116 Aunimashayquino yanapämay. Chauraga masta cawashämi. Gamman yäracaycämuptëga ama mana alliman chayachimaychu.
117 Salbaycamay ari. Chauraga cawashärämi. Layniquitapis cumlishämi.
118 Layniquita cachaycojtaga gam disprisyanquimi. Chaura chay runacunaga quiquillanmi llutanman chayan.
119 Cay pachacho caj fiyucunataga ganratanömi ricanqui. Chaymi nogaga estatutuyquicunata fiyupa cuyä.
120 Gamta manchacur nogaga sicsicyaycä. Imanöpis jusganayquipaj cashayquipitami fiyupa llaquicö.
121 Imaypis allillatami rurashcä. Ñacachimajcunapa maquinmanga ama cachaycamaychu.
122 Noga allilla goyänäpaj yanapaycamay ari. Fiyucunaga ama ñacachimächunchu ari.
123 Ñawëpis chulluycan salbamänayquipaj ricchacur shuyaraycaptillämi, aunimashayquita cumlimänayquipaj shuyaraycaptillämi.
124 Yanapaycamay ari cuyacoj cashayquimanno. Layniquicunata yachachimay.
125 Nogaga sirbishojniquimi cä. Tantiyaycachimay. Nogaga estatutuyquicunata yachacuytami munä.
126 Tayta Dios jusganayquipaj caj diya chayamushanami. Mana wiyacojcunaga yachachicuyniquita manami cumlishachu.
127 Nogami ichanga allinnin goripitapis masraj mandamintuyquicunata cuyä.
128 Chaymi nogaga willapämashayquino goyä. Llutan ruraycunataga llapantami chiquë.
129 Estatutuyquicunaga fiyupa allimi. Chaymi nogaga wiyacö.
130 Palabrayquiwan tantiyachiptenga mana yachaj runapis allimi tantiyan.
131 Amatarmi munä mandamintuyquicunata masta yachacuyta.
132 Tayta Dios, rispitashojcunataga allimi ricanqui. Chayno nogatapis cuyapämashpayqui alli ricaycamay ari.
