Romanos 3:2-29 in Achi

² Nim i cu ʼan chake; qʼui i ʼutz petnak pakawi yoj chi oj aj Israel winak. Are i nabe u ʼanom chake are iri: i Dios xu ya u tzij chake yoj chi oj aj Israel.

³ ¿Wach cu ʼan ni Dios we ʼo jujun chake yoj quiqui kel u tzij-le? ¿Xataba cu yojo wach u sujum chake we xa cumal ique?

⁴ N-cu yoj taj. I Dios lic cu ʼan na pacha i u bim, tupu conojel i winak n-quiqui ʼan taj pacha i qui bim, ʼis toʼ que tʼoronic. Ketaʼam chi i Dios lic cu ʼano pacha i u bim, man queje iri tzʼibtal can chupam u wuj: (I mam David ujer queje xu bij iri che i Dios:) I winak quiqui bij na chi niʼpa i ca bij, lic katzij; are quiqui tzucuj a mac, queʼel na chi n-ti a mac. (Queje ile tzʼibtal canok.)

⁵ Mok ʼo i quiqui bij: “Bay, i ka mac atzalal yoj cu rik ni u chac che i Dios,” mok que cha. “Cu rik u chac che, man ʼilbal-re chi nim ni rutzil i Dios chuwach i kutzil yoj. We n-caka ʼan ti ka mac, n-ca ʼalijin ta ʼuri we lic ʼutz i Dios. Rumal-i, n-ʼus taj we i Dios coj u ya pa tojpen, man xa are jun pawor ka ʼanom che,” mok que cha. (I xin bij-le are pacha i quiqui bij i winak; n-are ti pacha cu bij i Dios.)

⁶ N-queje ti usucʼ ile pacha i quiqui bij, man que u ya na pa tojpen. I Dios, we n-que u ya ti ajmaquib pa tojbal qui mac ¿wach u ʼonquil i ʼatbal tzij ʼuri cu ʼan piquiwi i winak chuwach i jyub taʼaj coʼon panok?

⁷ Mok ʼo jun cu bij, “Bay, i yin, we in aj tʼoronel mas ca ʼalijin ʼuri chi Dios lic ʼutz, man ire lic n-ca tʼoron taj. Rumal-i, mas cocsax ni u ʼij ire rumal in mac yin. ¿Wuchac ʼuri i Dios quin u ya pa tojbal mac?” mok cu bij.

⁸ Xak mok ʼo i ca binic: “ʼUtz we quin ʼan i n-ʼus taj, man ʼutz cocsax ni u ʼij i Dios rumal i quin ʼano,” cu bij. ¿ʼUtz ile? N-ʼus taj. Xui-ri, ʼo i que binic chi queje ile in bim yin; ique xa tzel quin quilo. Niʼpa i quiqui bij ile, lic ca majawic quiqui toj ni qui mac.

⁹ Bay, yoj chi oj aj Israel winak ¿xataba mas oj ʼutz chiquiwach i ne te aj Israel? N-oj ta mas ʼutz chiquiwach. Ya in bim chic chiwe chi n-ta coʼono we oj aj Israel winak, o we n-oj ta aj Israel, ʼis oj ʼo puʼab i mac atzalal.

¹⁰ Ketaʼam ile man queje iri tzʼibtal chupam u wuj i Dios: I winak, n-ta jun we n-ti u mac chuwach i Dios, mi ta jun;

¹¹ mi ta jun cu ta u be, mi ta jun cu tzucuj i Dios.

¹² Conojel je ʼelnak che u be i Dios; conojel je sachnak chic. Mi ta jun ca ʼanaw i ʼutz, mi xa ta jun.

¹³ Lic n-ʼus ti que chʼawic; i qui tzij pacha u chuyal u julil camnak, jaktajnak; ruʼi qui chiʼ que qui tʼor i winak. I tzij chi quel pa qui chiʼ pacha venen re jun cumatz;

¹⁴ i que chʼawic, toʼ cʼa; toʼ cʼokonic quiqui ʼano.

¹⁵ Lic sicʼaj i cakan chi be chu ʼonquil i camic;

¹⁶ xa ipa que icʼaw wi, toʼ cʼax, toʼ bis quiqui ya canok;

¹⁷ n-que bin ta pa be re i ʼutz chomalil chiquiwach.

¹⁸ N-que oc ta ʼil che i Dios, n-quiqui chʼob ta pichʼok. (Queje ile tzʼibtal can chupam u wuj i Dios.)

