12 Paquij tlacame ipan nopa tlali tlen motemachíaj ipan TOTECO. Quena, nelía paquij nopa tlacame tlen TOTECO quintlapejpenijtoc para iaxcahua.
13 TOTECO tlen itztoc nepa elhuicac techhualtlachilijtoc nochi titlacame.
14 Hasta nepa ipan elhuicac TOTECO techtlachilijtoc tlen tiitztoque ipan ni tlaltepactli.
15 Yajaya TOTECO tlen techyolchijchijqui nochi titlaltepac ehuani huan techtlachilía nochi tlen tijchijtinemij.
16 Se hueyi tlanahuatijquetl ax tlatlani pampa quinpiya miyac isoldados. Niyon se soldado tlen motemaca ax tlatlani pampa quipiya miyac fuerza.
17 Amo ximotemachi ipan se cahuayo para mitzmanahuis yonque nelía tetic. San ica ifuerza ax hueli temanahuía.
18 Pero TOTECO, quena, yajaya nochipa techtlachilijtoc tojuanti tlen tiquimacasij tiquixpanose. Techmocuitlahuía tlen timochiyaj ipan iteicnelilis.
19 Techmanahuía quema tiitztoque nechca miquistli. Huan techtlamacas quema oncas mayantli para noja ma tiitztoca.
20 Tojuanti ipan toyoltzi timotemachíaj ipan TOTECO. Yajaya techpalehuía huan techmanahuía ica tlen ax cuali.
21 Yeca ma tiyolpaquica ipan TOTECO, pampa timoneltemachijtoque ipan yajaya tlen nelía tlatzejtzeloltic.
