ሮሚያ 3:3-26 in Dawro

³ ያቲና ኡንቱንቱፔ ኢቱ ኢቱ ኣማኔቴናዋ ጊዶፔ፥ ዋኒ? ሄዋ ዲራው፥ ፆሳይ ኣማኔቴና ያጊያዌ?

⁴ ሄዋ ጊዴና፤ ኣሳይ ኡባይ ዎርዳንቻ ጊዶፔካ፥ ፆሳይ ጊያዌ ቱማ ጊዳናው ቤሴ። ፆሳ ማፃፋይ፥ «ኔኒ ሃሳዪያ ዎዴ፥ ኔኒ ፂሎ ጊዲያዋ ኤሪሳናው ኮሼ፤ ኔኒ ሞቴቲያ ዎዴ፥ ሻቲማናው ቤሴ» ያጌ።

⁵ ሺን ኑ ባዪዙ ፆሳ ፂሎ ኦሱዋ ኤሪሲንቶ፥ ኑኒ ዋጋኔ? ኑ ቦላ ሃንቁዋ ኣሂያ ፆሳይ ባዪዛንቼ? ታኒ ኣሳይ ጊያዋዳን ጋይ።

⁶ ሄዌ ዋዪ ሃናና። ኣዪሲ ጎፔ፥ ሄዋዳን ጊዶፔ፥ ፆሳይ ሃ ኣላሚያ ቦላ ዎቲ ፒርዳኔ?

⁷ ሺን ታ ዎርዱዋን ፆሳ ቱማቴꬃይ ኣ ቦንቾ ዳሮፔ፥ ያቲና፥ ሃዋ ጋካናው ኣዪሲ ታ ቦላ ናጋራንቻዳን ፒርዲ?

⁸ ያቲና ኑኒ፥ «ሎዑ ያናዳን፥ ኣኔ ኢታባ ኦꬆይቴ» ኣዪሲ ጎኮ? ኢቲ ኢቲ ኣሳይ ሃዋ ታና ሞቲዴ ቦሬዲኖ፤ ኡንቱንቱ ፆሳፔ ቤሲያ ፒርዳ ኣካና።

⁹ ሄዋ ዲራው፥ ኑኒ ዋጋኔ? ኑኒ ኣዪሁዳቱ፥ ኣዪሁዳ ጊዴና ኣሳፔ ዳሬቶ? ሄዋ ጊዴና፤ ኣዪሲ ጎፔ፥ ኣዪሁዳቱካ ኣዪሁዳ ጊዴና ኣሳቱካ ኡባይ ኢቲፔ ናጋራፔ ጋርሳን ዴዒያዋ ታኒ ካሴ ሂንቴንቶ ኦዳዲ።

¹⁰ ፆሳ ማፃፋይ ሃዋዳን ያጌ፤ «ፂሎ ኣሳይ ኢቱኔ ባዋ።

¹¹ ኣኬኪያ ኣሳይካ ባዋ፤ ዎይ ፆሳ ኮዪያዌካ ባዋ።

¹² ኣሳይ ኡባይ ኦጊያፔ ካሬ ኬሴዲኖ፤ ኡባይ ሙሌካ ማዴናዋ ጊዴዳ። ሎዖባ ኦꬂያ ኦኒኔ ባዋ፤ ሃራይ ኣቶ ኢቱኔ ባዋ።

¹³ ኡንቱንቱ ዶናይ ዶያ ዴዒያ ዱፉዋ ማላ። ባሬንቱ ኢንፃርሳን ዎርዶቴዲኖ። ኡንቱንቱ ዶናፔ ኣሳ ዎꬊያ ሾሻ ዪሻ ማላ ሃሳያይ ኬሴ።

