1 Eaubada ena namanamari galewa i ribahemasaraha, eo teha ewa eai nimana paisoana i wasawasaei.
2 Asubena to asubena ena riba se hetamarilaei, eo maiona to maiona ena sonoga se ribahelai.
3 Isi nige arinadi dagugudi, eo nige edi riba, memenadi nige dagugudi;
4 ia mo arinadi ie lau tanoubu maudoina boeana eai, edi riba hinage se lau tanoubu sigana eai. Duaduaridi eai mahana ena numalulu i hetoro,
5 ia doha tautawasora harihariu wa ena numa i torohaigabaei, doha tau adiadidirina ma kodena ena dobila i laulauwatai.
6 Ena abadalasae ede galewa tupo esau eai, i hetahetaiiri i lau e ie lage galewa sigana eai; gigiborina arinai hinage taba nige ginauri saha i tauyamui.
7 GUIAU ena laugagaeo i lolo dumaduma, tau earuana i hemauriuioi; GUIAU ena abahemasaraha ribadi mamohoidi ede, tau nuasupusupuna i hesonoga.
8 GUIAU ena lauheata ribadi se dudurai, tatao nuadi se hekodedi; GUIAU ena lauhesom ie a’a esegai, tatao matadi se hemaradi.
