1 Loꞌo ni, nde ñaꞌan yꞌni Ndiose chaꞌ ꞌñaan. Ja nganun ꞌa yuweꞌ ꞌñaan ni, chaꞌ suꞌwa ndiꞌin chaꞌ ꞌñaan loꞌo Jesucristo; ja ka ꞌa ꞌin nu xaꞌan nu nsuꞌwi chalyuu jwakii ꞌñaan ni, chaꞌ Tyiꞌi Ndiose lka ndloo la ꞌñaan bra nu ndiꞌian lo chalyuu.
2 Bra nu lka Tyiꞌi Ndiose ndloo la ꞌñaan, bra kanꞌ kaja chalyuu kwi ꞌñaan chabiyaꞌ ꞌin Jesucristo, chaꞌ suꞌwa ndiꞌin chaꞌ ꞌñaan loꞌo Ni; wa ngulaa Ni ꞌñaan yaꞌ nu xaꞌan nu ngiꞌni chaꞌ kanaꞌ kasiya ꞌñaan.
3 Wa yꞌni Ndiose ska chaꞌ tnun nu ja ngwa ꞌa kuꞌni chaꞌ kula nu ykwiꞌ ayman Moisés loꞌo nten nu ngwa sꞌni. Ja ngwa tñan chaꞌ kula kanꞌ, chunꞌ xaꞌan ꞌaan loꞌo taꞌaan ndiꞌian lo chalyuu; Ndiose ni, ngwa ꞌin Ni kuꞌni chaꞌ tnun kanꞌ, chunꞌ nu msuꞌwa Ni ꞌin Sñiꞌ ykwiꞌ Ni yan Ni lo chalyuu, chaꞌ ngwa Ni nten. Msuꞌwa Ni ꞌin Jesús yan, chaꞌ ngwa yu ska lomstan nu luꞌu; kanꞌ lka lomstan nu ngwa kuꞌni tyii kiꞌya nu ndukwian. Ngwa Jesús nten; ngwa yu sa ñaꞌan lka nchga nten chalyuu, chaꞌ ngwañaꞌan ngwa ꞌin yu kuꞌni tyii yu kiꞌya nu ndukwian taꞌaan nten chalyuu. Kanꞌ chaꞌ ngwa Ni nten.
4 Loꞌo ni, ka ꞌñaan kuꞌnian tñan nu ngulo Ndiose ꞌñaan, ti kwiꞌ tñan nu nduꞌu chaꞌ kula kanꞌ ꞌñaan chaꞌ kuꞌnian; ka kuꞌnian nchga chaꞌ kanꞌ ni, chunꞌ nu ja ka ꞌa ꞌin chaꞌ xaꞌan nu nsuꞌwi chalyuu jwakii ꞌñaan ni; Tyiꞌi Ndiose lka ndloo la ꞌñaan xa nu ndiꞌian lo chalyuu.
5 Bra nu ngiꞌnian sa ñaꞌan nu ngiꞌni nten chalyuu ti, ti kwiꞌ chaꞌ xaꞌan nu nsuꞌwi ꞌin nten kanꞌ, kanꞌ lka ndloo la niꞌ kasiya ꞌñaan bra kanꞌ; loꞌo ni, si Tyiꞌi Ndiose ka ndloo la ꞌñaan xa nu ndiꞌian lo chalyuu, bra kanꞌ ka ꞌñaan kuꞌnian nchga chaꞌ nu nchkwiꞌ Ndiose.
6 Kanaꞌ chalyuu ꞌñaan, si kuꞌnian xkwiꞌ chaꞌ xaꞌan nu nsuꞌwi chalyuu; loꞌo kaja chalyuu kwi ꞌñaan chaꞌ tiin ti tyiꞌian, si kunaan nchga chaꞌ nu nchkwiꞌ Ndiose.
7 Nan nxuan loꞌo Ndiose lka chaꞌ, si ñaꞌan ti ngiꞌnian chaꞌ xaꞌan sa ñaꞌan nu ngiꞌni nten chalyuu ti; ja nchka ꞌñaan kuꞌnian siyaꞌ ti chaꞌ nu nchkwiꞌ Ndiose loꞌoan, si ñaꞌan ti nchka tianꞌ kuꞌnian chaꞌ xaꞌan.