¹⁴ ኡንቱንቱ ዶናን ሼቃይኔ ጫሞባይ ኩሜዳ።

¹⁵ ኡንቱንቱ ሱꬃ ጉሳናው ዳሪ ኤሌሊኖ።

¹⁶ ባይዙኔ ኮሌꬃይ ኡንቱንቱ ቤዳሳን ሃቃኒኔ ꬋዬና።

¹⁷ ኡንቱንቱ ሳሮቴꬃ ኦጊያካ ኤሪኪኖ።

¹⁸ ቃሲ ፆሳው ያዪያባይ ኡንቱንቱ ቆፋን ባዋ» ያጌ።

¹⁹ ኣሳ ኡባ ሃሳያ ዲጋና ማላኔ ኩሜንꬃ ሳዓ ፆሳ ፒርዳፔ ጋርሳው ኣꬃና ማላ፥ ሂጊያ ጊዶን ኦዴቴዳ ኡባባይ ሂጊያፔ ጋርሳን ዴዒያ ኣሳው ሃሳዪያዋ ኑኒ ኤሬቶ።

²⁰ ፆሳ ሲንꬃን ኦኒኔ ሂጊ ኣዛዚያዋ ኦꬂያዋን ፂሌና፤ ሂጊ ኢቲ ኣሳይ ናጋራ ኦꬄዳዋ ኤራናዳን ኡዴ።

²¹ ሺን ፆሳይ ኣሳ ፂሊሲያ ኦጊ ሂጊ ባይናን ሃዒ ቆንጬዳ፤ ሂጊኔ ናባቱ ሄ ፂሎቴꬃባ ማርካቴዲኖ።

²² ፆሳይ ኣሳ ዬሱሲ ኪሪስቶሳ ኣማኒያዋን ፂሊሴ፤ ፆሳይ ሄዋ ኣ ኣማኒያ ኡባው ኦꬄ፤ ኣይ ሻኮቴꬃይኔ ባዋ።

²³ ኣዪሲ ጎፔ፥ ኣሳይ ኡባይ ናጋራ ኦꬄዳ፤ ፆሳ ቦንቹካ ኡንቱንቶ ጉፄዳ።

²⁴ ሺን ኡንቱንቱ ፆሳይ ኢሚያ ኣ ኣꬎ ኬካቴꬃን፥ ባሬንታ ዎዚያ ኪሪስቶሲ ዬሱሳ ባጋና ጮ ፂሌዲኖ።

²⁵ ዬሱሳ ሱꬃን ኣሳይ ኣ ኣማኒዴ፥ ባሬ ናጋራው ማሮቴꬃ ዴማናው፥ ፆሳይ ኣ ኢሜዳ፤ ፆሳይ ሄዋ ባሬ ፂሎቴꬃ ቤሳናው ኦꬄዳ፤ ኢ ቤኒ ዎዲያን ኣሳ ናጋራ ዳንዳዪዴ፥ ካꬊ ባሺ ኣጌዳ፤ ሺን

²⁶ ሃ ዎዲያን ባሬ ፂሎቴꬃ ቤሳናው ኣሳ ናጋራ ኣጌና፤ ፆሳይ ሄዋ ኦꬂያዋን ኢ ባሬ ሁጴው ፂሎ ጊዲያዋኔ ዬሱሳ ኣማኒያ ኡባ ፂሊሲያዋ ቤሴ።

³ Yaatina unttunttuppe ittu ittuu ammanettennawaa gidooppe, waanii? Hewaa diraw, Xoossay ammanettenna yaagiyaawee?

⁴ Hewaa gidenna; asay ubbay worddanchchaa gidooppekka, Xoossay giyaawe tuma gidanaw bessee. Xoossaa Maxaafay, “Neeni haasayiyaa wode, neeni xillo gidiyaawaa erissanaw koshshee; neeni mootettiyaa wode, shatimmanaw bessee” yaagee.

⁵ Shin nu bayizzuu Xoossaa xillo oosuwaa erissintto, nuuni waaganee? Nu bolla hanqquwaa ahiyaa Xoossay bayizzanchchee? Taani asay giyaawaadan gay.

