1 GUIAU ia egu mara eo egu abamauri ede; eai abo ea matausiei? GUIAU ia egu mauri ena iala bonana ede; eai matausina abo ea matausi?
2 Ena tatao manamanabaradi se ialaigu eo se aipate bena se unuigu, agu waiunu eo isi tau hebaaeagu, abo se alabesibesi eo abo se beu.
3 Taba iala tataodi gamagaridi se hetaiirigu, taba nige aruagu i loi; taba hinage se ialaigu, nuagu taba nige se hemoiu.
4 Ginauri esega dumaduma GUIAU arinai ea aibodai, abo hinage ea eo’owatai: ia ede bena GUIAU ena numa eai ea miamia egu mauri asubenadi gamagaridi eai, GUIAU ana ao lolo dumadumana bena eai itaitai, eo bena ena dubu alona eai ea aiaibodalau.
5 Paana ede huia baaea eai ena abaailogulogu eai abo i toreamuigu; ena apa birigomna eai abo i buburigu, ia abo i abiisinigu we’utau saesaena potana eai i toregu.
6 Abotai eau urugu abo se lauisini agu waiunuyao se toro hetaiirigu ea saetawatawaidi, arinai ena numa lulu eai aitalasam abo ea gabudi ma wowogu; abo ea wana, eo GUIAU abo ea aihelahui!
7 GUIAU e, ena ea eoga lailai bena u ataatai! Em abilolo bena u hemasara arigu eai, eo u heuioegu!
8 U ribaeyao u ene, “Matagu u eo’oi.” Nuagu i heuioem, i ene, “GUIAU e, matam abo ea eo’oi.”
9 Tabu matam u woeoi arigu eai. Em heaheari tauna tabu u aiduiei ma ouyalayalam, tau saguigu ede oa. Tabu u gabahesuaragu, tabu u nuagabaegu, abihemaurigu Eaubadana e!
10 Taba tamagu eo sinagu se otaotaegu wa, GUIAU abo i abi’isinigu.
11 Oa em dobila u heatagu, GUIAU e, abalau masamasarahana eai u woeaigu agu waiunuyao debadi eai.
12 Tabu u buigabaegu agu waiunu edi henuhenua aridi eai, paana tauribaribataubiga tataodi se toro bena se hebaaeagu, isi hinage heamamna laulaudi eahuadi eai.
