5 Ia ba haḡerea, bena ba diari; una dainai vairamui na nega ta basie hemarai.
6 Ina ogoḡami tauna e taitai, bena Iehova ese e kamonai henia, bona ena hekwarahi iboudiai lalodia amo e hamauria.
7 Iehova ena aneru e taruhamu, ia garina e garimu taudia e ḡeḡedia ahumu, bona e hamauridiamu.
8 A mamia toho, bena ba diba, Iehova na namo; ia e abidadama heniamu tauna danu e moalemu.
9 Ena helaḡa taumui e, Iehova garina ba gari, badina be ia garina e garimu taudia na asie dabumu.
10 Leona natudia na e dabumu bona e hitolodiamu; a Iehova e tahuamu taudia na ḡau namona ta ai asie dabumu.
11 Memero kekeni e, aoma, lau ba hakala henigu; Iehova imatauraina baina hadibamui.
12 Tau be daika, mauri urana e uramu, e uramu danu ena mauri dinadia bae hoho, namo baine itaia helaoreana,
13 Malamu ba naria, basine ere dika, udumu bibinadia danu, koikoi herevadia basie gwaurai.
14 Dika ba rakatania, kara namo ba kara; maino ba tahua, bona ba ḡavaia.
15 Iehova ese kara maoromaoro taudia e haḡerediamu; edia taitai ia ese e hakala henidiamu.
16 Iehova ese kara dika taudia e vaira hua henidiamu; idia ilalo-taodia na tanobada amo e abia ohomu.
17 Kara maoromaoro taudia e boiboimu negadia ai na Iehova ese e kamonaimu, bona edia hekwakwanai iboudiai lalodia amo e hamauridiamu.
