ROMANOS 3:9-18 in Tzotzil

⁹ Ma'uc más lecucutic yu'un ti vo'one quich'ojtic ti sc'op ti Diose, ho'ucutic ti judioucutique. Yu'un laj xa calboxuc ti co'ol oy jmultic jcotoltic, manchuc mi judioucutic, manchuc mi yanlum crixchanooxuc.

¹⁰ Yu'un hech ts'ibabil comel ti sc'op ti Diose: Mi junuc mu'yuc much'u toj yo'ntonic.

¹¹ Mu'yuc much'u p'ij yo'ntonic. Mu'yuc much'u tsa'ic ti Diose.

¹² Yan be stamojic scotolic. Hech co'ol boliben yo'ntonic scotolic. Mi junuc mu'yuc much'u lec ti c'usi tspasique.

¹³ Ti yeique ja' hech chaj c'u che'el ch'en ti campo santo ti bu tu ti jyalel chloc' tal yic' mi jamale. Ti yoq'uique chtun yu'un tsnopic c'op. Ti yut yeic oy veneno ya'yel hech chaj c'u che'el oy ti yut ye veneno ti orachone. Chmilvan ya'yel yu'un chbolibtasvan xchi'uc ti sc'ope.

¹⁴ Puru bolc'op chloc'. Chvinaj ti sc'op ti xmich'et no'ox yo'ntonic.

¹⁵ Mi oy c'usi chopol cha'i, hech chlic sjol, hech chba milvanuc.

¹⁶ Scotol c'ac'al buc no'ox chbatic ch-ilbajinvanic, chac'beic ep svocol ti crixchanoetique.

¹⁷ Mi jutuc mu xu' chc'uxubinvanic.

¹⁸ Mu'yuc Dios ti yo'ntonic hech yu'un mu xi'ic ti Diose, ti xchie.

⁹ Mu xuꞌ cꞌu xcaltic. Mu joꞌcutic más lecutic, joꞌotic li jꞌisraelutique. Ical xa ti coꞌol jpasmulilutic ta balumil jcotoltic cꞌalal ta joꞌoxuc eꞌuc li maꞌuc jꞌisraeloxuque.

¹⁰ Yuꞌun jech onoꞌox tsꞌibabil ta scꞌop li Diose: Mu junuc crixchano ti leque.

¹¹ Mu junuc buchꞌu pꞌij, mu junuc buchꞌu saꞌ cuꞌuntic li Diose.

¹² Naca chopol li cꞌustic ta jpastique, nom oyutic ta stojol li Diose. Mu junuc buchꞌu spas yuꞌun li cꞌusi leque.

¹³ Mu junuc buchꞌu lec li cꞌusi chale. Li quetique tu yaꞌel jech chac cꞌu chaꞌal li muquenal mi muc bu macbil leque. Li cocꞌtique yuꞌun jaꞌ chijyacꞌutic ta vocol. Jaꞌ tsloqꞌues scotol li cꞌustic chopolique. Oy chamebal ta quetic yaꞌel jech chac cꞌu chaꞌal schial ye li chone. Yuꞌun chijmilvanutic yaꞌel ta scoj li cꞌustic chcaltique.

¹⁴ Naca chopol li cꞌusi chcaltique jech ta xvinaj o ti xtiꞌet noꞌox coꞌontic cuxulutique.

¹⁵ Ti cꞌusi jutuc chopol chcaꞌitique, mu xcuch cuꞌuntic, xuꞌ xa noj xijmilvan o ta ora.

¹⁶ Buyuc batcutic ta jsocbetic sjol yoꞌon li crixchanoetique, ta jsaꞌbetic svocolic.

¹⁷ Yuꞌun mu pajesbaj li coꞌontique.

¹⁸ Yuꞌun mu jxiꞌtic li Diose, xi onoꞌox tsꞌibabil.

⁹ ¿Cꞌuxi xanaꞌic? ¿Mi más lec oyotic ti voꞌotic jꞌisraelotique? ¿Mi mu sta ti yane? Mu jechuc, yuꞌun laj xa cacꞌ anaꞌic ti jcotoltic pasbilotic ta mantal yuꞌun ti mulile.

¹⁰ Yuꞌun jech ta xal ti scꞌop Diose: Muꞌyuc buchꞌu lec, mi jaꞌuc junuc.

¹¹ Muꞌyuc buchꞌu xaꞌi albel. Muꞌyuc buchꞌu junucal ta scꞌan ti ta saꞌ ti Diose.