⁶ Hewe waayyii hanana. Ayissi gooppe, hewaadan gidooppe, Xoossay ha alamiyaa bolla wooti pirddanee?

⁷ Shin ta wordduwan Xoossaa tumatethay A bonchchoo darooppe, yaatina, hawaa gakkanaw ayissi ta bolla nagaranchchaadan pirddii?

⁸ Yaatina nuuni, “Lo77uu yaanaadan, ane iitabaa oothoytte” ayissi gookkoo? Itti itti asay hawaa taana mootiidde boreeddino; unttunttu Xoossaappe bessiyaa pirddaa akkana.

⁹ Hewaa diraw, nuuni waaganee? Nuuni Ayihudatuu, Ayihuda gidenna asaappe dareettoo? Hewaa gidenna; ayissi gooppe, Ayihudatuukka Ayihuda gidenna asatuukka ubbay ittippe nagaraappe garssan de7iyaawaa taani kase hinttenttoo odaaddi.

¹⁰ Xoossaa Maxaafay hawaadan yaagee; “Xillo asay ittuunne baawa.

¹¹ Akeekiyaa asaykka baawa; woy Xoossaa koyyiyaawekka baawa.

¹² Asay ubbay ogiyaappe kare keseeddino; ubbay mulekka maaddennawaa gideedda. Lo77obaa oothiyaa ooninne baawa; haray atto ittuunne baawa.

¹³ Unttunttu doonay dooya de7iyaa duufuwaa mala. Barenttu inxxarssan worddoteeddino. Unttunttu doonaappe asaa wodhiyaa shooshshaa yishsha mala haasayay kesee.

¹⁴ Unttunttu doonaan sheqaynne camobay kumeedda.

¹⁵ Unttunttu suuthaa gussanaw darii elleelliino.

¹⁶ Bayzzuunne kolethay unttunttu beeddasaan haqaninne dhayenna.

¹⁷ Unttunttu sarotethaa ogiyaakka erikkino.

¹⁸ Qassi Xoossaw yayyiyaabay unttunttu qofaan baawa” yaagee.

¹⁹ Asaa ubbaa haasayaa diggana malanne kumentha sa7aa Xoossaa pirddaappe garssaw aathana mala, higgiyaa giddon odetteedda ubbabay higgiyaappe garssan de7iyaa asaw haasayiyaawaa nuuni ereetto.

²⁰ Xoossaa sinthan ooninne higgii azaziyaawaa oothiyaawaan xillenna; higgii itti asay nagaraa ootheeddawaa eranaadan udee.

²¹ Shin Xoossay asaa xillissiyaa ogii higgii baynnaan ha77i qoncceedda; higgiinne nabatuu he xillotethaabaa markkatteeddino.

²² Xoossay asaa Yesuusi Kiristtoosa ammaniyaawaan xillissee; Xoossay hewaa A ammaniyaa ubbaw oothee; ay shaakotethaynne baawa.

²³ Ayissi gooppe, asay ubbay nagaraa ootheedda; Xoossaa bonchchuukka unttunttoo guuxxeedda.

²⁴ Shin unttunttu Xoossay immiyaa A aadho keekatethaan, barentta woziyaa Kiristtoosi Yesuusa bagganna coo xilleeddino.

²⁵ Yesuusa suuthaan asay A ammaniide, bare nagaraw maarotethaa demmanaw, Xoossay A immeedda; Xoossay hewaa bare xillotethaa bessanaw ootheedda; I beni wodiyaan asaa nagaraa danddayiide, kadhi bashi aggeedda; shin

²⁶ ha wodiyaan bare xillotethaa bessanaw asaa nagaraa aggenna; Xoossay hewaa oothiyaawaan I bare huuphew xillo gidiyaawaanne Yesuusa ammaniyaa ubbaa xillissiyaawaa bessee.