1 Iehova e, ba gwauraigu maoro, badina be vada na raka mai maoromaorogu ida, bona Iehova vada na abidadama henia, asi egu daradara.
2 Iehova e, ba tahugu, ba dibagu; lalogu bona daragu ba dibadia.
3 Badina be emu hebogahisi na lau matagu ai, bona oi iabidadama-henimu karana ai na rakamu.
4 Koikoi taudia ida asina helaimu, bona boga-alaga taudia ida asina raka heboumu;
5 kara dika taudia edia hebou na inai heniamu, bona kara havara taudia ida basina helai hebou.
6 Ialo-ḡoevaḡoeva ai lau imagu na huriamu; Iehova e, emu ihaboulaina patana na rakaia heḡeḡemu,
7 oi ihanamolaimu anena na lololaiamu, bona oiemu hoa karadia iboudiai na gwauraidiamu.
8 Iehova e, oi o noholaiamu rumana na ura heniamu, oi hairaimu e miamu gabuna na lalokau heniamu.
