1 Ehei, au laoma ta wana GUIAU arinai, ta wowo ma kodeda eda mauri we’utauna arinai!
2 Ta laoma ia matana eai ma lautoida, ta wowo ma kodeda ia arinai, ta wana ia ta aihelahui!
3 Paana ede GUIAU ia Eaubada lailaina, ia wasawasa lailai didigana, eaubada gamagaridi i saetawatawaidi.
4 Tanoubu ubu aririna ia nimana eai, oea tupidi saesaedi hinage ia enanayao ede;
5 Gabogabo ede ia enana, paana ia i hetubu, ia nimana eai tano pitapitarina i ginauri.
6 Ehei, au laoma ta aihelahui eo ta tabaohui, ta turibono GUIAU matana eai, ia Tauhetubuda ede!
7 Paana ia eda Eaubada, ita ena ganaalo tataoda eo ia nimana mamoedi. I lolo wauta arinana au ataiei!
