Romanos 8:1-32 in Achi

¹ Woʼor ʼut, n-ta chic cʼax chiquij niʼpa i je re i Jesucrísto, niʼpa i n-quiqui ʼan ta chic pacha u rayijbal i qui chʼacul; are, quiqui ʼan u rayijbal u Tewal i Dios chique.

² Yin, ujer, toʼ xwoyʼej i camic, man in ʼo teʼek puʼab i mac atzalal. Woʼor n-in ta chic puʼab i camic, man in ʼelsam chic chupam in mac. I u Tewal i Dios u yom i cʼaslemal chwe, man ʼo chic re i Jesucrísto chwe.

³ I Dios u ʼanom jun utzil chomal chake, chi i ujer ʼatbal tzij n-xtiqui ta chu ʼonquil. Yoj, tupu xketamaj i ʼatbal tzij-le (chi tzʼibtal can rumal i mam Moises), n-xka chʼij tu ʼanic pacha i cu bij. Xui-ri, xoʼon panok, i Dios xu tak li u Cʼojol kuʼ, man cu tojbej re i ka mac. Rucʼam li u chʼacul pacha qui chʼacul i winak chi je ajmaquib; y ruʼ i mísmo u chʼacul-le, xu toj i ka mac. Queje ile, i Dios xresaj u choʼab i mac atzalal pakawi.

⁴ Xoʼon i Dios ile, ʼanbal-re chake chi coj tiqui chu ʼonquil pacha cu bij i ujer ʼatbal tzij. Woʼor n-caka ʼan ta chic pacha u rayijbal i ka chʼacul, are caka ʼan i pacha craj u Tewal i Dios chake.

⁵ Conojel i je re i u Tewal i Dios, quiqui chʼob u ʼonquil wach craj ire. Conojel i ne te re ire, toʼ quiqui chʼob u ʼonquil wach craj i qui chʼacul.

⁶ Niʼpa i toʼ quiqui chʼob wach craj i qui chʼacul, que cam na. Niʼpa i lic quiqui chʼob wach craj u Tewal i Dios, quiqui rik ni qui cʼaslemal, xak quiqui rik u uxlanem qui cʼux chuwach i Dios.

⁷ Queje ile queʼelok, man niʼpa i toʼ quiqui chʼobo wach craj i qui chʼacul, je aj chʼoʼoj ʼuri ruʼ i Dios; n-quiqui ya ta quib chu ʼonquil i u ʼatbal tzij i Dios, xak n-que tiqui ta che.

⁸ Niʼpa i toʼ quiqui ʼan pacha u rayijbal i qui chʼacul, ique-le n-que u maj tu wach i Dios.

⁹ Péro yix n-ix ta queje chic ile we katzij jekel i u Tewal i Dios piwanima; lic qui ʼan ʼuri pacha cu bij ire chiwe. Jun, we n-ti u Tewal i Crísto pa ranima, n-re ta ʼuri i Crísto.

¹⁰ Péro we i Crísto ʼo piwanima, ix cʼas ʼuri rumal. Queje ile queʼelok man i Dios quix rilo ix ʼutz ix chom chuwach. ʼO u cʼaslemal i cʼux, tupu ca cam ni i chʼacul rumal i mac atzalal.

¹¹ I Dios xu cʼunsaj sak chuwach i Jesucrísto are xcamic. We i u Tewal ire jekel piwanima yix, xak queje coʼon che i chʼacul yix are quix camic, cu ya tan chic u cʼaslemal. Queje ile cu ʼan na, ruʼ u Tewal ire chi ʼo piwanima.

¹² Rumal-i, wachalal, ʼo chakakul caka ʼano pacha craj i u Tewal i Dios. N-are ti caka ʼano pacha craj u rayijbal i ka chʼacul chi n-ʼus taj.

¹³ We qui ʼano toʼ pacha u rayijbal i chʼacul, quix cam na ʼuri rumal. Xui-ri, we qui ya che i u Tewal i Dios, quix u to chu chupic i mal laj tak rayijbal re i chʼacul, quix cʼasi na ʼuri.

¹⁴ Conojel i je ucʼam rumal u Tewal i Dios, je racʼal ʼuri i Dios.