¹⁹ I aj Israel winak, ʼo na que che, ronojel wach cu bij i wuj re u ʼatbal tzij i Dios. Rumal-i, ique xak junam cuʼ conojel i winak chuwach i jyub taʼaj, n-quiqui laʼ tu wach che i Dios are cu ʼat tzij piquiwi.

²⁰ Mi ta jun winak, ʼutz queʼel chuwach i Dios we xa rumal u ʼanom pacha cu bij i ujer ʼatbal tzij. I ʼatbal tzij-le xa cu ʼalijinsaj chique chi ʼo i qui mac.

²¹ Péro woʼor i Dios u ʼalijinsam chake wach i módo coʼonbej oj ʼutz chuwach ire; cakilo chi n-are ti ujer ʼatbal tzij chi ca ʼanaw ʼutz chake chuwach i Dios. I wuj tzʼibtal can cumal i je ajbil u tzij i Dios, xak cu ʼalijinsaj chake wach u ʼonquil ca ʼantajic.

²² Are i módo u yijbam i Dios chi coʼonbej oj ʼutz chuwach ire, are we caka cuba ka cʼux che i Jesucrísto. Que oʼon ʼutz chuwach ire niʼpa i qui cubam qui cʼux che i Crísto, n-ta coʼono xa pachinok.

²³ Man conojel i winak je macun-nak; rumal-i, n-ta que che u ʼij u chomal i Dios.

²⁴ Xui-ri i Dios, coʼon chake oj ʼutz chuwach ire, pacha jun sipon u yom chake rumal i rutzil u cʼux. Queje ile xu ʼano xa rumal i Jesucrísto chi u tojom chic i kelbal chi sak.

²⁵ I Dios xu ya i Jesucrísto pacha jun qʼuexelaj; rumal u quiqʼuel ire, ʼo i cuybal ka mac we caka cuba ka cʼux che. Are xcam i Jesucrísto tojbal-re i ka mac, i Dios xu ʼalijinsaj chi lic sucʼul i cu ʼano. Oʼonom-lok, rumal u nimal u cʼux, toʼ xe ril i winak che i qui mac, n-ta xu ʼan chique.

²⁶ Péro woʼor, n-queje ta chic cu ʼan i Dios ile. U chʼobom chi cu ʼalijinsaj chake chi lic sucʼul i cu ʼano. ʼO ni u tojic i ka mac chakawach, xui-ri i Dios u yijbam i tobal-ke chuwach i cʼax-le. Rumal-i, cakil u be chi Dios lic ʼutz, xak coj u yijba chi oj ʼutz chuwach ire, niʼpa i caka cuba ka cʼux che i Jesucrísto.

²⁷ Rumal ʼuri, n-ta chic u chac we caka ʼan nim che kib; maka bij chi ka chʼacom i kelbal chupam i ka mac rumal tak i ʼutz caka ʼan yoj. Ile n-are ta rumal u cojic i ujer ʼatbal tzij, man tojtal chic i ka mac xa rumal u cubibal ka cʼux che i Jesucrísto.

²⁸ Cakil ʼut, chi xa rumal u cubibal ka cʼux che i Jesucrísto chi Dios ʼutz coj rilo; n-are ta rumal i coj tijin chu ʼanic pacha cu bij i ʼatbal tzij tzʼibtal can rumal i mam Moises.

²⁹ I Dios, ¿xataba ire xui i ka Dios yoj chi oj aj Israel winak? ¿Xataba n-are ti qui Dios i ne te aj Israel winak? ¡Are pues! Katzij xak qui Dios ique.

² Lik kꞌo taq kutiqoj wi. Ma ri Dios nabꞌe na xuya Ruchꞌaꞌtem pakiqꞌabꞌ.

³ Pero ¿saꞌ kuꞌanaꞌ we e kꞌo jujun chike na xkaj taj kakikoj Ruchꞌaꞌtem ri Dios? ¿Ruma nawi riꞌ waꞌ kujekꞌ ribꞌ ri Dios che ri ubꞌiꞌtisim?

⁴ ¡Paqatzij wi na e ta riꞌ! Ma ri Dios na aj ta raqꞌul; janipa rubꞌiꞌim Rire, e kuꞌano, tobꞌ kꞌu konoje ri winaq xa e aj raqꞌul. Ma e pachaꞌ ri tzꞌibꞌital kan pa Ruchꞌaꞌtem ri Dios: We kꞌo junoq kukꞌambꞌej upa ri chꞌaꞌtem la, kaqꞌalajinik Rilal lik Lal jusukꞌ che ronoje ri kabꞌiꞌij la; jekꞌulaꞌ kel pana la rukꞌ puwi ronoje xcha ri rey David che ri Dios.