8 Kanꞌ chaꞌ ja ka ꞌñaan kuꞌnian tñan nu nchka tiꞌ Ndiose chaꞌ kuꞌnian, si ndiya la tianꞌ chaꞌ xaꞌan nu nsuꞌwi chalyuu.
9 ꞌWan, siꞌi ngwañaꞌan ndiꞌin wan ni; ja ndiya ꞌa tiꞌ wan chaꞌ xaꞌan nu nsuꞌwi chalyuu. Suꞌwa ndiꞌin chaꞌ ꞌwan loꞌo Ndiose ni, chaꞌ mda Ndiose Tyiꞌi ykwiꞌ Ni chaꞌ kanun niꞌ kasiya ꞌwan. Loꞌo ja ndiꞌin chaꞌ ꞌñaan loꞌo Krixtu siyaꞌ ti si ja ya kanun Tyiꞌi Ndiose niꞌ kasiya ꞌñaan, ti kwiꞌ Tyiꞌi nu mdoꞌo ꞌin Krixtu.
10 Kanꞌ chaꞌ luꞌu wan ni, chunꞌ nu luꞌu Tyiꞌi Ndiose niꞌ kasiya ꞌwan, si chañi chaꞌ ndiꞌin chaꞌ ꞌwan loꞌo Krixtu. Ni siya wa yꞌni chaꞌ xaꞌan nu nsuꞌwi chalyuu chaꞌ kanaꞌ kasiya ꞌwan nu ngwa xkanꞌ, bra wa ni nganun Tyiꞌi Ndiose loꞌo wan bra nu ngwa suꞌwe kasiya ꞌwan loꞌo Ndiose chunꞌ tñan nu yꞌni Jesús.
11 Ti kwiꞌ Tyiꞌi Ndiose lka nu ngulo ꞌin ayman Jesús nde seꞌen ysu yu mtsiꞌ yu, loꞌo yꞌni Ni chaꞌ ndyuꞌu yu xiyaꞌ bra kanꞌ. Kwiꞌ ngwañaꞌan, wa mda Ndiose Tyiꞌi ykwiꞌ Ni chaꞌ kanun niꞌ kasiya ꞌwan, chaꞌ bra nu kaja wan, kanꞌ kuꞌni Ni chaꞌ tyuꞌu wan xiyaꞌ chabiyaꞌ ꞌin Tyiꞌi Ndiose.
12 ꞌWan neꞌ taꞌa ndiꞌin chaꞌ ꞌñaan loꞌo Krixtu, ni ni, ja ndiꞌin ꞌa chaꞌ kuꞌnian nchga chaꞌ xaꞌan nu ngiꞌni nten chalyuu ti.
13 Kanaꞌ kasiya ꞌwan si xkwiꞌ ndaꞌan naan wan chaꞌ xaꞌan xa nu ndiꞌin wan lo chalyuu; chabiyaꞌ ꞌin Tyiꞌi Ndiose, ka kulaa yaꞌ wan chaꞌ xaꞌan nu nsuꞌwi ꞌwan chaꞌ ja kuꞌni ꞌa wan chaꞌ xaꞌan kanꞌ. Kaja chalyuu nu ja tsaa tii ꞌa ꞌwan bra kanꞌ.
14 Taꞌaan, wa lkaan sñiꞌ Ndiose si ngiꞌnian nchga tñan nu ndlo Tyiꞌi Ndiose ꞌñaan.
15 Mda Ndiose Tyiꞌi ykwiꞌ Ni ꞌwan, chaꞌ kuꞌni Tyiꞌi Ni chaꞌ ka wan sñiꞌ Ni; kuꞌni Ni chaꞌ ka chkwianꞌ loꞌo Ndiose: “¡Sti ba!” ngwañaꞌan chkwianꞌ loꞌo Ni. Loꞌo siꞌi chaꞌ xaꞌan kuꞌni Tyiꞌi Ni bra nu kulo Ni tñan ꞌwan, siꞌi nan xitsen Ni ꞌwan sa ñaꞌan nu ytsen wan nu ngwa sꞌni, siꞌi ngwañaꞌan ngiꞌni Tyiꞌi Ni.
16 Chaꞌ nu nsuꞌwi niꞌ kasiya ꞌñaan ni, suꞌwa nka chaꞌ kanꞌ loꞌo chaꞌ nu nchkwiꞌ Tyiꞌi Ni loꞌoan, chaꞌ wa lkaan sñiꞌ Ndiose.
17 Chaꞌ nu lkaan sñiꞌ Ndiose ni, ndiꞌin chaꞌ kaja nchga chaꞌ suꞌwe nu ta Ni ꞌñaan bra kanꞌ, nchga chaꞌ nu wa nda Ni ꞌin Krixtu. Loꞌo ni, si nchka tianꞌ chaꞌ suꞌwa tyiꞌian loꞌo Krixtu nde seꞌen tlyu la seꞌen ndiꞌin Ni, bra kanꞌ ndiꞌin chaꞌ taloan xa nu ta neꞌ nu tiꞌí ꞌñaan lo chalyuu re, ti kwiꞌ ngwañaꞌan ndalo ykwiꞌ Krixtu bra nu mda neꞌ nu tiꞌí ꞌin yu.