¹⁵ I u Tewal i Dios chi ʼo chic iwuʼ, n-quix u ya ta chic puʼab i xibriquil, xui-ri, lic cu cowirsaj u cubibal i cʼux che i Kajwal. Rumal i u Tewal-le, ix racʼal chic i Dios; xak ʼo u cowil ka cʼux caka bij “ka Kajaw” che i Dios.

¹⁶ Xak i u Tewal i Dios cu bij pa ka cʼux chi lic oj racʼal i Dios.

¹⁷ Rumal oj racʼal chic i Dios, ire cu ya ni u qʼuial tak utzil chomal chake pacha u bim canok, man oj ralcʼwalxel junam ruʼ i Jesucrísto. Queje ile cu ʼan na chake we caka tij uyej junam ruʼ i Crísto woʼor; coʼon panok xak cocsax ni ka ʼij junam ruʼ ire.

¹⁸ Bay, cwil yin, i uyej chi caka tij woʼor lic n-tu nimal chuwach i chomal chi ca yaʼ na chake coʼon panok.

¹⁹ Man i caj, i jyub taʼaj, ronojel niʼpa ʼo chuwach, lic craj chic rilic i ʼij are ca ʼalijinsax na, je pachin i je racʼal chic i Dios.

²⁰ Ujer, i u wach i jyub taʼaj lic ʼutz teʼek, lic chom, xui-ri, i Dios xu cʼokoj. N-utuquel ti u wach i jyub taʼaj xu tzucuj u cʼokbal; are i Dios xajwanic. Xui-ri, u chʼobom chi cu yijba tan chic.

²¹ Cu rik ni ʼij chi coʼon tan chic ʼutz. I Dios coʼon na che i jyub taʼaj pacha coʼon na chique i racʼal. Coʼon panok, ique que ʼelsax na chupam i cʼax; xak queje i caj, i jyub taʼaj, que ʼelsax na chupam i cʼax.

²² Ketaʼam chi niʼpa tak i u yijbam i Dios, que tijin chi rilic i cʼax pacha coʼon jun ixok are calax jun racʼal: ca jilawic, cu tij ni cʼax cʼa are na, we xutziric. Queje ile ca tijin i jyub taʼaj chu ʼanic.

²³ Y n-xui ti i jyub taʼaj, xak queje yoj oj ʼo pa cʼax tupu i u Tewal i Dios ʼo chic kuʼ; ire-le are i nabe u sipon i Dios chake; xui-ri cʼo i cu ya chake coʼon panok. Lic coj jilawic, tzʼakat cakoyʼej ni ʼij chi Dios cu ʼalijinsaj chi oj racʼal. Lic cakoyʼej ni ka chʼacul cʼacʼ chi n-cril ta chic i cʼax, xak n-ca cam ta chic.

²⁴ Are xka cuba ka cʼux che i Jesucrísto, ketaʼam chi xak ʼo i cu ya chake coʼon panok. Jun, we ʼo chic puʼab wach i royʼem, ¿wuchac ʼuri croyʼej mas? We ʼo chic ruʼ wach i royʼem, n-ta chic u chac croyʼej.

²⁵ Xui-ri we cul ka cʼux che chi cakil u wach niʼpa tak i koyʼem, ʼo u chac ʼuri ma baʼcrij ka cʼux chi royʼexic.

²⁶ Xak i u Tewal i Dios coj u to, man yoj n-ta kas ka noʼoj chu tzʼonoxic wach tak i rajwaxic chake. Xui-ri, i mísmo u Tewal cu ʼalijinsaj che i Ta pa ka qʼuexel, niʼpa i n-coj tiqui ti yoj chu bixquil.

²⁷ I Ta chicaj lic retaʼam wach caka chʼob pa ka cʼux, cu ta ʼuri wach craj i u Tewal che, man niʼpa i cu tzʼonoj i u Tewal pakawi, xak are craj i Dios. Queje ile coʼon chique i je re ire.

²⁸ Ketaʼam iri: conojel i cʼax quiqui na i Dios, niʼpa tak i ca pe piquiwi, ʼis ʼutz queʼel chique rumal i Dios. Queje ile queʼel chique niʼpa i je sicʼtal rumal i Dios, chi xe u cha pacha u chʼobom ire.

²⁹ I Dios ʼax retaʼam wi lok chu xebal, pachin que ajwan qui siqʼuixic ruʼ. Ire xe u cha, man queʼelok lic je queje pacha i Crísto chi u Cʼojol. Craj ire chi u Cʼojol queʼelok chi are i ʼatz chique u qʼuial rachalal.

