2 Nemnemem koma ay Apo din pinilim ed idi ay ipogaw mo. Inbalam daida sin naibabag-enan da ta panbalinem ay ipogaw mos daida. Adi ka koman linglinglingan din dontog ay Zion ay nanteam.
3 En ka ilaen, Apo, din golpi ay nadadael ay Timplo. Dinadael din kalaban mi amin ay wada sin isdi.
4 Sin Timplo, din kalaban mo yan manbogbogaw da, tinood das di di bandila ay mangipaila ay nangabak da.
5 Kaman dan manpoyos kaiw sin kada babaen sin wasay da.
6 Amin ay kaiw ay amag na yan winasay ya minaso da.
7 Dinadael dan Timplom ya pinooan da, inpakadodogis da din pandaydayawan di ipogaw en sik-a.
8 Nantotolagan da ay amin kami yan peslen da, amin ay pandaydayawan di ipogaw en Diyos yan pinooan da.
9 Ed wani yan magay mamadto ya magay mailas milagro, kas-ano pay di kabayag nina, Apo?
10 Pig-an ay somaldeng din kalaban mo ay manis-iyek en sik-a ya manglaslasoy sin ngadan mo?
11 Apay nga gomiginek ka ay adi kan dosaen daida?
12 Ngem sik-a ay Diyos din ari mi manipod pay ed idi, namin ado ay insalakan mos dakami isnan daga mi.
13 Nansianem din baybay babaen sin nakaskasdaaw ay panakabalin mo. Din toktok di kaeegyat ay animal sin baybay yan tinegmil mo.
14 Tinegmil mo din toktok di animal ay makwani en Leviatan, inpakan mon awak na sin aanimal sin lugar ay kadardaratan.
15 Din danom sin obbog yan inpabalam, ngem pinamagam abe din danom sin adi katkatdok ay ginawang.
16 Inpawadam di labi ya kaagawan, pinarsuam di maninggaw ay agew ya bowan.
17 Inkeddeng mo din beddeng di daga, din tiyagew ya deam yan inkeddeng moy timpo da.
18 Nemnemem, Apo, ay sis-iyekan daka sin mangonkontra en sik-a. Naong-ong da yan laslasoyen das sik-a.
19 Adim ipalobos ay paligaten din kalaban da din ipogaw mo ay kalapati di kaiarigan da, adi ka linglinglingan daida.
20 Din intolag mon dakami, nemnemem koma, tan pag laway am-amagen da sin amin ay mabolinget ay solin di daga.
21 Adim ipalobos ay din mapalpaligat yan maibabain da, din nabiteg ya kakkaasi, daydayawen daka koma.
22 Adi kan gomiginek, Apo, ikalintegam din awak mo! Nemnemem koma din panlaslasoyan di naong-ong en sik-a, maninsin-agew ay laslasoyen daka.
23 Manngalawngaw si kanayon din mangonkontra en sik-a, adi kan linglinglingan din ibogabogaw da.
