Romanos 5:12-16 in Achi

¹² I mac atzalal, are xjekan chuwach i jyub taʼaj, xa jun achi xcojow lok. (Are i Adan xcojow lok.) Rumal i mac atzalal xoc li camic. I camic-le xa ʼax chiquiwach i winak man conojel xe macunic.

¹³ Ujer ʼax que macun wi i winak are cʼa maja ʼo i ʼatbal tzij tzʼibtal rumal i mam Moises. Xui-ri, xeʼelok pacha n-ta qui mac, man n-ta ʼatbal tzij.

¹⁴ I mac atzalal ʼax ʼo wi are xoc li ʼatbal tzij chi tzʼibtal rumal i mam Moises. Rumal-i, ca tijin qui camic i winak cʼa chu petic lok che i Adan. Xe camic, tupu n-ta jun tzij xqui kelo pacha xoʼon i Adan. I Adan laj ca majaw i jun chi ca cʼunic. (Are i xoʼon i Adan, xe u maj u qʼuial winak; y are xoʼon i Jesucrísto, xak xe u maj u qʼuial winak.)

¹⁵ Xui-ri, ile chi xu ʼan i Adan n-cu maj taj pacha i xu ʼan i Dios chake, man rumal i u mac jun achi (chi Adan), conojel i winak xpe i camic piquiwi. Xui-ri, i Dios xu sipaj i ʼelsabal-ke chupam i camic xak rumal xa jun achi, chi are i Jesucrísto; ile lic nim i cu ʼano, man coʼon ʼutz chique u qʼuial winak chuwach i Dios.

¹⁶ I u mac i Adan chi xu ʼano-le n-cu maj taj pacha i tobal-ke chi Dios cu ya chake, man i xoʼon i achi-le, xe u cʼokoj conojel i winak rumal jun mac, xa jun, xui-ri, i kelbal chi sak xa sujux chake rumal i Dios, tupu lic qʼui i ka mac ka ʼanom.

¹² Ri mak xok lo che ruwachulew ruma ri Adán, ri nabꞌe achi; yey ri mak e xukꞌam lo ri kamik. Jekꞌulaꞌ xpe ri kamik pakiwi konoje ri tikawex, ma konoje xemakunik.

¹³ Echiriꞌ ri Dios kꞌamajaꞌ ne kuya Rutzij Upixabꞌ che ri Moisés, ri mak okinaq chi che ruwachulew. Qatzij, we na jinta taqanik, na utz taj kabꞌiꞌxik kꞌo junoq xupalajij tzij.

¹⁴ Na rukꞌ ta kꞌu riꞌ, chwi lo ri Adán kꞌa chwa ri Moisés, taq ri winaq xekam ruma ri kimak, tobꞌ ri kimak na junam ta rukꞌ ri xuꞌan ri Adán echiriꞌ xupalajij ri taqanik re ri Dios. Yey ri Adán e pachaꞌ ri Jun kakꞌunik, waꞌ e ri Jesucristo.

¹⁵ Pero ri xukꞌam lo ri palajibꞌal tzij re ri Adán lik junwi chwa ri sipanik xukꞌam lo ri Qanimajawal Jesucristo. Ma ruma rupalajibꞌal tzij jun chi achi, xekam konoje ri winaq; yey ruma kꞌu ri unimal rutzil ukꞌuꞌx jun chi Achi, ri sipanik re ri unimal rutzil ukꞌuꞌx ri Dios más ne xnimar pakiwi ukꞌiyal tikawex.

¹⁶ Ekꞌu ri xukꞌam lo ri mak re ri jun achi, lik junwi chwa ri xukꞌam lo ri sipanik kuya ri Dios chiqe. Ma ruma jun chi mak re jun chi achi, xkꞌun ri qꞌatbꞌal tzij pakiwi konoje ri tikawex. Noꞌj ruma ri sipanik re ri Dios, kasachisax uwach ri ukꞌiyal mak ke ri tikawex chaꞌ jelaꞌ utz kekꞌojiꞌ jusukꞌ chwach ri Dios.

¹² Ri mac xoc lo che ruwachulew ruma ri Adán, ri nabe achi; yey ri mac e xucꞌam lo ri camic. Jecꞌulaꞌ xpe ri camic paquiwi conoje ri ticawex, ma conoje xemacunic.

¹³ Echiriꞌ ri Dios cꞌamajaꞌ ne cuya Rutzij Upixab che ri Moisés, ri mac oquinak chi che ruwachulew. Katzij, we na jinta takanic, na utz taj cabiꞌxic cꞌo junok xupalajij tzij.

¹⁴ Na rucꞌ ta cꞌu riꞌ, chwi lo ri Adán cꞌa chwa ri Moisés, tak ri winak xecam ruma ri quimac, tob ri quimac na junam ta rucꞌ ri xuꞌan ri Adán echiriꞌ xupalajij ri takanic re ri Dios. Yey ri Adán e pachaꞌ ri Jun cacꞌunic, waꞌ e ri Jesucristo.

¹⁵ Pero ri xucꞌam lo ri palajibal tzij re ri Adán lic junwi chwa ri sipanic xucꞌam lo ri Kanimajawal Jesucristo. Ma ruma rupalajibal tzij jun chi achi, xecam conoje ri winak; yey ruma cꞌu ri unimal rutzil ucꞌuꞌx jun chi Achi, ri sipanic re ri unimal rutzil ucꞌuꞌx ri Dios más ne xnimar paquiwi uqꞌuiyal ticawex.

¹⁶ Ecꞌu ri xucꞌam lo ri mac re ri jun achi, lic junwi chwa ri xucꞌam lo ri sipanic cuya ri Dios chike. Ma ruma jun chi mac re jun chi achi, xcꞌun ri kꞌatbal tzij paquiwi conoje ri ticawex. Noꞌj ruma ri sipanic re ri Dios, casachisax uwach ri uqꞌuiyal mac que ri ticawex chaꞌ jelaꞌ utz quecꞌojiꞌ jusucꞌ chwach ri Dios.