³⁰ I Dios, conojel niʼpa i xe u cha, chi que ʼel na chi sak, xak xe u siqʼuij ruʼ. Niʼpa i xe u siqʼuij ruʼ, xak xe u yijba chi je ʼutz chuwach. Xak niʼpa i xe u yijba chi je ʼutz chuwach, xu ya chique chi ʼo qui ʼij ruʼ.

³¹ ¿Wach chic mas caka bij ʼut? We i Dios coj rucʼaj, ¿pachin ca tiqui ʼuri chake? Mi jun.

³² I Dios xu jach u Cʼojol ire chi ca camsaxic, tobal-ke yoj konojel; tupu lic cʼax xu naʼo, xu ya na chake. We queje ile xu ʼano, ¿xataba n-cu ya ta ʼuri chake ronojel wach i rajwaxic chake? Cu yaʼo pues.

¹ Ekꞌu woꞌora na jinta chi qꞌatbꞌal tzij re kamik pakiwi janipa ri e kꞌo puqꞌabꞌ ri Qanimajawal Jesucristo; waꞌ e ri na kitaqem ta chi ri rayibꞌal re ri na utz taj, ma e kitaqem saꞌ ri karaj ri Ruxlabꞌixel ri Dios chike.

² Ma ri Ruxlabꞌixel ri Dios kuya chomilaj kꞌaslemal ruma ri Qanimajawal Jesucristo, y e rutaqanik ri Ruxlabꞌixel ri Dios pa qanimaꞌ ri xojesan lo chupa ruchuqꞌabꞌ ri mak y ri kamik.

³ Yey rutaqanik ri Tzij Pixabꞌ na jinta uchuqꞌabꞌ re kojresaj lo puqꞌabꞌ ri mak, ma riꞌoj oj tikawex na jinta qakowil chwa ri mak. Ekꞌu ri na xuchꞌij ta uꞌanik ri Tzij Pixabꞌ, ri Dios xuꞌano echiriꞌ xutaq lo Rukꞌajol che ruwachulew tojbꞌal re ri qamak, y xuꞌan tikawex che jelaꞌ pachaꞌ riꞌoj, noꞌj Rire na xmakun taj. Jekꞌulaꞌ, ruma rukamik jun tikawex, waꞌ e ri Jesús, ri Dios xuqꞌat tzij puwi ri qamak.

⁴ Xuꞌan kꞌu waꞌ chaꞌ utz kojbꞌin jusukꞌ chwach ri Dios jelaꞌ pachaꞌ ri kubꞌiꞌij ri Tzij Pixabꞌ; ma riꞌoj na e ta chi qataqem ri rayibꞌal re ri na utz taj, e qataqem saꞌ ri karaj ri Ruxlabꞌixel ri Dios chiqe.

⁵ Ma e taq ri kiyaꞌom kibꞌ che taq ri rayibꞌal re ri kitiꞌjil, e kakiya kinaꞌoj puwi ri rayibꞌal na chom taj. Noꞌj janipa ri kiyaꞌom kibꞌ puqꞌabꞌ ri Ruxlabꞌixel ri Dios, riꞌ e kiyaꞌom kinaꞌoj puwi janipa ri karaj ri Ruxlabꞌixel ri Dios.

⁶ Ma we e lik kaqaya qanaꞌoj puwi taq ri rayibꞌal re ri qatiꞌjil, riꞌ kamik ri kukꞌam lo chiqe. Noꞌj we e lik kaqaya qanaꞌoj puwi janipa ri karaj ri Ruxlabꞌixel ri Dios chiqe, riꞌ kukꞌam lo kꞌaslemal y utzil chomal chiqe.

⁷ E janipa ri kiyaꞌom kinaꞌoj xew puwi taq ri rayibꞌal re ri kitiꞌjil, riꞌ e aj retzelal kꞌuꞌx chirij ri Dios. Ma rike na kakaj taj kakiya kibꞌ che uꞌanik ri Tzij Pixabꞌ re ri Dios, yey na kakichꞌij tane uꞌanik waꞌ.

⁸ Ekꞌu ri Dios lik na kukꞌul ta ukꞌuꞌx ri kibꞌinik kisilabꞌik janipa ri kiyaꞌom kibꞌ chupa ri rayibꞌal re ri na utz taj.

