3 Yahweh ay Diyos ko, mo waday binmasolak si gait ko,
4 mo way nilipotak ay gayyem ko ono pinos ko din sanikwan di kalaban ko ay maga di gapo,
5 olay bay-am ay dompap din kalaban ko. Bay-am ay pomse da ya taynan da din bangkay ko sin lota.
6 Pomika ka koma, Apo, gapo sin bonget mo ta sangoem din mabonget ay kalaban ko. Man-gonay ka ta bomadang ka, Diyos ko, tan waday timpo ay pangokomam ay inkeddeng mo.
7 Sinopem din ipogaw sin kailiili ta likoben das sik-a. Tomokdo kad langit ay mangituray en daida.
8 Sik-a di mangokom si am-in ay ipogaw, Apo. Ibagam di ikeddeng mon sak-en ta maammoan ay magay basol ko.
9 Ammom di am-in ay panggep ya nemnem yan kosto am-in ay amagem. Topapem din mangamag si lawa yan gon-gonaam din nalinteg di ogali da.
10 Isalakan Diyos din managtongpal en sisya. Sisya di somalaknib ay kaman kon salida.
11 Nalinteg si Diyos sin pangokomana, kanayon ay dosaena din mangamag si lawa.
12 Mo adi manbabawi di ipogaw, palidena din kampilana ya isagana na din pana na.
13 Alaena din mankatatadem ay armas na yan ipaturong na din bomidbidang ay pana na.
14 Ilaem din iyat di managbasol ay mannemnem si lawa. Manplanos manproblimaan ya ietekanay iib-a na.
15 Ngem sisya met laeng di makna sin bito ay inamag na para sin gagait na.
16 Madosa gapo met laeng sin lawa ay am-amagena tan din panakitanas odom yan mantaoli met laeng en sisya.
17 Diyos ay Kangatoan, man-iyamanak sin kinalinteg mo. Mankantaak ay mangidaydayaw sin ngadan mo.
