juez, amo quincahuas ma quintlatzacuiltica catli cuajcualme ica se tlamantli catli amo quichijtoque.
34 Ximotemachi ipan TOTECO huan xijchihua catli yaya quinequi, pampa yaya mitzhuejcapantlalis huan mitzmacas nopa tlali. Huan tiquitas quen quintzontlamiltis catli quinpactía tlajtlacolchihuase.
35 Pampa na niquinitztoc masehualme catli quicualancaitaj Toteco, inijuanti mohueyimatij huan temajmatíaj. Pampa quipiyaj chicahualistli quen se cuahuitl hueyi huan xajcaltic.
