8 Cha' kwena' sibe ẕan ya'abá, zoakzo' Le' ga na'. Cha' yetja' ḻo da' gže' che yežlyó, zo' Le' ga na'.
9 Chela' sáke'la' tia' ḻo be', na' cha'a zi'to' gan ẕḻa' wbíž, o tia' yecheḻa'ale nisdo' gan žen wbíž,
10 ḻezka' sóaḻeno' neda' ga na', na' no'o ḻi ža gon chochen neda'.
11 Chela' gak gona' ga wkache' da' choḻ neda', o gona' ga yeyák choḻ baní' da' nyechjlen neda',
12 da' choḻ na' bi gak wkachen' neda' ḻawo' Le', na' yel yeyaken ka te ža ḻawo' Le'. Lébeze ka zej nak da' choḻ, na' yeḻa' baní' ḻawo' Le'.
