7 Ẕenḻe'e nak yeḻa' žeyache' ḻaže' chio', Dios. Che ḻen žx̱en ḻáže'gak benne' ka' Le' ka žongak bríse'do' ka' ẕkache' kwíngakba' ẕan x̱il ẕkoko'.
8 Yéljgekle' ḻen da' deḻe'e ližo' na' Le' wye'jo' ḻégake' da' naken ka to yegw da' yožen nis dẕi'.
9 Gan zo' Le' zoa gan žaḻ nis dan' žonnen yeḻa' nban. Ḻo yeḻa' baní' chio' ẕḻe'elto' da' nak baní'.
10 Beyache' ḻaže'l benne' ka' zej nónbi'e Le', na' bzoa chegak benne' ḻi ḻaže' ka' da' nak chawe'.
11 Bi go'o latje benne' ẕka'n ẕen kwine' tíḻ-ḻene' neda', na' bi wchíx̱ benne' wen da' ẕinnj neda'.
12 Chejchégwgak benne' ka' žóngake' da' ẕinnj. Le' beno' ga bejchégwgak benne' ka', na' bi gak yeyásgake'.