⁹ Noꞌj ralaq na yaꞌom ta chi ibꞌ alaq chupa waꞌ wa rayibꞌal, ma e yaꞌom ibꞌ alaq puqꞌabꞌ ri Ruxlabꞌixel ri Dios, we paqatzij wi kꞌo Rire pa animaꞌ alaq. Yey we kꞌo kꞌu junoq na jinta ri Ruxlabꞌixel ri Cristo pa ranimaꞌ, waꞌ wa tikawex na re ta ri Cristo.

¹⁰ Noꞌj we kꞌo ri Cristo pa animaꞌ alaq, riꞌ kꞌo chomilaj kꞌaslemal alaq ruma ri uꞌanom alaq jusukꞌ chwach ri Dios, tobꞌ ri cuerpo alaq kakam na ruma ri mak.

¹¹ We kꞌo kꞌu pa animaꞌ alaq ri Ruxlabꞌixel ri Jun xukꞌastajisaj lo ri Qanimajawal Jesucristo chikixoꞌl ri ekaminaq, riꞌ kꞌo jun qꞌij Rire kuya jun kꞌakꞌ kꞌaslemal che ri cuerpo alaq yey kuꞌan waꞌ ruma ri Ruxlabꞌixel kꞌo pa animaꞌ alaq.

¹² Ruma kꞌu laꞌ, hermanos, chirajawaxik e kaqaꞌan ri utz y maqaꞌan ri na utz taj, ma riꞌoj na oj jinta chi puqꞌabꞌ taq ri rayibꞌal re ri qatiꞌjil.

¹³ Ma we yaꞌom ibꞌ alaq chupa waꞌ, riꞌ e kukꞌam lo ri kamik pawiꞌ alaq. Noꞌj we rukꞌ rutoꞌbꞌal ri Ruxlabꞌixel ri Dios kakamisaj alaq taq ri rayibꞌal re ri tiꞌjil alaq, riꞌ kꞌo kꞌaslemal alaq chwach ri Dios.

¹⁴ Ma konoje ri kakꞌam kiwach ruma ri Ruxlabꞌixel ri Dios, riꞌ e ralkꞌoꞌal ri Dios.

¹⁵ Yey ri Ruxlabꞌixel ri Dios xkꞌul alaq, na e ta kuya tanchi alaq chi xiꞌin ibꞌ; ma e kuꞌan ralkꞌoꞌal ri Dios che alaq, y jelaꞌ utz kaqabꞌiꞌij che ri Dios: «¡Tat, Lal Nuqaw!»

¹⁶ Ekꞌu ri Ruxlabꞌixel ri Dios ri kajikibꞌan uwach pa qanimaꞌ: Riꞌoj oj chi ralkꞌoꞌal ri Dios.

¹⁷ Yey ruma kꞌu oj ralkꞌoꞌal ri Dios, kaqakꞌul ri bꞌiꞌtisinik uꞌanom ri Dios chike ri ralkꞌoꞌal, yey kaqakꞌul kꞌu waꞌ junam rukꞌ ri Cristo. Pero lik chirajawaxik wi kaqatij na kꞌax woꞌora pachaꞌ ri xikꞌow wi Rire, chaꞌ jelaꞌ chiqawach apanoq, oj jun pa ri yakbꞌal uqꞌij Rire.

¹⁸ Yey chinuwach riꞌin ri kꞌaxkꞌobꞌik kaqatij riꞌoj woꞌora na kuꞌmaja ta kꞌenoq rukꞌ runimal uchomalil ri Dios, ri kaqꞌalajin qukꞌ chiqawach apanoq.

¹⁹ Ma e janipa taq ri ꞌanatal ruma ri Dios lik royeꞌem chik jampalaꞌ kaqꞌalajin kiwach ri e ralkꞌoꞌal ri Dios.

