1 Flehew gamu di kafye Amuito Dwata, kdeeyu dad to matlu! Én gablà nimò dad to mimen Dwata, dunan dmayen kenen.
2 Dnayenyu Amuito Dwata fagu di too fye kakbityu i dad agafyu gambet i arfa na i dad dademe nun tafas.
3 Lingagyu i falami lingag dmayen Dwata; na tooyu fanse i kagafyu faginyu di klingag dmayen di kenen; na mkit gamu di klehew,
4 du i kdee man Amuito Dwata too glut, na i kdee nimoan too gsalig.
5 Too mabtas di Amuito Dwata i matlu nimò na matlu kukum. I bong kakdon landè kgilin gafat di kdee to di tah tanà.
