1 Buta se, Juda kari ko bagara se nungumik guang batoga ko munan mu ko ningo mu anape?
2 Mu ko ningo suen biya! Mel gira nunguningkiri mu, Kaem ko den mu giram nuna nungaram.
3 Se saki Kaem ko den nongorak kaolam mu me diram la karo tuikasan, se ana balnak Kaem mu ko den nongorak kaolam mu betela me karo tuokko e?
4 Mena, mu nu uwuta me bitirukko! Kariimet kawel munan ta betemonko, bare Kaem mu ko den diram la karo tuokko. Batoga bo te balam se aniso uwuta: “Se ni den te aga betesam mu ni diram la betesam, ale aga memek wetang sapasam mu am diram.”
5 Se anananga betera kaora memek umu, Kaem ko munan ningo diram mu wetang te beteso. Se umu ana awuk ko balnakko? Agi ana balnak, Kaem anananga memek umu koma gomang memek te nanga maguwuso mu me terong manak e? Mena! (Ani ana kariimet nanga bala ko iki se balsam, bare mu ana kawelawasan.)
6 Mu uwuta mena! Se ana uwuta balnak mu, Kaem awuk ta kariimet suen la nanga tuterukko?
7 Agi awiriya bo ta baluk, “Aninga munan kawel mu te, Kaem ko munan nunguning mu wetang te nunguningkiri betesam se nu te nup biya taso, bare awuk se Kaem ani kari memek karogo ko am aga baluwoso?”
8 Bare ni buta balsam agi mu, bala ngualara imi am karogo la baluko, “Ario, ana kilek memek memek betenak se ko nunguning mu, Kaem nup biya taukko,” ma baluko. (Kariimet saki ana nagiring guari uwutata kutisan, bare nononga den mu am kawel la.) Nuna nunga bala ngualara mu ko koma memek mu ko eseman, uwutata tamonko.
9 Buta se ana awuk balnakko? Ana balnak ana Juda alo mu terong nuam se sor saki ko mu mena manak e? Mena! Mena nunguningkiri! Ana maingkala ta ikiman, ana Juda ta se sor saki ko kariimet ta, ana suen la memek bowa ningi bagasan.
10 Kaem ko batoga te aniso uwuta: “Bo ta diram nunguning mena, am mena,
11 ale bo ta ikia sinar ago baga se Kaem la kote me loaga lagoso, mena.
12 Nuna suen la Kaem nubiring tui muruwuman ale suen la maga muruwuman. Bo ta munan ningo bo me beteso, am mena biya.”
13 “Nunga nodogotak nuguring mu kuera ko mutim iwita, se nunga nungamili mu den kawel te balsan.” “Nunga nungamili kopa mu urer ko kuating memek kari te nunga moso se kuesan mu iwita.”
14 “Nunga nuguring nusumulak mu kari maguwura ko den ago terong mam.”
15 “Nunga nusuwik nuguting mu kari te momonko tairate pitigiso;
16 nuna aolak ilusan mu mel suen biya maguwu se la namasan;
17 ale nongomang suanta se bagara lila ko ikia mu nongote mena.”
18 “Nuna Kaem ko me nguangasan, am mena.”
19 Ana ikisan, den suen biya Kaem ko batoga te aniso mu kariimet den umu ari ikiman wore nunga atumuwoso. Buta se ana suen la awuk balnakko, mena. Ana ali lilim ko kariimet mu ana suen la Kaem koma te den ago.