⁵ Kꞌo ri kakibꞌiꞌij: «E taq ri lik na jusukꞌ taj kaqaꞌano kꞌo kutiqoj; ma echiriꞌ kaqaꞌan waꞌ, más kaqꞌalajin ri lik jusukꞌ kuꞌan ri Dios» kechaꞌ. (Jelaꞌ kakichꞌobꞌ raqan ri tikawex re ruwachulew.) ¿Saꞌ kꞌu riꞌ ri kaqabꞌiꞌij puwi waꞌ? ¿Na jusukꞌ ta nebꞌa ri kuꞌan ri Dios we kuqꞌat tzij paqawiꞌ?

⁶ ¡Areꞌ, lik jusukꞌ! Ma we ta na jusukꞌ ta Rire, ¿saꞌ kꞌu uꞌanik riꞌ kuqꞌat tzij pakiwi konoje ri e kꞌo che ruwachulew?

⁷ Ma laj kꞌo junoq kubꞌiꞌij: «We rukꞌ ri raqꞌubꞌal kanꞌano e katakꞌabꞌax uqꞌij ri Qꞌijsaq re ri Dios, ¿saꞌ kꞌu ubꞌe riꞌ kꞌa kabꞌiꞌxik in aj mak y kaqꞌat tzij panuwiꞌ?» kachaꞌ.

⁸ ¿Utz ne riꞌ kaqabꞌiꞌij: «Qaꞌana ri na utz taj chaꞌ waꞌ e kukꞌam lo ri utz»? ¡Na utz ta kꞌenoq! Yey kꞌo ri kakibꞌiꞌij raqꞌubꞌal chiqij, ma kakibꞌiꞌij jelaꞌ kojkꞌutun riꞌoj. E ri kebꞌiꞌn re waꞌ, lik taqal chike kaqꞌat tzij pakiwiꞌ.

⁹ ¿E kami keꞌelawi riꞌ ri oj aj judiꞌabꞌ, lik utz qaꞌanom y na jinta kꞌana qamak chikiwa ri na e ta aj judiꞌabꞌ? ¡Na e ta riꞌ! Ma e pachaꞌ ri nukꞌutum loq: Konoje, tobꞌ e aj judiꞌabꞌ o na e ta aj judiꞌabꞌ, junam e kꞌo chuxeꞌ ri qꞌatbꞌal tzij re ri Dios ruma ri kimak.

¹⁰ Ma jewaꞌ ri tzꞌibꞌital kan pa Ruchꞌaꞌtem ri Dios: Na jinta juna tikawex jusukꞌ chwach ri Dios, tobꞌ tane xa jun.

¹¹ Na jinta junoq kamajaw usukꞌ runaꞌoj ri Dios. Na jinta junoq katzukuw re Rire.

¹² Konoje ri winaq ebꞌelinaq che rubꞌe ri Dios, y na jinta chi kꞌana kichak. Na jinta junoq kaꞌanaw ri utz, tobꞌ tane xa jun.

¹³ Ri chꞌaꞌtem kel lo pa kichiꞌ ri winaq e pachaꞌ uchuyil ujul animaꞌ teqꞌel uchiꞌ; ma rukꞌ ri kaqꞌ kesokosoꞌnik. Ri chꞌaꞌtem kel lo pa kichiꞌ e pachaꞌ chi veneno re kumatz.

¹⁴ Yey rupa kichiꞌ nojinaq che itzel taq tzij y kꞌaxlaj chꞌaꞌtem.

¹⁵ Lik kacha kikꞌuꞌx che kekamisanik.

¹⁶ Tobꞌ pa taq kebꞌikꞌow wi, kekikoj ri winaq pa kꞌaxkꞌolil y pa bꞌis;

¹⁷ pa taq e kꞌo wi rike, na jinta kꞌana utzil chomal.

¹⁸ Na jinta ne kꞌana xiꞌin ibꞌ kukꞌ chwach ri Dios kachaꞌ.

