Romanos 7:16-25 in Achi

¹⁶ Bay, wach quin tijin chu ʼanic, we cu na in cʼux chi n-ʼus ti quin ʼano, cu bij ʼuri in cʼux chi ʼutz wach i cu bij i ʼatbal tzij.

¹⁷ Rumal-i, n-kas ti yin quin ʼanaw i n-ʼus taj, xa are i mac atzalal ʼo pin cʼux are i ca ʼanaw chwe.

¹⁸ Yin wetaʼam chi yin, chi walaxic lok, n-ta ʼutz chwe. Cwaj yin quin ʼan i ʼutz, péro n-quin tiqui ta che.

¹⁹ Cwaj quin ʼan i ʼutz, y n-quin ʼan taj; are i n-ʼus taj chi n-cwaj taj, are i quin ʼano.

²⁰ Bay, are quin ʼan i mac-le chi n-cwaj taj, n-kas ti yin ʼuri quin ʼanawic. Xa are i mac atzalal ʼo pin nojbal are i ca ʼanawic.

²¹ Are i ca tijin chu ʼanic chwe are iri: are cwaj quin ʼan i ʼutz, quin na u be chi xui i mal ʼo pin nojbal.

²² Pin cʼux yin, lic cwaj u ʼatbal tzij i Dios;

²³ xui-ri, quin na u be chi ʼo pin chʼacul chi ca ʼatiwic wach i craj in cʼux, ile are i u choʼab i mac atzalal; y in ximtal rumal.

²⁴ Toʼ in wach yin. I u rayijbal in chʼacul toʼ cu petsaj ni camic pinwi. ¿Pachin quin tow ruʼ?

²⁵ Xui i Dios quin u to ruʼ, rumal i Kajwal Jesucrísto, ¡cʼamori che i Dios! Woʼor quin ta u be chi in cʼux cu coj u ʼij i ʼatbal tzij re i Dios, péro in chʼacul cu ya rib puʼab i mac atzalal.

¹⁶ Yey echiriꞌ e kanꞌan ri na kuaj taj, kannaꞌ kꞌu riꞌ chinukꞌuꞌx na utz ta ri kintajin che uꞌanik. Rukꞌ kꞌu riꞌ waꞌ kanjikibꞌaꞌ uwach lik utz ri taqanik re ri Tzij Pixabꞌ.

¹⁷ Jelaꞌ kꞌu riꞌ e pachaꞌ na in ta ri kinꞌanaw re ri na utz taj, ma e kataqan ri mak pa wanimaꞌ.

¹⁸ Riꞌin lik wetaꞌam, wa in tikawex na jinta kꞌana utz chwe we na jinta ri Dios wukꞌ. Ma tobꞌ kuaj kanꞌan ri utz, pero nutukel na kanriq ta uꞌanik waꞌ.

¹⁹ Ma na kanꞌan ta ri utz, ri lik kuaj kanꞌano; e lik kanꞌan ri na utz taj, ri na kuaj taj kanꞌano.

²⁰ Jekꞌulaꞌ riꞌ, we e kanꞌan ri na kuaj taj, riꞌ na in ta ri kinꞌanaw re, ma e ri mak kataqan pa wanimaꞌ ri kaꞌanaw re.

²¹ Jekꞌulaꞌ tobꞌ lik kuaj kanꞌan ri utz, e ri na utz taj ri kataqan panuwiꞌ.

²² Na rukꞌ ta kꞌu riꞌ, kunaꞌ ri wanimaꞌ e lik chom rutaqanik Rutzij Upixabꞌ ri Dios y lik kinkiꞌkot che waꞌ.

²³ Pero kannaꞌo kꞌo jun chik tzij kataqan chwi ri nucuerpo; waꞌ e ruchuqꞌabꞌ ri mak. Ekꞌu waꞌ kachꞌoꞌjinik chaꞌ na kankoj ta utzij ri kubꞌiꞌij ri nunaꞌoj y jekꞌulaꞌ inyututal pa mak.

²⁴ ¡Lik toqꞌoꞌ nuwach riꞌin! ¿China kesan we riꞌin puqꞌabꞌ ri na utz taj kꞌo chwe, ri kinkꞌamaw bꞌi pa kamik?

²⁵ Lik kantioxij che ri Dios, ma xew Rire katoꞌw weꞌin, yey kuꞌan waꞌ ruma ri Jesucristo, ri Qanimajawal. Jekꞌulaꞌ kanmaj usukꞌ lik chirajawaxik kanya wibꞌ puqꞌabꞌ rutaqanik Rutzij Upixabꞌ ri Dios; noꞌj echiriꞌ kanya wibꞌ puqꞌabꞌ ri rayinik re ri nucuerpo, riꞌ e kataqan ruchuqꞌabꞌ ri mak panuwiꞌ.

¹⁶ Yey echiriꞌ e canꞌan ri na cuaj taj, cannaꞌ cꞌu riꞌ chinucꞌuꞌx na utz ta ri quintajin che uꞌanic. Rucꞌ cꞌu riꞌ waꞌ canjiquibaꞌ uwach lic utz ri takanic re ri Tzij Pixab.

¹⁷ Jelaꞌ cꞌu riꞌ e pachaꞌ na in ta ri quinꞌanaw re ri na utz taj, ma e catakan ri mac pa wanimaꞌ.

¹⁸ Riꞌin lic wetaꞌam, wa in ticawex na jinta cꞌana utz chwe we na jinta ri Dios wucꞌ. Ma tob cuaj canꞌan ri utz, pero nutuquel na canrik ta uꞌanic waꞌ.

¹⁹ Ma na canꞌan ta ri utz, ri lic cuaj canꞌano; e lic canꞌan ri na utz taj, ri na cuaj taj canꞌano.

²⁰ Jecꞌulaꞌ riꞌ, we e canꞌan ri na cuaj taj, riꞌ na in ta ri quinꞌanaw re, ma e ri mac catakan pa wanimaꞌ ri caꞌanaw re.

²¹ Jecꞌulaꞌ tob lic cuaj canꞌan ri utz, e ri na utz taj ri catakan panuwiꞌ.

²² Na rucꞌ ta cꞌu riꞌ, cunaꞌ ri wanimaꞌ e lic chom rutakanic Rutzij Upixab ri Dios y lic quinquiꞌcot che waꞌ.

²³ Pero cannaꞌo cꞌo jun chic tzij catakan chwi ri nucuerpo; waꞌ e ruchukꞌab ri mac. Ecꞌu waꞌ cachꞌoꞌjinic chaꞌ na cancoj ta utzij ri cubiꞌij ri nunaꞌoj y jecꞌulaꞌ inyututal pa mac.

²⁴ ¡Lic tokꞌoꞌ nuwach riꞌin! ¿China quesan we riꞌin pukꞌab ri na utz taj cꞌo chwe, ri quincꞌamaw bi pa camic?

²⁵ Lic cantioxij che ri Dios, ma xew Rire catoꞌw weꞌin, yey cuꞌan waꞌ ruma ri Jesucristo, ri Kanimajawal. Jecꞌulaꞌ canmaj usucꞌ lic chirajawaxic canya wib pukꞌab rutakanic Rutzij Upixab ri Dios; noꞌj echiriꞌ canya wib pukꞌab ri rayinic re ri nucuerpo, riꞌ e catakan ruchukꞌab ri mac panuwiꞌ.