4 Taho! Ma God te utuni haia, sakai vamua na lei tinoni soko tana maramana eni kara pegopego. Te vagha na Gegere Tabu te bosaa, “Ighoe ko talutategho heghemu to utuni tana hava to bosaa, Mo ko laga vulea tana bona tara detegho.”
5 Hauva mara kokoe bulebule na balu, “Ma ge na paluda tara talutatea gea God te arovighita, na pukuna te talukehai na paluda ke, keri ke, God te mua kaekage ge ke deteghita udolu.”
6 Taho! Te mua utuni na ghanaghana eni! Ge ke vagha keri ke, God ke mua tangomana na deteana na maramana.
7 Mana balu kara hughuhughu bulebule ghua, “Ivei ke ghaghua God ge ke deteu me ke huruu inau, na tinoni tangohahi ke vagha nigua na kabu hahihahi ke tughunitatea nina utuni God ke, me ke vahea na holohaba te sule.”
8 Ge kau kabu taonia na vata ni ghanaghana eni ke, mau bosa te vagha eni, “E uto vaa ka gonighi na lei nilabu dika ge kara tatei na lei totobo uto.” Mana balu tara huruu mara ghaghua, aeni na ghanaghana tu nia tarai. Ma rahei tara bosai na lei totobo raini, te manana sughua God ge ke hera na totoro.
9 ?Ivei tea ighai, na vure Jew, tai uto vaa itadira na lei tinoni soko? Taho! Te vagha na hava tu bosai tua, na lei tinoni soko te vagha kau Jew pa kau mua Jew, ta ghahaghita udolu sarana na maana ni tangohahi.
10 Te vagha na Gegere Tabu te bosaa, “Taho ahei ke maemane,
11 Me taho ahei ke loghoa na puku ni manaha, mana kene taoniana God.
12 Gaira udolu tara ririu keha itatana God, mara taonia na hahi. Taho siki sakai ke gehegehe uto, Taho tua hei.
13 Na kokoedira te mabulu, te vagha na tavughi te tatavanga te uru angiangi, mana bosadira te vonughighi na pego. Tara lavimataghu te vagha na malina na poli, Te horu mai tana ghidudira.
14 Na mangadira te vonughighi na vavaranga mana rutu papara.
15 Mara gonidila haia tua na labu mate tinoni,
16 Ivei tua kara vaa, na haurake mana taghalaghi mana dikalio, ke tumurira.
17 Ma gaira tara mua ghilala ivei kara nea na kabu mabo.
18 Mana nia kikinima God te taho itadira.”
