ሮሚያ 16:8-27 in Dawro

⁸ ጎዳና ኢቲፔቴꬃን ዴዒያ ታ ሲቆ ላጊያ ኣምፒሊያቶሳው ታ ሳሮቶዋ ኦዲቴ።

⁹ ኪሪስቶሳ ኦሱዋ ኑናና ኢቲፔ ኦꬂያ ኡርባኖሳኔ ታኒ ሲቂያ ኢስፃኩሳ ሳሮቲቴ።

¹⁰ ኪሪስቶሳና ኢ ዴዒያዌ ኤሬቲና ፓጪያ ፆኔዳ ኣጴሊሳው ታ ሳሮቶዋ ኦዲቴ፤ ኣሪስፆቢሎሳ ሶይ ኣሳዉካ ታ ሳሮቶዋ ኦዲቴ።

¹¹ ታ ዳቦ ጊዴዳ ኣዪሁዳዊያ ሄሮዲዮናኔ ኪሪስቶሳ ኣማኒያ ናርሲሴሳ ሶይ ኣሳ ሳሮቲቴ።

¹² ጎዳ ኦሱዋን ዳቡሪያ ቲሩፋይናኔ ቲሩፎሶ ጌቴቲያ ማጫዋንታ ሳሮቲቴ፤ ቃሲ ጎዳው ዳሮ ዳቡራዴ ኦꬂያ ሲቂያ ፔርሲሶ ሳሮቲቴ።

¹³ ጎዳ ኦሱዋን ሎይꬂ ኤሬቴዳ ሩፎሳዬዉኔ ታና ባሬ ናዓዳን ማዴዳ ኣ ዳዪው ታ ሳሮቶዋ ኦዲቴ።

¹⁴ ታ ሳሮቶዋ ኣሲንኪሪቶሳው፥ ፒሌጎናው፥ ሄርሜሳው፥ ፓቲሮባሳዉኔ ኡንቱንቱና ዴዒያ ኣማኒያ ኢሻቱዋ ኡባው ኦዲቴ።

¹⁵ ፒሌጎና፥ ዩሎ፥ ኔሪያ፥ ኣ ሚቻቶ፥ ኦሉምፖሳኔ ኡንቱንቱና ዴዒያ ፆሳ ኣሳቱዋ ኡባ ሳሮቲቴ።

¹⁶ ጌሻ ኣሳው ቤሲያ ዬሬታ ዬሬቲዴ፥ ኢቱ ኢቱዋ ሳሮቲቴ፤ ኪሪስቶሳን ኣማኒያዋንቱ ኡባቱ ሂንቴንታ ሳሮ ያጌዲኖ።

¹⁷ ታናዳን ኣማኒያዋንቶ፥ ኣሳ ጊዶን ሻኮቴꬃ ሜꬊያዋንታ፥ ኣሳ ኣማኖ ꬉቦ ጊዲያዋንታኔ ሂንቴ ታማሬዳ ቲሚርቲያና ጋኬቴናዋ ታማሪሲያዋንታ ኣኬካናዳን፥ ታኒ ሂንቴንታ ዎሳይ። ኡንቱንቱኮ ሺቆፒቴ።

¹⁸ ኣዪሲ ጎፔ፥ ሄዋ ማላባ ኦꬂያዋንቱ ባሬንቱ ኡሉዋሲ ኦꬂኖፔ ኣቲን፥ ኑ ጎዳ ዬሱሲ ኪሪስቶሳው ኦꬂኪኖ፤ ባሬንቱ ላቢያ ሃሳያኒኔ ቂꬊያን ኢታባ ቆፔና ኣሳ ዎዛና ባሌꬂኖ።

¹⁹ ዎንጋላው ሂንቴ ኣዛዜቴዳዋ ኣሳይ ኡባይ ሲሴዳ። ሄዋ ዲራው፥ ታኒ ሂንቴባን ናሼታይ፤ ሺን ሎዖቴꬃው ሂንቴ ኣꬌዳ ኤራንቻ ጊዳናዳኒኔ ቃሲ ኢታባው ኣሺኬ ጊዳናዳን ኮያይ።

²⁰ ሳሮቴꬃ ፆሳይ ሴፃና ሂንቴ ጌዲያፔ ጋርሳና ሃኬና ማታ ዎዴ ጋጫና። ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ጊዶ።

²¹ ታናና ኦꬂያ ፂሞቶሴ ሂንቴንታ ሳሮ ያጌ፤ ቃሲ ሃዋዳንካ፥ ታ ዳባቱ ሉቂዮሲ፥ ያሶኒኔ ሶሲጳፂሮሲ ሂንቴንታ ሳሮ ያጊኖ።

²² ታኒ፥ ፃርፂዮሲ፥ ሃ ዳቢዳቢያ ፃፌዳዌ፥ ሂንቴንቶ ጎዳ ሱንꬃን ሳሮታ ኪታይ።

²³ ኣማኒያ ኣሳይ ኡባይ ኣ ሶዪን ሺቂያ ታ ሲራ ጋዮሲ ሂንቴንታ ሳሮ ያጌ፤ ካታማ ሚሻ ኦይቂያ ኤራስፆሲኔ ኑ ኢሻይ ቁዋርፆሲ ሂንቴንታ ሳሮ ያጊኖ።

²⁴ ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ኡባና ጊዶ። ኣሜንዒ።

²⁵ ኑኒ ፆሳ ጋላቴቶ። ታኒ ዎንጋላ ባጋና ዬሱሲ ኪሪስቶሳባ ኦዴዳዋዳኒኔ ዳሮ ዎዲያፔ ጌሚዴ፥ ሃዒ ቆንጬዳ ቱማቴꬃዳን፥ ሂንቴ ኣማኑዋን ሂንቴንታ ፆሳይ ሚኒሳናው ዳንዳዬ።

