3 À lɛ̀ dufu sínɛ, à pↄ́'ↄnnanↄ lɛ́ kↄ̃n dↄ̃nao kↄ̃n pↄnna wiiio.
4 Zaakɛ yã kɛ̀ Dii ò nɛ́ yãpuramɛ, à náanɛ vĩ a yãkɛna píngi guu.
5 À ye maakɛɛzi kↄ̃n yãzɛdeeo, Dii yenzi anduna pà.
6 Dii yã'ona bé à musu kɛ̀, à lɛ́'ĩa bé à musupↄnↄ pɛ̀pɛ.
7 À í kàɛ gu dↄ̃nkↄ̃, à gↄ̃̀ ísiaa ũ, à ínↄ kàkↄ̃a, à gↄ̃̀ í lↄ̀ ũ.
8 Anduna gbɛ̃ píngi, à vĩa kɛ Diinɛ, gbɛ̃ bɛ̃ɛnↄ píngi, à mì siɛnɛ.
9 Zaakɛ à yã ò, ben anduna gↄ̃̀ kaɛna, à yã dìɛ, ben pↄ́ píngi gↄ̃̀ kun.
10 Dii è lɛ́ kɛ̀ boriinↄↄ kpàkↄ̃sↄ̃ kɛ pã, è kpá bùsudeenↄnɛ kↄ̃n pↄ́ kɛ̀ aↄ̃ↄe pɛɛao.
11 Yã kɛ̀ Dii zɛ̀o ègↄ̃ diɛna gíngin, yã kɛ̀ à à pↄↄ gbà ègↄ̃ kuu gurↄ píngi.
12 Aubarikadeen borii kɛ̀ Dii dɛ à Luda ũu ũ, gbɛ̃ kɛ̀ à ń sɛ́ a pↄ́ ũunↄ.
13 Zaa musu Dii è guu gwa gĩzĩ, è gbɛ̃nteenↄ e ń píngi.
14 Zaa à kúkiia è gbɛ̃ kɛ̀ aↄ̃ↄ kú anduna guunↄ tàasi kɛ ń píngi.
15 Àmbe à baade píngi swɛ̃̀ kɛ̀, è ń yãkɛnanↄ dↄ̃ píngi.
16 Kína ke è zĩ̀ ble a zĩ̀kpɛ parikɛɛ yãnziro, zĩ̀kari ke è bↄ a gↄ̃sagbãakɛ yãnziro.
17 Sↄ̃ náanɛkɛna à ń bↄↄ nɛ́ ɛgɛɛmɛ, baa kↄ̃n à gbãakɛɛo eé fↄ̃ à gbɛ̃ mì síro.
18 Dii wɛ́ɛ kú a vĩakɛrinↄa, gbɛ̃ kɛ̀ aↄ̃ wɛ́ɛ dↄ à yenzizinↄ.
19 Eé ń bↄ gaa lɛ́zĩ, eé ń gwa dekaagurↄ.