¹² Scotolic chꞌayemic ta be. Scotolic sbelel chꞌayel sqꞌuelojic. Muꞌyuc buchꞌu junucal ti oy cꞌusi lec ta spase.

¹³ Ti yeique jech jomol jech chac cꞌu chaꞌal stiꞌ smuquinal ti animae. Ta xloꞌlavanic schiꞌuc ti yeique. Ti yoqꞌuique coꞌol sꞌelan svenenoal chon.

¹⁴ Chopol ti cꞌusitic ta xlocꞌ ta yeique. Mu tsꞌicbaj ti cꞌusi ta xalique.

¹⁵ Xbitetic ta anil ta xmilvanic.

¹⁶ Scotol ti cꞌusi ta spasique ta soquesvan.

¹⁷ Mu snaꞌic ti bu ta jtatic ti jun coꞌntontique.

¹⁸ Mi jaꞌuc juteb ta snopic ti ta xiꞌtaic ti Diose, xi ti scꞌop Diose.

⁹ Mu'yuc c'usi xu' chcaltic yu'un muc vu'uticuc xa más lecutic, vu'utic li israelutique. Yu'un laj xa cal ti co'ol oy jmul jcotoltic c'alal ta vo'oxuc ec ti muc israelucoxuque.

¹⁰ Yu'un jech ono'ox ts'ibabil ta sc'op Dios: Me junuc cristiano mu'yuc boch'o lec.

¹¹ Me junuc mu'yuc boch'o bij, me junuc mu'yuc boch'o tsa' li Diose.

¹² Scotolic chopol c'usitic tspasic, puro sventa ch'ayel. Me junuc mu'yuc boch'o lec c'usi tspas.

¹³ Me junuc mu'yuc boch'o lec c'usi chal. Li yeique tu ya'yel jech chac c'u cha'al muquinaltic ti toj tu me mu'yuc macbil sti' li vombil tone. Li yoq'uique ja' chtun yu'unic sventa chlo'lavanic. Oy veneno ta yeic ya'yel jech chac c'u cha'al oy veneno ta ye li orachone, yu'un chmilvanic ya'yel ta sventa li c'usitic chalique.

¹⁴ Puro chopol c'usi chloc' ta yeic. Ta sc'opic no'ox chvinaj ti stsoq'uet yo'ntonique.

¹⁵ Me oy c'usi ic'ot ta pasel ta stojole, chbat milvanuc ta ora.

¹⁶ Buyuc no'ox chbatic tsocbeic yo'nton li cristianoetique yu'un chac'beic svocol.

¹⁷ Me jutuc mu spas ta jun yo'ntonic.

¹⁸ Mu'yuc xi'bal sba cha'yic li Diose, xi ono'ox ts'ibabil.

⁹ Yechꞌo un mu xuꞌ xcaltic ti voꞌotic más lecotic ti juriootique. Yuꞌun ical xa avaꞌiic ti jcotoltic jmulavilotique, acꞌu mi voꞌotic, acꞌu mi yan crixchanoetic.

¹⁰ Jaꞌ yech tsꞌibabil ta scꞌop Riox chac liꞌi: Mi jun crixchano muc bu lec cꞌusi tspas.

¹¹ Muc muchꞌu pꞌij, muc muchꞌu ti oy ta yoꞌon ti Rioxe.

¹² Chꞌaybeijemic yaꞌel scotolic. Jaꞌ noꞌox tspasic li cꞌusitic chal yoꞌonique. Mi jun muc muchꞌu ti lec cꞌusi tspase.

¹³ Muc muchꞌu ti lec cꞌusi chale. Li yeique tu yaꞌel, coꞌol xchiꞌuc muquenal mi muc bu lec macbile yuꞌun jaꞌ chloꞌlovanic o. Oy yaꞌlel yeic yaꞌel, coꞌol xchiꞌuc yaꞌlel ye quiletel chon. Yuꞌun chmilvanic o yaꞌel li cꞌusitic chalique.

¹⁴ Naca chopol li cꞌusitic chlocꞌ ta yeique. Jaꞌ chvinaj o ti tol xacꞌ scꞌacꞌal yoꞌonique.

¹⁵ Batsꞌi jtijic ta cꞌop, mu stsꞌic yuꞌunic. Xuꞌ xa chaꞌiic ti xmilvanic ta orae.

¹⁶ Buyuc noꞌox baticuc ta sliquesic cꞌop. Abol sba yuꞌunic li crixchanoetique.

¹⁷ Mu snaꞌ xcꞌuxubinvanic.

¹⁸ Mu xiꞌic o ti Rioxe, xi tsꞌibabil.