²⁶ ሺን ሃዒ ናባቱ ፃፌዳዋ ባጋና ቱማቴꬃይ ቆንጪያን ኤሬታናዳን ኦꬄዳ፤ ቃሲ ኣሳ ኡባይ ፆሳ ኣማኒዴ ኣዛዜታናዳን፥ ሜꬊና ፆሳ ኣዛዙዋን፥ ሃ ኣላሚያን ዴዒያ ኣሳ ዜሬꬃ ኡባው ቆንጬዳ።

²⁷ ኣꬌዳ ኤራቴꬃይ ኣ ፃላላው ዴዒያ ኢቲ ፆሳው ዬሱሲ ኪሪስቶሳ ባጋና ሜꬊናው ቦንቹ ጊዶ። ኣሜንዒ።

⁸ Godaanna ittippetethaan de7iyaa ta siiqo laggiyaa Amppiliyaatoosaw ta sarotowaa odite.

⁹ Kiristtoosa oosuwaa nuunanna ittippe oothiyaa Urbbaanoosanne taani siiqiyaa Isxxaakusa sarotite.

¹⁰ Kiristtoosanna I de7iyaawe erettina paaciyaa xooneedda Apheliisaw ta sarotowaa odite; Arisxxobiloosa soy asawukka ta sarotowaa odite.

¹¹ Ta dabbo gideedda Ayihudawiyaa Heeroodiyoonanne Kiristtoosa ammaniyaa Narssiisesa soy asaa sarotite.

¹² Godaa oosuwan daaburiyaa Tirufaynanne Tirufooso geetettiyaa maccawantta sarotite; qassi Godaw daro daaburaade oothiyaa siiqiyaa Perssiiso sarotite.

¹³ Godaa oosuwan loythi eretteedda Rufoosayewunne taana bare na7aadan maaddeedda A daayiw ta sarotowaa odite.

¹⁴ Ta sarotowaa Asinkkiriitoosaw, Pileegoonaw, Hermeesaw, Patirobaasawunne unttunttunna de7iyaa ammaniyaa ishatuwaa ubbaw odite.

¹⁵ Pileegoona, Yuulo, Neeriyaa, A michchatto, Olumppoosanne unttunttunna de7iyaa Xoossaa asatuwaa ubbaa sarotite.

¹⁶ Geeshsha asaw bessiyaa yeretaa yerettiidde, ittu ittuwaa sarotite; Kiristtoosan ammaniyaawanttu ubbatuu hinttentta saro yaageeddino.

¹⁷ Taanaadan ammaniyaawanttoo, asaa giddon shaakotethaa medhdhiyaawantta, asaa ammanoo dhubo gidiyaawanttanne hintte tamaareedda timirttiyaanna gakettennawaa tamaarissiyaawantta akeekanaadan, taani hinttentta woossay. Unttunttukko shiiqoppite.

¹⁸ Ayissi gooppe, hewaa malabaa oothiyaawanttu barenttu uluwassi oothiinoppe attin, nu Godaa Yesuusi Kiristtoosaw oothikkino; barenttu labiyaa haasayaaninne qidhiyan iitabaa qoppenna asaa wozanaa balethiino.

¹⁹ Wonggalaw hintte azazetteeddawaa asay ubbay siseedda. Hewaa diraw, taani hintebaan nashettay; shin lo77otethaw hintte aadhdheedda eranchcha gidanaadaaninne qassi iitabaw ashikke gidanaadan koyyay.

²⁰ Sarotethaa Xoossay Seexaanaa hintte gediyaappe garssanna haakkenna mata wode gaaccana. Nu Godaa Yesuusi Kiristtoosa aadho keekatethay hinttenttunna gido.

²¹ Taananna oothiyaa Ximootoose hinttentta saro yaagee; qassi hawaadankka, ta dabbatuu Luuqiyoosi, Yaasooninne Sosiiphaaxiroosi hinttentta saro yaagiino.

²² Taani, Xarxxiyoosi, ha dabidaabbiyaa xaafeeddawe, hinttenttoo Godaa sunthan sarotaa kiittay.

²³ Ammaniyaa asay ubbay A soyin shiiqiyaa ta siiraa Gaayoosi hinttentta saro yaagee; katamaa miishshaa oyqqiyaa Erasxxoosinne nu ishay Quwarxxoosi hinttentta saro yaagiino.

²⁴ Nu Godaa Yesuusi Kiristtoosa aadho keekatethay hinttenttunna ubbaanna gido. Amen77i.

²⁵ Nuuni Xoossaa galateetto. Taani wonggalaa bagganna Yesuusi Kiristtoosabaa odeeddawaadaninne daro wodiyaappe geemmiide, ha77i qoncceedda tumatethaadan, hintte ammanuwan hinttentta Xoossay minissanaw danddayee.

²⁶ Shin ha77i nabatuu xaafeeddawaa bagganna tumatethay qoncciyaan erettannaadan ootheedda; qassi asaa ubbay Xoossaa ammaniide azazettanaadan, medhinaa Xoossaa azazuwan, ha alamiyaan de7iyaa asaa zerethaa ubbaw qoncceedda.

²⁷ Aadhdheedda eratethay A xalalaw de7iyaa itti Xoossaw Yesuusi Kiristtoosa bagganna medhinaw bonchchuu gido. Amen77i.