¹⁹ Ronoje ri kubꞌiꞌij Rutzij Upixabꞌ ri Dios, waꞌ kubꞌiꞌij chike ri kꞌo wa Tzij Pixabꞌ pakiqꞌabꞌ. Jekꞌulaꞌ na jinta junoq kꞌo puqꞌabꞌ kubꞌiꞌij: «Na utz ta kuqꞌat tzij ri Dios panuwiꞌ ma riꞌin na jinta kꞌana numak.» Ma paqatzij wi konoje ri winaq e kꞌo che ruwachulew, tobꞌ e aj judiꞌabꞌ o na e ta aj judiꞌabꞌ, e kꞌo chuxeꞌ ri qꞌatbꞌal tzij re ri Dios.

²⁰ Y na jinta juna tikawex kuꞌan jusukꞌ che ribꞌ chwach ri Dios ruma ri kutaqej ri taqanik re ri Tzij Pixabꞌ. Ma ri Tzij Pixabꞌ na jinta uchuqꞌabꞌ chaꞌ kojresaj puqꞌabꞌ ri mak; xew kukꞌut chiqe: Riꞌoj oj aj mak.

²¹ Pero woꞌora ri Dios uqꞌalajisam chiqawach suꞌanik Rire kuꞌan jusukꞌ chiqe, jelaꞌ pachaꞌ ri kubꞌiꞌij Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ. Na kojuꞌan ta kꞌu jusukꞌ chwach ri Dios ruma ri qataqem taq ri taqanik,

²² ma e ruma ri kubꞌulibꞌal qakꞌuꞌx rukꞌ ri Qanimajawal Jesucristo. Ma ri Dios kuꞌan jusukꞌ chike konoje ri kakubꞌiꞌ kikꞌuꞌx rukꞌ ri Cristo, tobꞌ e chinoq.

²³ Konoje kꞌu ri tikawex emakuninaq y lik naj e kꞌo wi lo che ri unimal uchomalil ri Dios.

²⁴ Na rukꞌ ta kꞌu riꞌ, ri Dios kuꞌan jusukꞌ chike ruma ri unimal rutzil ukꞌuꞌx y kusipaj kꞌu ri kolobꞌetajik chike ruma ri xuꞌan ri Qanimajawal Jesucristo echiriꞌ xeresaj lo puqꞌabꞌ ri mak.

²⁵ Ri Dios xuya lo ri Cristo chaꞌ ruma Rire ri tikawex kakiriq kuybꞌal kimak we xkubꞌiꞌ kikꞌuꞌx rukꞌ rukikꞌel xturuwik. Jekꞌuriꞌlaꞌ ri Dios xukꞌutu Rire lik jusukꞌ y lik kꞌo unimal ukꞌuꞌx, ma ojertan na asu ta xusachisaj kiwach ri winaq ruma ri kimak kiꞌanom loq.

²⁶ Yey Rire uchꞌobꞌom chi lo raqan saꞌ ri kuꞌan chupa waꞌ wa qꞌij oj kꞌo wi. Ekꞌu woꞌora ukꞌutum chik suꞌanik kuꞌan jusukꞌ chike ri tikawex; e ruma ri kubꞌulibꞌal kikꞌuꞌx rukꞌ ri Jesús. Jelaꞌ kꞌu riꞌ, xqꞌalajinik ri Dios lik jusukꞌ y e Rire ri kuꞌan jusukꞌ chike ri kakubꞌiꞌ kikꞌuꞌx rukꞌ ri Cristo.

²⁷ ¿Kꞌo nebꞌa qaꞌanom riꞌoj chaꞌ rukꞌ waꞌ utz kaqaꞌan nim che qibꞌ chwach ri Dios? ¡Na jintaj! ¿Suꞌbꞌe? Ma na e ta ruma kaqataqej ri taqanik ri kaꞌanaw chiqe kojqibꞌ rukꞌ ri Dios; e ruma ri kubꞌulibꞌal qakꞌuꞌx rukꞌ ri xuꞌan Rire.

²⁸ Kaqakꞌisbꞌej kꞌu rukꞌ waꞌ: Ri Dios kuꞌan jusukꞌ che ri tikawex ruma ri kubꞌulibꞌal ukꞌuꞌx rukꞌ Rire, na ruma ta ri utaqem taq ri taqanik.

²⁹ ¿Ri Dios xew nebꞌa Dios ke ri e aj judiꞌabꞌ? ¿Na e ta nebꞌa Dios ke ri na e ta aj judiꞌabꞌ? Paqatzij wi Rire e Dios ke ri e aj judiꞌabꞌ y ke ri na e ta aj judiꞌabꞌ.

