19 Dule-inniki-nanadimaladga ibagan-bulegan-noni-sogele, akar-guosulid. Ukud-dummad nagunonikile, mas-nika guoed.
20 Dule-isganamardi, bergudmaloed. Bab-Jehová-isdarmaladdi, gagan-burgweyobi burgwidmarmogoed. Waayob bergudmaloed.
21 Dule-isganamar aimargi mani-gasale, bar bennukdasulid. Dule-nueddi dule-wiledakedba aimarga ibmar ukdedaed.
22 Dulemar Bab-Jehováʼse-nabir-binsalesmaladi, neg-nued egadga guoed. Dulemar Bab-Jehováʼse-ukabsalesmaladdi, girgumaloed.
23 Dule-wargwen e-daedgi Bab-Jehová-yeer-ito imakele, Bab-Dummad we-dule-nued-nanadii imaked.
24 Dule-nued gwatirnoni-sogele, deyob degisadegu gudii guosulid, ar Bab-Jehová we-dule-bendakoed.
25 An sapingwa-danikid-akale, an seredgusadse, an dakdisulid, dule-nuedi nue-dummad-wiledii, e-mimmigan mas-egisdii an dakdisulid.
26 Dule-nuedi aimarga ibmar-ukalile, nuedgi yeer-itogedba ukdedaed. E-mimmigan ega ibnuedga gued.
27 Ibmar-isganagi be bangu, ibmar-nueganbi be imakdii gue. Ar deyob be imakele, Bab-Dummad bega-yar-ukoye-sogsadgi degisadegu be gudii guoed.
