3 Bex̱w ya ntoche' tonn che wdiḻe nich wsejo' x̱nezgak benne' ka' ẕbia ḻáže'gake' neda'. Bḻoe'el neda' nako' Benne' Weslá chia'.
4 Ben ga yedoé'egekle, na' chíx̱gekle benne' ka' žénegekle' gótgake' neda'. Ben ga wẕonnjgak, na' yedoé'egekle benne' ka' žénegekle' góngake' neda' ẕia.
5 Ben ga gákgake' ka to laga' biž da' žwa' be', na' bseḻa' wbás la'y chio' nich wlage' ḻégake'.
6 Ben choḻ x̱nézgake' nich kwílgake', na' bseḻa' wbás la'y chion' nich kwia ḻaže'e ḻégake'.
7 Bkáche'gake' to do yeḻj nich senen neda', na' bi be bena' chégake'. Bché'ngake' to yežw gan chejbix̱a' neda', na' bi be da' ẕia nbaga'a.
8 Bseḻa' da' wžía yin' ḻégake', da' bi gákbe'egeklen'. Ben ga sen do yeḻj chégaken' ḻa' légakkze', na' ga chejchégwgake' gan kwia yí'gake'.
9 Naž yebéḻe'ekzla' ni'a che da' ben X̱anžo Dios. Gak yeḻa' ba nez ẕen chia' dan' beslé' neda'.
10 Yógo'te žit yoa'a nnágaken: “X̱anto' Dios, ¿noẕkze benne' nake' ẕen ka nako' Le'? Žesló' benne' yache' ḻo na' benne' nakže' waḻe ka ḻe', na' benne' žiážjele' ḻo na' benne' ẕbane' da' do' da' den chie'.”
11 Bḻa'gak benne' ka' žechébegake' da' wen ḻaže'. Wnnábgekle' neda' ka nak che to da' bi nnezla'.
12 Bebí'igake' chia' da' ẕinnj ni'a che to da' chawe' da' bena' neda', nich wsáka'gake' neda',
13 san neda', kate' bi wnníta'gake' chawe', gok nyache' ḻaža'a, na' bena' wbás, na' bsaka' kwina'. Dot ḻaža'a bḻiža' Le', Dios, nich yeyono' ḻégake'.
14 Gok nyache' ḻaža'a ni'a chegak benne' ka' kan žona' ni'a che bi' lježa', o ni'a che bi' bíche'kza'. Gok nyache' ḻaža'a ka žon no benne' ni'a che x̱ne'e kate' ne žate',
15 san bebégekle benne' ka' kate' wzóa da' bsakan' neda', na' bedjwíagake' neda'. Bdíḻ-ḻengak benne' wen da' ẕinnj ka' neda', na' choḻze bzétjgake' neda'. Bwíatezegake' neda', na' bi bsángake' da' žóngake'.
16 Bsáka'gake' neda', na' ben dítjgekle' neda', na' wžía ḻáže'gake' neda' ḻo yeḻa' ẕža'a chégake'.
17 X̱ana' Dios, ¿to chi'ize wíazo' da' žóngake'? Beslá neda' ḻo na'gak benne' ka' ẕžia yí'gake' neda', benne' ka' zej nake' ka bež yix̱e' ka'.
18 Yapa' Le' “Žóx̱keno'” gan zej ndobe benne' chio' ka'. Wká'n ẕénteza' Le' ladjw benne' zan ka'.
19 Bi go'o latje yebégekle benne' ka' bi ẕḻé'egekle' neda' chawe', na' bi be bena' chégake'. Bi go'o latje benne' ka' gon dítjgekle neda', benne' ka' ẕžá'agake' neda', na' bi be ẕia nbaga'a.
20 Benne' ki bi žénegekle' sóagake' ḻo yeḻa' ẕga'n chawe', na' ḻo yeḻa' wen ḻaže' chégake' ẕnnégake' chegak benne' ka' ẕbézgake' ži ḻaže' ḻo yežlyó nga.
21 Ben dítjgekle' neda', na' wnnágake': “Ba bḻe'elto' da' bene'.”
22 X̱ana' Dios, bḻe'ekzlo' da' žóngake'. Bi so' žize. X̱ana' Dios, bi kwej yichjo' neda'.
23 Wzó ža'. Wzóa wchi'a ḻažo'o neda'. Da, X̱ana' Dios, nich gákḻeno' neda'.
