4 Mlé agu fye di ge di klogu mto fa, na kayanggu i dad sigalgu déén di ge du dmasal fagu di dagitam.
5 Toogu fabsol i layefgu di kafyem, na di klehewgu mlingag agu dmayen ge.
6 Di kilègu faldam agu ge; tayud i butang ge i fandamgu.
7 Mnè agu di ifatam salngad di knè i anuk di dungan fafak i yéan, taman mlingag agu di klehewgu, du ge sa i tmabeng deg.
8 Nlagafta ge na nagotam agu i kwananam du fye landè gaslokgu.
9 Kabay dad to mayè mwè i nawagu gtufa kadang ditù di lam i banwe i dad to mati.
