2 ono mayat ay pantabonan ay adi makasgep di kalaban. Managlayad ya napodno ka ay bomadang, sik-a di kanayon ay omisalakan. Maiarig ka abes kasay ko tan sik-a di somalaknib sin kalaban ko. Din nanasyon yan abakem et paituray mos daida en sak-en.
3 Apo, sino aya di kasasaad di ipogaw et nemnemem? Ay tan nabanol da od et ay-ayowanam?
4 Din biyag di ipogaw et owat kaman dagem, mamaga ay kaman alidong.
5 Apo, pansianem ed daya ta bomaba ka, giwitem din dontog et omasok da.
6 Pankimatem ta mansisian din kalaban ko, beksem din panam ta managtag da, Apo.
7 Iadawam san takkay mo issan kad-am ed daya, ta sin malosong ay danom, komay-at ka. Sin panangituray di mangili, omisalakan ka,
8 makaetek da olay sin sapata da.
9 Apo, enak mankanta ay makompasan si arpa, baro ay kanta paran sik-a.
10 Din aari yan pangabakem daida, isalakan mo nan si David ay mansilsilbin sik-a.
11 Sin makedse ay kalaban ko, omisalakan ka koma, mangili da ay makaetek olay sin sapata da.
12 Din babbaro ay an-ak mi yan domakdake da koma ya pomigsa da ay kaman mola. Din kaiarigan aben din babalasang ay an-ak mi, Apo, yan din posti ay naaltialtian sin solin di palasyo.
13 Sapay koma ta mapno din agamang mi si amin ay kalasin di apit mi. Din kakarnero sin pastolan mi et sapay koma ta niliblibo di an-ak da.
14 Din baka mi abe et sapay koma ta tomaba ya pomigsa da. Maga koma di mangobat sin ili ya magay maibalod sin addawi. Maga koma abe di man-adawag sin kalsada gapo si ligat da.
15 Nagasat di nasyon ay kaman nina di kasasaad da, nagasat di ipogaw ay si Yahweh di daydayawen da.
