54 Cay pachachöga gorpallami tiyä. Layniquicuna alli cashantami willacushaj.
55 Tayta Dios, chacaycunapis gamtami yarpä. Yachachishayquicunatami cumliyta munä.
56 Willapämashayquicunataga wiyacuycämi.
57 Tayta Dios, gamllamanmi yäracaycämö. Palabrayqui imanöpis nishanta cumlinäpämi aunishcä.
58 Llapan shongöpami gam munashayquino goyashcä. Aunimashayquino alli ricamay ari.
59 Imanöpis cawashätami yarpachacushcä. Chaymi estatutuyqui nishancunatana wiyacushaj.
60 Jucllami cumlishcä mandamintuyquicunataga.
61 Fiyucunaga tucuy-jinanpami achäquita ashipämasha. Chaypis manami gongashcächu yachachicuyniquitaga.
62 Pullan pagas jatarcurmi gamtaga mañacö alli jusgacoj cashayquipita.
63 Nogaga allimi ricanacö gamta rispitashojcunawan, willapashayquita cumlejcunawan.
64 Tayta Dios, cay pachachöga llapantami cuyanqui. Layniquicunatapis masta yachaycachimay ari.
65 Tayta Dios, palabrayquicho niycashannömi nogataga alli ricamashcanqui.
66 Alli fisyuyoj, yarpaysapa canäpaj yarpayta goycamay. Nogaga yäracö mandamintuyquicunamanmi.
67 Manaraj mandamintuyquicunata wiyacushäcamaga achcatami llutancunata rurarä. Cananmi ichanga palabrayquicho nishannöna cumliycä.
68 Gamga allimi canqui. Allitami ruranqui. Layniquicunata yachaycachimay.
69 Mana rispitashojcunaga mana cajtami jitapäman. Chaypis nogaga llapan shongöpami willapämashayquicunata cumlë.
70 Mana rispitashojcunaga llutallantami yarpanpis. Nogami ichanga cushicö yachachicuyniqui nishanta cumlir.
71 Nogapäga allimi casha pengayman churamashan. Chaynöparämi layniquicunata yachacushcä.
72 Nogapäga waranganpa guellaypitapis goripitapis mas allimi gam yachachimashayquega.
73 Quiquiquimi ruramashpayqui formacächimarayqui. Yarpayta goycamay ari mandamintuyquicunata yachacunäpaj.
74 Gamta rispitashojcunaga ricamashpan cushicongami. Nogaga palabrayqui niycashanmanmi yäracö.
75 Tayta Dios, nogaga musyämi llapanpita alli jusgaj cashayquita. Quiquë imatapis rurashäpitami ñacachimanquipis.
76 Cuyacoj cayniqui nogataga cushicachimächun aunimashayquino.
77 Cuyapäcoj cashayquita musyachimänayquipaj cawachimay. Nogaga yachachicuyniquita cumlirmi cushicö.
78 Mana rispitacojcunaga pengaycho cachun. Paycunaga jitapämallarmi ñacaycächiman. Nogami ichanga willapämashayquicunallata yarparäcushaj.
79 Gamta rispitashojcunaga, estatutuyquita cumlejcunaga nogawan shuntacächun.
80 Gampa layniqui niycashallanman shongöpis yarpächun. Chaynöpami imapitapis mana pengacushächu.
81 Salbamänayquitami pasaypa shuyaraycä. Palabrayquimanmi yäracuycä.
82 Gam aunimashayquita ricchacuycaptillämi ñawëpis chulluycan. Chaymi «¿imayraj shamunqui shacyächimänayquipaj?» në.
83 Llapan gongashana auquinna cashpäpis, gampa layniquicunataga manami gongärächu.
84 ¿Imaycamaraj awantashaj? ¿Imayraj jusganqui gaticachämajcunataga?
