8 Fuléam di deg i klehewgu; du balù i kiboam deg salngad ku tatanfoam dad tulangu di kablat i salàgu, knean ku nlifetam lêman agu lehew.
9 Snafangam matam fye laam teen i dad salàgu, na nifum i kdee sasè mgimògu di gusmulatam dun.
10 Blém deg i falami nawa too mlaneb, na fneam déén i kagsalig.
11 Nangam agu flana di safédam, na nangam nwè di deg i Mtiu Tulusam.
12 Kabay fuléam di deg i klehew i to gmadè tagalwà kenen di agot i sasè, na banlém agu ayègu mimen ge.
13 Na én nimògu, tdògu di dad gamsalà i knayeam di dale, na msal ale na fdadong di ge.
14 Dwata, falwaam agu di kukum di fati, du alò ge i gafalwà deg, na too agu lehew tmulen di dademe to i kagalwà mdà di ge.
15 E Gumdatahgu, nweam i kyàgu talù, na toogu fdengeg i kafyem.
16 Ise ku én i toom knayè i kadsù dad lmanaf, du balù blégu ge lmanaf snakuf di lifoh là gaflehew ge.
17 Kabay én dsù i toom knayè i kablégu ge i ksal too mdà di nawagu; laam knagol i to malbà i nawan, i to nun klidù nawan mdà di salaan.
18 Na banlém kafye na tnabengam i dad tom di banwe Sion, na fdakam lêman i labat batu di glibut syudadam Dyérusalém.
19 Ku mgimò én, gaflehew ge nan i dad lmanaf dsù di ge, én dad lagi baka snakufmi di lifoh di tah i gudamsù di ge, du blé mdà di glut kimen nawa i mlé dun.