²⁰ Ma ri qꞌatbꞌal tzij xuꞌan ri Dios pakiwi ri tikawex, xtzaq ne puwi taq ri ꞌanatal ruma ri Dios. Y ruma kꞌu riꞌ, na e ta chi uꞌanom pachaꞌ ri uchꞌobꞌom lo ri Dios che ri jeqebꞌal loq. E taq kꞌu ri ꞌanatal ruma ri Dios na xraj taj kayaꞌiꞌ chuxeꞌ wa qꞌatbꞌal tzij; na rukꞌ ta kꞌu riꞌ, e ri Dios xuya chuxeꞌ waꞌ. Pero e janipa taq ri ꞌanatal ruma ri Dios, kꞌa royeꞌem ri qꞌij echiriꞌ ri Dios kuyijbꞌaꞌ na ronoje waꞌ.

²¹ Ma kopon na jun qꞌij e janipa taq ri ꞌanatal ruma ri Dios, e laꞌ junam kukꞌ ri e ralkꞌoꞌal ri Dios, kebꞌesax na lo chupa ri kꞌaxkꞌobꞌik y puqꞌabꞌ ri kamik yey kayaꞌiꞌ kꞌu unimal chomalil chike.

²² Qetaꞌam kꞌut, e janipa ri ꞌanatal ruma ri Dios, e pachaꞌ kajilow pa kꞌaxkꞌobꞌik, jelaꞌ pachaꞌ kuꞌan juna ixoq echiriꞌ kutzir uwach rukꞌ uchꞌutiꞌn.

²³ Y na xew ta kꞌo pa kꞌax janipa ri ꞌanatal ruma ri Dios, ma jelaꞌ koj-jilow pa kꞌax qonoje riꞌoj, ri yaꞌtal chi chiqe ri nabꞌe sipanik ubꞌiꞌtisim ri Dios, waꞌ e ri Ruxlabꞌixel ri Dios pa qanimaꞌ. Yey lik kꞌa kꞌo ne ri qoyeꞌem. E lik kaqarayij kopon ri qꞌij echiriꞌ ri Dios kuqꞌalajisaj qawach oj ralkꞌoꞌal Rire y karesaj kꞌu ri qacuerpo puqꞌabꞌ ri kꞌax y ri kamik.

²⁴ Ma echiriꞌ xojkolobꞌetajik, xujeq kakubꞌiꞌ pana qakꞌuꞌx che kaqakꞌul na ri bꞌiꞌtisim lo chiqe ruma ri Dios y kꞌa qoyeꞌem waꞌ. Yey we kaqabꞌiꞌij kꞌo qoyeꞌem, e keꞌelawi riꞌ kꞌamajaꞌ kaqakꞌul ri qoyeꞌem. Ma we jun ukꞌulum chi ri royeꞌem, ¿suꞌchak kꞌu riꞌ kꞌa karoyꞌej?

²⁵ Noꞌj we riꞌoj kaqoyꞌej na ri kꞌamajaꞌ kaqilo, lik chirajawaxik kꞌu riꞌ kaqachuqꞌubꞌej qibꞌ che royꞌexik waꞌ rukꞌ kubꞌulibꞌal qakꞌuꞌx.

²⁶ Jekꞌulaꞌ, ri Ruxlabꞌixel ri Dios kojutoꞌo echiriꞌ na jinta qakowil, ma riꞌoj na kaqariq ta utzꞌonoxik saꞌ ri kajawax che ri qakꞌaslem; pero Rire lik kachꞌaw paqawiꞌ chwach ri Dios rukꞌ jilowem na kariqitaj ta kꞌana ubꞌiꞌxikil.

²⁷ Ekꞌu ri Dios, ri karil ronoje ri kꞌo pa qanimaꞌ, Rire lik kumaj usukꞌ saꞌ ri karaj ri Ruxlabꞌixel, ma ri Ruxlabꞌixel kachꞌaw paqawiꞌ e chirij ri karaj ri Dios chiqe riꞌoj ri oj re ri Dios.

²⁸ Qetaꞌam kꞌut, janipa ri kꞌax kenaꞌw re ri Dios, e taq ronoje ri kebꞌikꞌow chupa katoꞌbꞌik chaꞌ kꞌo kutiqoj chike, waꞌ e chike janipa ri esikꞌim ruma ri Dios re kakiꞌan ri karaj Rire.

²⁹ Ma ri Dios ojertan lo riꞌ xuchꞌobꞌo e kꞌo ri kebꞌuchaꞌo re kebꞌuꞌana pachaꞌ Rukꞌajol, chaꞌ e Rire ri nabꞌe chikixoꞌl rukꞌiyal e ralkꞌoꞌal ri Dios.