85 Mana rispitashojcunami y yachachicuyniquitapis mana wiyacoj runacunami mana alliman chayanäta munaycan.
86 Yanapaycamay ari. Imatapis mana rimapaycaptëmi gaticacharcaycäman. Gampa mandamintuyquega llapanpis rasun cajllami.
87 Ichicllapami pishisha wañunäpis. Chayno caycarpis manami gongaycushcächu willapämashayquicunata cumliytaga.
88 Cuyacoj cashayquimanno masta cawachimay ari. Chaura estatutuyquicunatapis cumlishämi.
89 Tayta Dios, palabrayquega mana gongacajmi. Syëluno mana ushacajmi caycan.
90 Aunishayquitaga imaycamapis cumlinquimi. Gammi tacyachishcanqui cay pachata. Chaymi mana cuyucunchu.
91 Ima-aycapis gam nishayquinöllami caycan. Chaycunaga llapanpis gampa munaynillayquichömi caycan.
92 Yachachicuyniqui mana cushicachimaptenga llaquicuycällarmi wañöman caran.
93 Manami imaypis gongashäpächu willapämashayquicunataga. Chaycunami cawaycächiman.
94 Salbaycamay ari. Nogaga gampami cä. Willapämashayquicunataga cumliycämi.
95 Fiyucunaga shuyarpaycäman imay örapis wañuchimänallanpämi. Nogami ichanga estatutuyquicuna nishallanta cumliycä.
96 Nogaga llapantapis ricashcä ushacajllatami. Mandamintuyquicunami ichanga imaypis mana ushacanchu.
97 Nogapäga fiyupa allimi yachachicuyniquicuna. Imay örapis chaytaga yarparaycämi.
98 Mandamintuyquicunataga imaypis yarparaycämi. Chaycunami nogataga chiquimajcunapitapis mas yachaj cayman churamasha.
99 Yachachimajcunapitapis masmi tantiyä. Chaynöga tantiyä estatutuyquicunata yarpararmi.
100 Yachajcunapitapis masmi tantiyä. Chaynöga caycä willapämashayquicunata yarpararmi.
101 Mana alli ruraycunataga manami ruränachu palabrayquita wiyacunäpaj.
102 Alli arriglar jusgashayquicunataga manami gongashcächu. Chaynöga caycä gam yachachimaptiquimi.
103 Shimëchöga mil-abëjapa mishquinpitapis masmi mishquëman palabrayquega.
104 Willapämashayquicunata wiyacurmi yarpaysapayashcä. Chaymi fiyupa chiquë llutan ruraycunataga.
105 Palabrayquega juc achquinömi. Purinäpaj caminupa achquipämajnömi caycan.
106 Cumlinäpaj jurashätaga cumlishämi: Allita ruranäpaj nimashayquitaga simri cumlishämi.
107 Tayta Dios, fiyupami llaquicuycä. Palabrayqui nishanno cawachimay ari.
108 Gamta mañacamushäta aunimay Tayta Dios. Alli arriglar jusgashayquita musyaycachimay ari.
109 Wañuchimaytami munarcaycan. Chaypis yachachimashayquitaga manami gongächu.
110 Fiyucuna mana alliman chayachimayta munaptinpis willapämashayquitami nogaga wiyacö.
111 Estatutuyquitami erensyatano chasquicushcä. Chaymi nogataga cushicachiman.
112 Layniquicunata llapan shongöpa yachacuytami munä. Imaycamapis wiyacuytami munä.
113 Ishcay cära runacunataga manami ricaytapis munallächu. Yachachicuyniquitami ichanga cuyä.
114 Gammi canqui washämaj, chapämaj. Gampa palabrayquimanmi yäracö.
115 ¡Mana allita rurajcuna ñaupäpita witicuy! Nogaga Diosnëpa mandamintuntami cumlishaj.
116 Aunimashayquino yanapämay. Chauraga masta cawashämi. Gamman yäracaycämuptëga ama mana alliman chayachimaychu.
117 Salbaycamay ari. Chauraga cawashärämi. Layniquitapis cumlishämi.
118 Layniquita cachaycojtaga gam disprisyanquimi. Chaura chay runacunaga quiquillanmi llutanman chayan.
119 Cay pachacho caj fiyucunataga ganratanömi ricanqui. Chaymi nogaga estatutuyquicunata fiyupa cuyä.
120 Gamta manchacur nogaga sicsicyaycä. Imanöpis jusganayquipaj cashayquipitami fiyupa llaquicö.
121 Imaypis allillatami rurashcä. Ñacachimajcunapa maquinmanga ama cachaycamaychu.
122 Noga allilla goyänäpaj yanapaycamay ari. Fiyucunaga ama ñacachimächunchu ari.
123 Ñawëpis chulluycan salbamänayquipaj ricchacur shuyaraycaptillämi, aunimashayquita cumlimänayquipaj shuyaraycaptillämi.
124 Yanapaycamay ari cuyacoj cashayquimanno. Layniquicunata yachachimay.
125 Nogaga sirbishojniquimi cä. Tantiyaycachimay. Nogaga estatutuyquicunata yachacuytami munä.
