5 Ipeveyveyai nu te Nengazen is tivuuk he untung nu; sarig ka ziyà te kandin ne ebeelan din heini ziyà te kenikew:
6 Edhimuwen din he utew keladu is kebpezeyaǥa zin he metazeng ka wey wazè nu salà, iring kekeladu te silà te andew ke meudtu.
7 Mebmelinawen ka ziyà te etuvangan te Nengazen ne kenè ka medarà is edtaǥad te ebeelan din. Kenè ka mesemuki emun duen menge etew he ebmeuswaǥen wey edlampus is mezaat he menge pelanu zan.
8 Kenè nu ituǥut he zuen pauk etawa seeng diyà te ǥehinawa nu tenged kandan. Kenè ka mesemuki, su ebpekezezaat heini kenikew.
9 Su is lalung he menge etew edsegseǥen puun te tanà he Israel, piru is menge etew he edsarig te Nengazen ne ebpedayun is ked-ubpè dan kayi he tanà.
10 Kenà egkeuǥet egkahanew is lalung he menge etew. Ne minsan ke ebpen-ahaan niw pa sikandan, ne kenè niw en egkaahà.
11 Piru is kenà memepelevawen ebpedayun is kandan he ked-ubpà kayì te tanà he Israel he dezeyaan is kebpekesavuk dan.
12 Is lalung he menge etew ebpelanu te mezaat diyà te menge metazeng, wey utew zan egkeepesi is menge metazeng.
13 Iyan, ed-engitan dà sikandan te Nengazen, su netuenan din he hapit en egkeuma is timpu te kedezeeti kandan.
14 Edhulevuten te lalung he menge etew is ispada zan, wey edhingaten dan is panè dan, su edhimetayan dan is menge egkaayuayu wey menge pubri he midtinazeng.
15 Piru iyan sikandan egkeuney egketiyuk te ispada zan, ne egkengevadtì is menge panè dan.
16 Is deisey he azen te metazeng meupiya pa kenà is mahabet he ketiǥeyunan te lalung he menge etew.
17 Su id-awà te Nengazen is desen te menge lalung, ne edtevangan din mulà is menge metazeng.
18 Ed-eturen te Nengazen is menge etew he wazà igkesewayi kandan. Ne is egkepengevilin dan ne kenà egkaawà diyà te kandan te taman te taman.
19 Ne minsan timpu te vangkit kenà sikandan egkemenu, ne minsan timpu te vitil ne zekelà is keenen dan.
20 Iyan, is menge lalung egkengezeetan mulà sikandan. Is menge kuntada te Nengazen egkeiring te bulak su ebpematey zan dà. Egkengahanew sikandan iring te evel.
21 Is lalung he menge etew ne emun ed-utang ne kenà ebayad. Ne kelelaǥan mulà is menge metazeng.
22 Is menge etew he edtuvazan te Nengazen, ebpedayun is ked-ubpè dan kayi te tanà he Israel. Piru is etew he edrewakan din edsegseǥen puun kayi he tanà.
23 Egiyahan te Nengazen is kada langkad te etew he ebpekepenunuat te Nengazen is kebpengungubpaan din.
24 Minsan ebpekesipà sikandin ne kenà egkepiley su egewazen sikandin te Nengazen.
25 Puun te vatè e pa taman en guntaan te meǥurang e en, ne wazè e pa mekaahà te metazeng he menge etew he mibey-anan te Nengazen etawa mekepekilimus te keenen is menge anak dan.
26 Layun pa sikandan ebpekepememeǥey wey ebpekepesambey, ne is menge anak dan nehimu he tuvad diyà te zuma he menge etew.
27 Likayi niw is mezaat ne veeli niw is meupiya su para taman te taman is kebpekeubpè niw kayi te tanà he Israel.
28 Su igkesuat te Nengazen is hustu he kukuman ne kenè din ebpesegdanen sikan is menge metinumanen he edsunud kandin. Edtipiǥan din sikandan te taman te taman, piru is menge kevuwazan te lalung he menge etew ne edsegseǥen mulà puun te tanà he Israel.
29 Is menge metazeng mulà pedayun he ebpekeubpà dutun te tanà te taman te taman.
30 Hustu is menge lalag te metazeng ne egkezumahan te ketau.
31 Edtipiǥan din diyà te ǥehinawa zin is menge kesuǥuan te Megbevayè din ne kenè din heini edrepasen.
32 Is lalung he menge etew, ed-eyanan dan is menge metazeng, su egkesuatan dan te edhimatey.
33 Piru kenà idtuǥut te Nengazen he mepatey zan is menge metazeng. Ne kenà idtuǥut te Nengazen he mehukumi te silut is menge metazeng emun ebpekeetuvang dan diyà te hukmanan.
34 Sarig ka te Nengazen ne tumana nu is paaǥi zin, ne ebeǥayan ke zin te zengeg pinaaǥi te pedayun he kebpeubpaa zin kenikew kayi te tanà kayi te Israel. Ne egkeehè nu is kedsegseǥa te menge mezaat he etew puun keniyan he tanà.
35 Hein nehuna he timpu, duen neehè ku he lalung he etew he ebpendaagdaag. Ed-isipen din is keugelingen din he lavew te zuma; iring sikandin te metawis he kayu he sidru ziyà te Lebanon.
36 Iyan, te huziyan he timpu minatey sikandin; nahanew en sikandin. Mibpen-ehè ku sikandin, ne wazè ku en maahà.