18 Ndiya bra ndijian chinꞌ nu tiꞌí bra nu ndiꞌian lo chalyuu; chinꞌ ti chaꞌ lka chaꞌ kanꞌ, loꞌo ja suꞌwa chaꞌ tiꞌí kanꞌ loꞌo chaꞌ suꞌwe nu kaja ꞌñaan nde loo la, nxkeꞌ tiǎnꞌ. Loꞌo ngwañaꞌan, ti ji kwaꞌu Ni nchga chaꞌ ꞌñaan, sa ñaꞌan ka chaꞌ suꞌwe kanꞌ nde loo la.
19 Nchga nan luꞌu nu wa ngwiñan Ndiose lo chalyuu, ndiꞌin ta nan kanꞌ ꞌin Ndiose, sa ñaꞌan bra nu kwaꞌu Ni ꞌin nten chalyuu sa ñaꞌan nten nu chañi chaꞌ lka sñiꞌ Ndiose.
20 Wa mnuꞌun ñaꞌaan chalyuu; nchga lo nan nu nsuꞌwi chalyuu ni, ja lka ran sa ñaꞌan nu ngwa tiꞌ Ndiose chaꞌ ka ran bra nu ngwiñan Ni ꞌin ran. Wa ndukwin Ni chaꞌ ngwañaꞌan ti kanun chalyuu re, ni siya siꞌi ngwañaꞌan ndiya tiꞌ nchga lo nan nu nsuꞌwi chalyuu. Loꞌo ni, ja ndiꞌin chaꞌ kanun chaꞌ ngwañaꞌan tyukwi tyempu,
21 chaꞌ wa tiya ti ska tsan nu tyii nchga chaꞌ kuxi nu ngiꞌni ñuꞌun chalyuu, nchga chaꞌ xaꞌan nu nka ndloo la ꞌñaan. Loꞌo kanꞌ suꞌwe ꞌa ka nchga lo nan nu ngwiñan Ni lo chalyuu, chaꞌ suꞌwa ti kulaa Ni ꞌin nan kanꞌ loꞌo ꞌñaan nu lkaan sñiꞌ Ndiose.
22 Ti ji ka chaꞌ nu tnun kanꞌ; jlyo tianꞌ chaꞌ nsuꞌwi ꞌa chaꞌ tiꞌí, nchga nan nu ngwiñan Ndiose lo chalyuu lye ꞌa ndii tiꞌ ran nu tiꞌí. Sa ñaꞌan nu ndijyan tiꞌí ꞌin ska nu kunaꞌan chaꞌ wa kala ti sñiꞌ, ngwañaꞌan ndiya nu tiꞌí lo chalyuu ni.
23 Kwiꞌ ngwañaꞌan loꞌoan, taꞌaan nu nsuꞌwi Tyiꞌi Ndiose ꞌñaan, nsiꞌyaan ndiꞌian chaꞌ lye ꞌa ndijian nu tiꞌí ni, ni siya wa mda Ndiose Tyiꞌi ykwiꞌ Ni ꞌñaan xa nu ndiꞌian lo chalyuu, ska chaꞌ suꞌwe nu nda Ni ꞌñaan kulo ndukwa la lka Tyiꞌi Ni kanꞌ. Laja bra kanꞌ ndiꞌin taan sa ñaꞌan bra nu tiya tsan tlyu kanꞌ, chaꞌ kulaa ji Ni ꞌñaan, chaꞌ xaꞌan Ni ꞌñaan tyukwi ñaꞌaan bra kanꞌ. Loꞌo kanꞌ ta Ndiose seꞌen tyiꞌian seꞌen ndiꞌin ykwiꞌ Ni, chaꞌ wa lkaan sñiꞌ Ni.
24 Ndyaa ñaꞌan tianꞌ chaꞌ ngulaa Ni ꞌñaan, ni siya ndiꞌin chaꞌ kataan sa ñaꞌan bra tiya tsan tlyu kanꞌ, chaꞌ kuꞌni tyii Ni tñan nu ngiꞌni Ni. Ska nan nu chan ꞌa ndiꞌin taan ni, bra wa naꞌaan chaꞌ mdoꞌo tukwa chaꞌ kanꞌ, ja ndiꞌin chaꞌ ti kataan laan ꞌin ran bra kanꞌ; ja tyiꞌin ta ꞌaan ꞌin ran, chaꞌ wa naꞌaan ꞌin ran bra kanꞌ.