² Lic cꞌo tak cutikoj wi. Ma ri Dios nabe na xuya Ruchꞌaꞌtem paquikꞌab.

³ Pero ¿saꞌ cuꞌanaꞌ we e cꞌo jujun chique na xcaj taj caquicoj Ruchꞌaꞌtem ri Dios? ¿Ruma nawi riꞌ waꞌ cujecꞌ rib ri Dios che ri ubiꞌtisim?

⁴ ¡Pakatzij wi na e ta riꞌ! Ma ri Dios na aj ta rakꞌul; janipa rubiꞌim Rire, e cuꞌano, tob cꞌu conoje ri winak xa e aj rakꞌul. Ma e pachaꞌ ri tzꞌibital can pa Ruchꞌaꞌtem ri Dios: We cꞌo junok cucꞌambej upa ri chꞌaꞌtem la, cakꞌalajinic Rilal lic Lal jusucꞌ che ronoje ri cabiꞌij la; jecꞌulaꞌ quel pana la rucꞌ puwi ronoje xcha ri rey David che ri Dios.

⁵ Cꞌo ri caquibiꞌij: «E tak ri lic na jusucꞌ taj cakaꞌano cꞌo cutikoj; ma echiriꞌ cakaꞌan waꞌ, más cakꞌalajin ri lic jusucꞌ cuꞌan ri Dios» quechaꞌ. (Jelaꞌ caquichꞌob rakan ri ticawex re ruwachulew.) ¿Saꞌ cꞌu riꞌ ri cakabiꞌij puwi waꞌ? ¿Na jusucꞌ ta neba ri cuꞌan ri Dios we cukꞌat tzij pakawiꞌ?

⁶ ¡Areꞌ, lic jusucꞌ! Ma we ta na jusucꞌ ta Rire, ¿saꞌ cꞌu uꞌanic riꞌ cukꞌat tzij paquiwi conoje ri e cꞌo che ruwachulew?

⁷ Ma laj cꞌo junok cubiꞌij: «We rucꞌ ri rakꞌubal canꞌano e catacꞌabax ukꞌij ri Kꞌijsak re ri Dios, ¿saꞌ cꞌu ube riꞌ cꞌa cabiꞌxic in aj mac y cakꞌat tzij panuwiꞌ?» cachaꞌ.

⁸ ¿Utz ne riꞌ cakabiꞌij: «Kaꞌana ri na utz taj chaꞌ waꞌ e cucꞌam lo ri utz»? ¡Na utz ta qꞌuenok! Yey cꞌo ri caquibiꞌij rakꞌubal chikij, ma caquibiꞌij jelaꞌ cojcꞌutun riꞌoj. E ri quebiꞌn re waꞌ, lic takal chique cakꞌat tzij paquiwiꞌ.

⁹ ¿E cami queꞌelawi riꞌ ri oj aj judiꞌab, lic utz kaꞌanom y na jinta cꞌana kamac chiquiwa ri na e ta aj judiꞌab? ¡Na e ta riꞌ! Ma e pachaꞌ ri nucꞌutum lok: Conoje, tob e aj judiꞌab o na e ta aj judiꞌab, junam e cꞌo chuxeꞌ ri kꞌatbal tzij re ri Dios ruma ri quimac.

¹⁰ Ma jewaꞌ ri tzꞌibital can pa Ruchꞌaꞌtem ri Dios: Na jinta juna ticawex jusucꞌ chwach ri Dios, tob tane xa jun.

¹¹ Na jinta junok camajaw usucꞌ runaꞌoj ri Dios. Na jinta junok catzucuw re Rire.

¹² Conoje ri winak ebelinak che rube ri Dios, y na jinta chi cꞌana quichac. Na jinta junok caꞌanaw ri utz, tob tane xa jun.

¹³ Ri chꞌaꞌtem quel lo pa quichiꞌ ri winak e pachaꞌ uchuyil ujul animaꞌ tekꞌel uchiꞌ; ma rucꞌ ri cakꞌ quesocosoꞌnic. Ri chꞌaꞌtem quel lo pa quichiꞌ e pachaꞌ chi veneno re cumatz.

¹⁴ Yey rupa quichiꞌ nojinak che itzel tak tzij y cꞌaxlaj chꞌaꞌtem.

¹⁵ Lic cacha quicꞌuꞌx che quecamisanic.

¹⁶ Tob pa tak quebicꞌow wi, quequicoj ri winak pa cꞌaxcꞌolil y pa bis;

¹⁷ pa tak e cꞌo wi rique, na jinta cꞌana utzil chomal.

