33 Tayta Dios, yachachimay layniquicunata imano cumlinäpäpis. Wañunäcamami cumliyta munä.
34 Tantiyachimay yachachimashayquicunata mana gonganäpaj. Llapan shongöpami wiyacuyta munä.
35 Mandamintuyqui nishanno cumlinäpaj yarpayta gomay. Chaycunata cumlirmi cushishalla goyäshaj.
36 Estatutuyqui nishallanta ruranäpaj yarpächimay. Ama camacächiychu suwacullar rïcuyänäpäga.
37 Ama cachamaychu manacajcunallaman ricaränätaga. Cawachimay ari gam munashayquino caminullayquipa purinäpaj.
38 Sirbishojcunataga allilla goyächinayquipämi aunirayqui. Nogatapis allilla goyächimänayquipaj aunimay ari.
39 Ama camacächiychu manchacushä pengayman chayanätaga. Gam jusgashayquicunaga llapanpis allimi.
40 Nogaga mandamintuyquicunata sumaj yachacuytami munä. Cawachimayraj ari. Gamga alli juezmi canqui.
41 Tayta Dios aunimashayquino musyachimay cuyacoj, salbacoj cashayquita.
42 Chaynöpami achäquita ashipämajcunataga cutichishaj. Gampa palabrayquimanmi yäracö.
43 Ama gongaycachimaychu rasun cajta parlanäpaj caycajtaga. Gam jusganayquipaj cajllamanmi nogaga yarparaycä.
44 Imaycamapis yachachimashayquicunallatami cumliyta munaycä.
45 Chayrämi goyäshaj mana yarpachacuypa. Nogaga willapämashayquicunatami cumlishcä.
46 Estatutuyquicuna imano niycashantapis raycunapa ñaupanchömi willacushaj. Mana pengacuypami willacushaj.
47 Nogaga mandamintuyquicunata cushicurmi cumlë. Chaycunata cumlirmi fiyupa cushicö.
48 Nogaga cushishami mandamintuyquitapis chasquicö. Layniquicunatapis manami gongächu.
49 Nogata nimashayquicunataga yarpaycuy. Nogaga palabrayquimanmi yäracuycä.
50 Llaquicuycho caycashä örapis aunimashayquimi cushicachiman.
51 Mana rispitacojcunami mana jamaypa achäquita ashipaycäman. Nogami ichanga yachachimashayquicunata mana gongächu.
52 Ñaupata jusgashayquicunatami yarpaycä. Chaycunami shacyächiman.
53 Yachachicuyniquita cachaycoj fiyu runacunaga fiyupami rabyachiman.
54 Cay pachachöga gorpallami tiyä. Layniquicuna alli cashantami willacushaj.
55 Tayta Dios, chacaycunapis gamtami yarpä. Yachachishayquicunatami cumliyta munä.
56 Willapämashayquicunataga wiyacuycämi.
57 Tayta Dios, gamllamanmi yäracaycämö. Palabrayqui imanöpis nishanta cumlinäpämi aunishcä.
58 Llapan shongöpami gam munashayquino goyashcä. Aunimashayquino alli ricamay ari.
59 Imanöpis cawashätami yarpachacushcä. Chaymi estatutuyqui nishancunatana wiyacushaj.
60 Jucllami cumlishcä mandamintuyquicunataga.
61 Fiyucunaga tucuy-jinanpami achäquita ashipämasha. Chaypis manami gongashcächu yachachicuyniquitaga.
62 Pullan pagas jatarcurmi gamtaga mañacö alli jusgacoj cashayquipita.
63 Nogaga allimi ricanacö gamta rispitashojcunawan, willapashayquita cumlejcunawan.
64 Tayta Dios, cay pachachöga llapantami cuyanqui. Layniquicunatapis masta yachaycachimay ari.
65 Tayta Dios, palabrayquicho niycashannömi nogataga alli ricamashcanqui.
66 Alli fisyuyoj, yarpaysapa canäpaj yarpayta goycamay. Nogaga yäracö mandamintuyquicunamanmi.
67 Manaraj mandamintuyquicunata wiyacushäcamaga achcatami llutancunata rurarä. Cananmi ichanga palabrayquicho nishannöna cumliycä.