³⁰ Yey taq waꞌ wa kꞌo uchꞌobꞌom lo pakiwiꞌ, xebꞌusikꞌij kꞌu riꞌ. Ekꞌu wa xebꞌusikꞌij, xuꞌan jusukꞌ chike. Yey ri xuꞌan jusukꞌ chike, e xutakꞌabꞌaꞌ uwa kiqꞌij.

³¹ ¿Saꞌ kꞌu riꞌ ri kaqabꞌiꞌij che waꞌ? We ri Dios kꞌo qukꞌ, ¿china ri kꞌo puqꞌabꞌ kuyak ribꞌ chiqij? ¡Na jinta junoq!

³² Yey ri Dios na xuxuꞌyaj tane Rukꞌajol chiqe, ma xuya loq chaꞌ koꞌlkam che ruwachulew quma qonoje ri oj aj mak. ¿Na kuya ta kami riꞌ chiqe junam rukꞌ Rukꞌajol, ronoje ri kajawax chiqe? ¡Kuyaꞌo!

¹ Ecꞌu woꞌora na jinta chi kꞌatbal tzij re camic paquiwi janipa ri e cꞌo pukꞌab ri Kanimajawal Jesucristo; waꞌ e ri na quitakem ta chi ri rayibal re ri na utz taj, ma e quitakem saꞌ ri caraj ri Ruxlabixel ri Dios chique.

² Ma ri Ruxlabixel ri Dios cuya chomilaj cꞌaslemal ruma ri Kanimajawal Jesucristo, y e rutakanic ri Ruxlabixel ri Dios pa kanimaꞌ ri xojesan lo chupa ruchukꞌab ri mac y ri camic.

³ Yey rutakanic ri Tzij Pixab na jinta uchukꞌab re cojresaj lo pukꞌab ri mac, ma riꞌoj oj ticawex na jinta kacowil chwa ri mac. Ecꞌu ri na xuchꞌij ta uꞌanic ri Tzij Pixab, ri Dios xuꞌano echiriꞌ xutak lo Rucꞌajol che ruwachulew tojbal re ri kamac, y xuꞌan ticawex che jelaꞌ pachaꞌ riꞌoj, noꞌj Rire na xmacun taj. Jecꞌulaꞌ, ruma rucamic jun ticawex, waꞌ e ri Jesús, ri Dios xukꞌat tzij puwi ri kamac.

⁴ Xuꞌan cꞌu waꞌ chaꞌ utz cojbin jusucꞌ chwach ri Dios jelaꞌ pachaꞌ ri cubiꞌij ri Tzij Pixab; ma riꞌoj na e ta chi katakem ri rayibal re ri na utz taj, e katakem saꞌ ri caraj ri Ruxlabixel ri Dios chike.

⁵ Ma e tak ri quiyaꞌom quib che tak ri rayibal re ri quitiꞌjil, e caquiya quinaꞌoj puwi ri rayibal na chom taj. Noꞌj janipa ri quiyaꞌom quib pukꞌab ri Ruxlabixel ri Dios, riꞌ e quiyaꞌom quinaꞌoj puwi janipa ri caraj ri Ruxlabixel ri Dios.

⁶ Ma we e lic cakaya kanaꞌoj puwi tak ri rayibal re ri katiꞌjil, riꞌ camic ri cucꞌam lo chike. Noꞌj we e lic cakaya kanaꞌoj puwi janipa ri caraj ri Ruxlabixel ri Dios chike, riꞌ cucꞌam lo cꞌaslemal y utzil chomal chike.

⁷ E janipa ri quiyaꞌom quinaꞌoj xew puwi tak ri rayibal re ri quitiꞌjil, riꞌ e aj retzelal cꞌuꞌx chirij ri Dios. Ma rique na cacaj taj caquiya quib che uꞌanic ri Tzij Pixab re ri Dios, yey na caquichꞌij tane uꞌanic waꞌ.

⁸ Ecꞌu ri Dios lic na cucꞌul ta ucꞌuꞌx ri quibinic quisilabic janipa ri quiyaꞌom quib chupa ri rayibal re ri na utz taj.

⁹ Noꞌj ralak na yaꞌom ta chi ib alak chupa waꞌ wa rayibal, ma e yaꞌom ib alak pukꞌab ri Ruxlabixel ri Dios, we pakatzij wi cꞌo Rire pa animaꞌ alak. Yey we cꞌo cꞌu junok na jinta ri Ruxlabixel ri Cristo pa ranimaꞌ, waꞌ wa ticawex na re ta ri Cristo.