¹⁸ Na jinta ne cꞌana xiꞌin ib cucꞌ chwach ri Dios cachaꞌ.

¹⁹ Ronoje ri cubiꞌij Rutzij Upixab ri Dios, waꞌ cubiꞌij chique ri cꞌo wa Tzij Pixab paquikꞌab. Jecꞌulaꞌ na jinta junok cꞌo pukꞌab cubiꞌij: «Na utz ta cukꞌat tzij ri Dios panuwiꞌ ma riꞌin na jinta cꞌana numac.» Ma pakatzij wi conoje ri winak e cꞌo che ruwachulew, tob e aj judiꞌab o na e ta aj judiꞌab, e cꞌo chuxeꞌ ri kꞌatbal tzij re ri Dios.

²⁰ Y na jinta juna ticawex cuꞌan jusucꞌ che rib chwach ri Dios ruma ri cutakej ri takanic re ri Tzij Pixab. Ma ri Tzij Pixab na jinta uchukꞌab chaꞌ cojresaj pukꞌab ri mac; xew cucꞌut chike: Riꞌoj oj aj mac.

²¹ Pero woꞌora ri Dios ukꞌalajisam chikawach suꞌanic Rire cuꞌan jusucꞌ chike, jelaꞌ pachaꞌ ri cubiꞌij Rutzij Upixab ri Dios tzꞌibital can ruma ri Moisés y cuma ri kꞌalajisanelab. Na cojuꞌan ta cꞌu jusucꞌ chwach ri Dios ruma ri katakem tak ri takanic,

²² ma e ruma ri cubulibal kacꞌuꞌx rucꞌ ri Kanimajawal Jesucristo. Ma ri Dios cuꞌan jusucꞌ chique conoje ri cacubiꞌ quicꞌuꞌx rucꞌ ri Cristo, tob e chinok.

²³ Conoje cꞌu ri ticawex emacuninak y lic naj e cꞌo wi lo che ri unimal uchomalil ri Dios.

²⁴ Na rucꞌ ta cꞌu riꞌ, ri Dios cuꞌan jusucꞌ chique ruma ri unimal rutzil ucꞌuꞌx y cusipaj cꞌu ri colobetajic chique ruma ri xuꞌan ri Kanimajawal Jesucristo echiriꞌ xeresaj lo pukꞌab ri mac.

²⁵ Ri Dios xuya lo ri Cristo chaꞌ ruma Rire ri ticawex caquirik cuybal quimac we xcubiꞌ quicꞌuꞌx rucꞌ ruquiqꞌuel xturuwic. Jecꞌuriꞌlaꞌ ri Dios xucꞌutu Rire lic jusucꞌ y lic cꞌo unimal ucꞌuꞌx, ma ojertan na asu ta xusachisaj quiwach ri winak ruma ri quimac quiꞌanom lok.

²⁶ Yey Rire uchꞌobom chi lo rakan saꞌ ri cuꞌan chupa waꞌ wa kꞌij oj cꞌo wi. Ecꞌu woꞌora ucꞌutum chic suꞌanic cuꞌan jusucꞌ chique ri ticawex; e ruma ri cubulibal quicꞌuꞌx rucꞌ ri Jesús. Jelaꞌ cꞌu riꞌ, xkꞌalajinic ri Dios lic jusucꞌ y e Rire ri cuꞌan jusucꞌ chique ri cacubiꞌ quicꞌuꞌx rucꞌ ri Cristo.

²⁷ ¿Cꞌo neba kaꞌanom riꞌoj chaꞌ rucꞌ waꞌ utz cakaꞌan nim che kib chwach ri Dios? ¡Na jintaj! ¿Suꞌbe? Ma na e ta ruma cakatakej ri takanic ri caꞌanaw chike cojkib rucꞌ ri Dios; e ruma ri cubulibal kacꞌuꞌx rucꞌ ri xuꞌan Rire.

²⁸ Cakaqꞌuisbej cꞌu rucꞌ waꞌ: Ri Dios cuꞌan jusucꞌ che ri ticawex ruma ri cubulibal ucꞌuꞌx rucꞌ Rire, na ruma ta ri utakem tak ri takanic.

²⁹ ¿Ri Dios xew neba Dios que ri e aj judiꞌab? ¿Na e ta neba Dios que ri na e ta aj judiꞌab? Pakatzij wi Rire e Dios que ri e aj judiꞌab y que ri na e ta aj judiꞌab.