68 Gamga allimi canqui. Allitami ruranqui. Layniquicunata yachaycachimay.
69 Mana rispitashojcunaga mana cajtami jitapäman. Chaypis nogaga llapan shongöpami willapämashayquicunata cumlë.
70 Mana rispitashojcunaga llutallantami yarpanpis. Nogami ichanga cushicö yachachicuyniqui nishanta cumlir.
71 Nogapäga allimi casha pengayman churamashan. Chaynöparämi layniquicunata yachacushcä.
72 Nogapäga waranganpa guellaypitapis goripitapis mas allimi gam yachachimashayquega.
73 Quiquiquimi ruramashpayqui formacächimarayqui. Yarpayta goycamay ari mandamintuyquicunata yachacunäpaj.
74 Gamta rispitashojcunaga ricamashpan cushicongami. Nogaga palabrayqui niycashanmanmi yäracö.
75 Tayta Dios, nogaga musyämi llapanpita alli jusgaj cashayquita. Quiquë imatapis rurashäpitami ñacachimanquipis.
76 Cuyacoj cayniqui nogataga cushicachimächun aunimashayquino.
77 Cuyapäcoj cashayquita musyachimänayquipaj cawachimay. Nogaga yachachicuyniquita cumlirmi cushicö.
78 Mana rispitacojcunaga pengaycho cachun. Paycunaga jitapämallarmi ñacaycächiman. Nogami ichanga willapämashayquicunallata yarparäcushaj.
79 Gamta rispitashojcunaga, estatutuyquita cumlejcunaga nogawan shuntacächun.
80 Gampa layniqui niycashallanman shongöpis yarpächun. Chaynöpami imapitapis mana pengacushächu.
81 Salbamänayquitami pasaypa shuyaraycä. Palabrayquimanmi yäracuycä.
82 Gam aunimashayquita ricchacuycaptillämi ñawëpis chulluycan. Chaymi «¿imayraj shamunqui shacyächimänayquipaj?» në.
83 Llapan gongashana auquinna cashpäpis, gampa layniquicunataga manami gongärächu.
84 ¿Imaycamaraj awantashaj? ¿Imayraj jusganqui gaticachämajcunataga?
85 Mana rispitashojcunami y yachachicuyniquitapis mana wiyacoj runacunami mana alliman chayanäta munaycan.
86 Yanapaycamay ari. Imatapis mana rimapaycaptëmi gaticacharcaycäman. Gampa mandamintuyquega llapanpis rasun cajllami.
87 Ichicllapami pishisha wañunäpis. Chayno caycarpis manami gongaycushcächu willapämashayquicunata cumliytaga.
88 Cuyacoj cashayquimanno masta cawachimay ari. Chaura estatutuyquicunatapis cumlishämi.
89 Tayta Dios, palabrayquega mana gongacajmi. Syëluno mana ushacajmi caycan.
90 Aunishayquitaga imaycamapis cumlinquimi. Gammi tacyachishcanqui cay pachata. Chaymi mana cuyucunchu.
91 Ima-aycapis gam nishayquinöllami caycan. Chaycunaga llapanpis gampa munaynillayquichömi caycan.
92 Yachachicuyniqui mana cushicachimaptenga llaquicuycällarmi wañöman caran.
93 Manami imaypis gongashäpächu willapämashayquicunataga. Chaycunami cawaycächiman.
94 Salbaycamay ari. Nogaga gampami cä. Willapämashayquicunataga cumliycämi.
95 Fiyucunaga shuyarpaycäman imay örapis wañuchimänallanpämi. Nogami ichanga estatutuyquicuna nishallanta cumliycä.
96 Nogaga llapantapis ricashcä ushacajllatami. Mandamintuyquicunami ichanga imaypis mana ushacanchu.
97 Nogapäga fiyupa allimi yachachicuyniquicuna. Imay örapis chaytaga yarparaycämi.
98 Mandamintuyquicunataga imaypis yarparaycämi. Chaycunami nogataga chiquimajcunapitapis mas yachaj cayman churamasha.
99 Yachachimajcunapitapis masmi tantiyä. Chaynöga tantiyä estatutuyquicunata yarpararmi.
100 Yachajcunapitapis masmi tantiyä. Chaynöga caycä willapämashayquicunata yarpararmi.
101 Mana alli ruraycunataga manami ruränachu palabrayquita wiyacunäpaj.
102 Alli arriglar jusgashayquicunataga manami gongashcächu. Chaynöga caycä gam yachachimaptiquimi.
103 Shimëchöga mil-abëjapa mishquinpitapis masmi mishquëman palabrayquega.
104 Willapämashayquicunata wiyacurmi yarpaysapayashcä. Chaymi fiyupa chiquë llutan ruraycunataga.
105 Palabrayquega juc achquinömi. Purinäpaj caminupa achquipämajnömi caycan.
106 Cumlinäpaj jurashätaga cumlishämi: Allita ruranäpaj nimashayquitaga simri cumlishämi.
107 Tayta Dios, fiyupami llaquicuycä. Palabrayqui nishanno cawachimay ari.
108 Gamta mañacamushäta aunimay Tayta Dios. Alli arriglar jusgashayquita musyaycachimay ari.
109 Wañuchimaytami munarcaycan. Chaypis yachachimashayquitaga manami gongächu.