¹⁰ Noꞌj we cꞌo ri Cristo pa animaꞌ alak, riꞌ cꞌo chomilaj cꞌaslemal alak ruma ri uꞌanom alak jusucꞌ chwach ri Dios, tob ri cuerpo alak cacam na ruma ri mac.

¹¹ We cꞌo cꞌu pa animaꞌ alak ri Ruxlabixel ri Jun xucꞌastajisaj lo ri Kanimajawal Jesucristo chiquixoꞌl ri ecaminak, riꞌ cꞌo jun kꞌij Rire cuya jun cꞌacꞌ cꞌaslemal che ri cuerpo alak yey cuꞌan waꞌ ruma ri Ruxlabixel cꞌo pa animaꞌ alak.

¹² Ruma cꞌu laꞌ, hermanos, chirajawaxic e cakaꞌan ri utz y makaꞌan ri na utz taj, ma riꞌoj na oj jinta chi pukꞌab tak ri rayibal re ri katiꞌjil.

¹³ Ma we yaꞌom ib alak chupa waꞌ, riꞌ e cucꞌam lo ri camic pawiꞌ alak. Noꞌj we rucꞌ rutoꞌbal ri Ruxlabixel ri Dios cacamisaj alak tak ri rayibal re ri tiꞌjil alak, riꞌ cꞌo cꞌaslemal alak chwach ri Dios.

¹⁴ Ma conoje ri cacꞌam quiwach ruma ri Ruxlabixel ri Dios, riꞌ e ralcꞌoꞌal ri Dios.

¹⁵ Yey ri Ruxlabixel ri Dios xcꞌul alak, na e ta cuya tanchi alak chi xiꞌin ib; ma e cuꞌan ralcꞌoꞌal ri Dios che alak, y jelaꞌ utz cakabiꞌij che ri Dios: «¡Tat, Lal Nukaw!»

¹⁶ Ecꞌu ri Ruxlabixel ri Dios ri cajiquiban uwach pa kanimaꞌ: Riꞌoj oj chi ralcꞌoꞌal ri Dios.

¹⁷ Yey ruma cꞌu oj ralcꞌoꞌal ri Dios, cakacꞌul ri biꞌtisinic uꞌanom ri Dios chique ri ralcꞌoꞌal, yey cakacꞌul cꞌu waꞌ junam rucꞌ ri Cristo. Pero lic chirajawaxic wi cakatij na cꞌax woꞌora pachaꞌ ri xicꞌow wi Rire, chaꞌ jelaꞌ chikawach apanok, oj jun pa ri yacbal ukꞌij Rire.

¹⁸ Yey chinuwach riꞌin ri cꞌaxcꞌobic cakatij riꞌoj woꞌora na cuꞌmaja ta qꞌuenok rucꞌ runimal uchomalil ri Dios, ri cakꞌalajin kucꞌ chikawach apanok.

¹⁹ Ma e janipa tak ri ꞌanatal ruma ri Dios lic royeꞌem chic jampalaꞌ cakꞌalajin quiwach ri e ralcꞌoꞌal ri Dios.

²⁰ Ma ri kꞌatbal tzij xuꞌan ri Dios paquiwi ri ticawex, xtzak ne puwi tak ri ꞌanatal ruma ri Dios. Y ruma cꞌu riꞌ, na e ta chi uꞌanom pachaꞌ ri uchꞌobom lo ri Dios che ri jekebal lok. E tak cꞌu ri ꞌanatal ruma ri Dios na xraj taj cayaꞌiꞌ chuxeꞌ wa kꞌatbal tzij; na rucꞌ ta cꞌu riꞌ, e ri Dios xuya chuxeꞌ waꞌ. Pero e janipa tak ri ꞌanatal ruma ri Dios, cꞌa royeꞌem ri kꞌij echiriꞌ ri Dios cuyijbaꞌ na ronoje waꞌ.

²¹ Ma copon na jun kꞌij e janipa tak ri ꞌanatal ruma ri Dios, e laꞌ junam cucꞌ ri e ralcꞌoꞌal ri Dios, quebesax na lo chupa ri cꞌaxcꞌobic y pukꞌab ri camic yey cayaꞌiꞌ cꞌu unimal chomalil chique.

