1 ¡NoTeco Dios! ¡NoTeco Dios! ¿Para tlen tinechtlahuelcajtoc? ¿Para tlen timohuejcachijtoc huan ax tihualajtoc para tinechmanahuiqui? Ax tijtlacaquilía quema nimitztzajtzilía.
2 NoTeco, tonali huan yohuali ax nimosiyajcahua nimitznotza, pero ax tinechnanquilía.
3 Huan yonque queja nopa eltoc, ta quejipa titlatzejtzeloltic. Nochi tohuejcapan tatahua tiisraelitame mitzyahualojque huan mitzhueyichijque.
4 Totatahua mochixque ipan ta. Quena, motemachijque mopan ta huan ta tiquinmanahui.
5 Mitznojnotzque quema tlaijiyohuiyayaj huan tiquinmaquixti. Mopan ta motemachijque huan ax tiquinpinahualti.
6 Pero na nimomati queja se pilocuiltzi huan ax queja se tlacatl. Sequin san nechhuetzquilíaj huan sequinoc nechcocolíaj.
7 Nochi tlen nechitaj san noca paquij, huan tlancuitzihuij huan mocuahuihuixohua,
8 huan quiijtohuaj: “Yajaya tlen motemachía ipan TOTECO, huajca ma tiquitaca intla quimaquixtis. Intla nelía quiicnelía, ma quimanahuiqui.” Queja nopa quiijtohuaj tlacame.
9 Pero TOTECO, na nijmati para tinechpalehuijtoc. Tinechquixti iijtico nonana. Tinechmocuitlahuijtoc hasta tlen quema noja nichichiyaya.
