5 Tamlo ale di ge na galwà ale; smalig ale di ge na landè gugdanà nawala.
6 Kabay agu, salngad agu i safat, ise to, du landè mafè deg, na knang agu nawa i kdee to.
7 I kdee to mite deg, toola agu nulé, na lamaméd ale du slame dalanla madoy deg.
8 Manla, “A, én kun gusmalig to ani di Amun Dwata. Fadé neyeito ku tnabeng kenen i Amun! I Amun nan falwà kenen, ku glut toon kenen kando.”
9 Kabay ge, Dwata, i fsut deg mdà di tien yêgu, na ge i mifat deg di ktutùgu fa di yêgu.
10 Alò ge i gusmaliggu mdà di ksutgu kel ani, na landè dademe dwatagu, alò ge.
11 Nang ge moon fawag di deg, du too mdadong i kaflayam di deg, na landè dademe fakay tmabeng.
12 Too dee to mnang nawa samlibut deg, du fanla agu falmo. Salngad ale i dad labè lagi baka mdà di banwe Basan mayè falmo i dad to.
13 Na salngad ale i dad malbang labè lmanaf liyun mngat i dad bàla du kagula makét na samkah deg, na gambet too ale mngal fite i klabèla.