²² Ketaꞌam cꞌut, e janipa ri ꞌanatal ruma ri Dios, e pachaꞌ cajilow pa cꞌaxcꞌobic, jelaꞌ pachaꞌ cuꞌan juna ixok echiriꞌ cutzir uwach rucꞌ uchꞌutiꞌn.

²³ Y na xew ta cꞌo pa cꞌax janipa ri ꞌanatal ruma ri Dios, ma jelaꞌ coj-jilow pa cꞌax konoje riꞌoj, ri yaꞌtal chi chike ri nabe sipanic ubiꞌtisim ri Dios, waꞌ e ri Ruxlabixel ri Dios pa kanimaꞌ. Yey lic cꞌa cꞌo ne ri koyeꞌem. E lic cakarayij copon ri kꞌij echiriꞌ ri Dios cukꞌalajisaj kawach oj ralcꞌoꞌal Rire y caresaj cꞌu ri kacuerpo pukꞌab ri cꞌax y ri camic.

²⁴ Ma echiriꞌ xojcolobetajic, xujek cacubiꞌ pana kacꞌuꞌx che cakacꞌul na ri biꞌtisim lo chike ruma ri Dios y cꞌa koyeꞌem waꞌ. Yey we cakabiꞌij cꞌo koyeꞌem, e queꞌelawi riꞌ cꞌamajaꞌ cakacꞌul ri koyeꞌem. Ma we jun ucꞌulum chi ri royeꞌem, ¿suꞌchac cꞌu riꞌ cꞌa caroyꞌej?

²⁵ Noꞌj we riꞌoj cakoyꞌej na ri cꞌamajaꞌ cakilo, lic chirajawaxic cꞌu riꞌ cakachukꞌubej kib che royꞌexic waꞌ rucꞌ cubulibal kacꞌuꞌx.

²⁶ Jecꞌulaꞌ, ri Ruxlabixel ri Dios cojutoꞌo echiriꞌ na jinta kacowil, ma riꞌoj na cakarik ta utzꞌonoxic saꞌ ri cajawax che ri kacꞌaslem; pero Rire lic cachꞌaw pakawiꞌ chwach ri Dios rucꞌ jilowem na carikitaj ta cꞌana ubiꞌxiquil.

²⁷ Ecꞌu ri Dios, ri caril ronoje ri cꞌo pa kanimaꞌ, Rire lic cumaj usucꞌ saꞌ ri caraj ri Ruxlabixel, ma ri Ruxlabixel cachꞌaw pakawiꞌ e chirij ri caraj ri Dios chike riꞌoj ri oj re ri Dios.

²⁸ Ketaꞌam cꞌut, janipa ri cꞌax quenaꞌw re ri Dios, e tak ronoje ri quebicꞌow chupa catoꞌbic chaꞌ cꞌo cutikoj chique, waꞌ e chique janipa ri esiqꞌuim ruma ri Dios re caquiꞌan ri caraj Rire.

²⁹ Ma ri Dios ojertan lo riꞌ xuchꞌobo e cꞌo ri quebuchaꞌo re quebuꞌana pachaꞌ Rucꞌajol, chaꞌ e Rire ri nabe chiquixoꞌl ruqꞌuiyal e ralcꞌoꞌal ri Dios.

³⁰ Yey tak waꞌ wa cꞌo uchꞌobom lo paquiwiꞌ, xebusiqꞌuij cꞌu riꞌ. Ecꞌu wa xebusiqꞌuij, xuꞌan jusucꞌ chique. Yey ri xuꞌan jusucꞌ chique, e xutacꞌabaꞌ uwa quikꞌij.

³¹ ¿Saꞌ cꞌu riꞌ ri cakabiꞌij che waꞌ? We ri Dios cꞌo kucꞌ, ¿china ri cꞌo pukꞌab cuyac rib chikij? ¡Na jinta junok!

³² Yey ri Dios na xuxuꞌyaj tane Rucꞌajol chike, ma xuya lok chaꞌ coꞌlcam che ruwachulew kuma konoje ri oj aj mac. ¿Na cuya ta cami riꞌ chike junam rucꞌ Rucꞌajol, ronoje ri cajawax chike? ¡Cuyaꞌo!