12 Quena, quinquixti ica ihueyi chicahualis huan ica inejmat quinpalehui, pampa itaicnelijcayo amo quema tami.
13 Xijtascamatica yaya cati quixelo nopa Hueyi At Chichiltic para ma panoca imasehualhua, pampa itaicnelijcayo amo quema tami.
14 Huan quinpanolti nopa israelitame ipan tali huactoc tatajco nopa hueyi at, pampa itaicnelijcayo amo quema tami.
15 Pero quinatzonpolihuilti Faraón huan isoldados ipan nopa hueyi at, pampa itaicnelijcayo amo quema tami.
16 Xijtascamatica Toteco cati quinyacanqui imasehualhua ipan nopa huactoc tali, pampa itaicnelijcayo amo quema tami.
17 Xijtascamatica yaya cati quinmanahui imasehualhua inimaco tanahuatiani cati quipixque miyac chicahualisti, pampa itaicnelijcayo amo quema tami.
18 Yaya quintzontamilti huejhueyi tanahuatiani cati tahuel quipiyayayaj chicahualisti, pampa itaicnelijcayo amo quema tami.
19 Quitzontamilti Sehón, inintanahuatijca nopa amorreos, pampa itaicnelijcayo amo quema tami.
20 Nojquiya quimicti Og, tanahuatijquet ten tali Basán, pampa itaicnelijcayo amo quema tami.
21 Huan inintal nopa tanahuatiani, Toteco quinmacac imasehualhua quej se tamanti cati inintata quincahuilijtejqui, pampa itaicnelijcayo amo quema tami.
22 Quena, quimacac itequipanojca Israel para ma moaxcati nopa tali para nochipa, pampa itaicnelijcayo amo quema tami.
23 Yaya cati techelnamijqui tiisraelitame quema ayecmo tijpiyayayaj chicahualisti, pampa itaicnelijcayo amo quema tami.
24 Yaya techmanahui inimaco tocualancaitacahua, pampa itaicnelijcayo amo quema tami.
25 Yaya quinmaca tacualisti nochi tamanti cati yoltoque, pampa itaicnelijcayo amo quema tami.