25 Nu chañi chaꞌ ti ndiꞌin taan ꞌin ska chaꞌ, bra kanꞌ ndiꞌin chaꞌ taloan sa ñaꞌan bra ka ran, ni siya ti ji ñaꞌaan ꞌin ran, ni siya chan ꞌa taloan sa ñaꞌan bra nu ñaꞌaan chaꞌ ndyoꞌo tukwa ran.
26 Kanꞌ chaꞌ ndayaꞌ Tyiꞌi Ndiose ꞌñaan, chaꞌ ja nchka ꞌñaan siyaꞌ ti. Ja jlyo ꞌa tianꞌ sa ñaꞌan chaꞌ nu suꞌwe la chkwianꞌ loꞌo Ndiose; Tyiꞌi Ndiose lka nu nduꞌu ꞌñaan sa ñaꞌan chaꞌ nu chkwianꞌ loꞌo Ni. Jlyo tiꞌ Tyiꞌi Ndiose ni siya tnun ꞌa chaꞌ ndaꞌan tiyean, loꞌo ja ndyiji ñaꞌan nu ka chkwianꞌ chaꞌ kanꞌ loꞌo Ni; kanꞌ chaꞌ loꞌo Tyiꞌi Ndiose nchkwiꞌ loꞌo Ndiose Stian chaꞌ ꞌñaan bra kanꞌ.
27 Ndlo Ndiose nchga chaꞌ nsuꞌwi tiye nten. Kwiꞌ ngwañaꞌan, jlyo tiꞌ Ni nchga chaꞌ nu nchka tiꞌ Tyiꞌi Ni chkwiꞌ loꞌo Ni, chaꞌ bra nu njñan nu kanꞌ ska chaꞌ ꞌin Ndiose Stian chaꞌ ꞌñaan, ska ti chaꞌ nchkwiꞌ Tyiꞌi Ni loꞌo nchga chaꞌ nu ndaꞌan chaꞌ tiye Ndiose Stian.
28 Jlyo tianꞌ chaꞌ nda Ndiose chabiyaꞌ sa ñaꞌan ka nchga chaꞌ nu nsuꞌwi chalyuu, chaꞌ ka suꞌwe chalyuu seꞌen ndiꞌian, si nu suꞌwe nka tiyean loꞌo Ni. Wa ngulo suwi Ni ꞌñaan, chaꞌ kaan sa ñaꞌan nu ngwa tiꞌ Ni chaꞌ kaan ti kulo.
29 Ni siya ti la mdyisnan chalyuu, ti bra kanꞌ jlyo tiꞌ Ndiose sa ñaꞌan nten nu xlyaa xñi chaꞌ ꞌin Ni nde loo la. Loꞌo nchka tiꞌ Ni chaꞌ kaan sa ñaꞌan lka Jesús, Sñiꞌ ykwiꞌ Ni, nchka tiꞌ Ni chaꞌ ka Jesús taꞌaan; kaꞌan ꞌa nu lkaan sñiꞌ Ndiose bra kanꞌ, loꞌo ndloo la lka Jesús.
30 Ngwañaꞌan ngwa tiꞌ Ndiose ti kulo la chaꞌ kaan, kanꞌ chaꞌ wa ngulo suwi Ni ꞌñaan. Bra nu wa ngulo suwi Ni ꞌñaan, bra kanꞌ yꞌni Ni chaꞌ ngwa suꞌwe kasiya ꞌñaan loꞌo Ni; bra wa mdyii ngwa suꞌwe kasiya ꞌñaan, bra kanꞌ ta Ni seꞌen tyiꞌian la seꞌen tlyu la seꞌen ndiꞌin Ndiose Sti yu.
31 Xa wa ynaan nchga chaꞌ suꞌwe kanꞌ, bra kanꞌ ka chkwianꞌ chaꞌ ja ndiya ꞌa nu ka xuun loꞌoan, chaꞌ Ndiose lka nu ndiꞌin loꞌoan.
32 Ja mda Ndiose chabiyaꞌ ꞌin Jesús chaꞌ xiꞌin chunꞌ yu ꞌin tñan nu ndiꞌin chaꞌ kuꞌni yu, ni siya ska ti yu lka yu Sñiꞌ Ndiose; msuꞌwa Ni ꞌin yu chaꞌ kaja yu lo wsi chaꞌ ꞌin nchga nan loꞌo ꞌñaan taꞌaan. Wa mda Ni nchga chaꞌ suꞌwe nu ꞌin ykwiꞌ Ni ꞌin Jesús, ti kwiꞌ nu lka ska ti Sñiꞌ Ni. Kwiꞌ ngwañaꞌan, ska ti biyaꞌ ta Ni chaꞌ kanꞌ ꞌñaan, sa ñaꞌan nu mda Ni chaꞌ kanꞌ ꞌin Sñiꞌ Ni.
