11 Bizu benꞌ rioñeꞌe. Bizu benꞌ nuebëꞌ Diuzi.
12 Yuguluyaquëꞌ rdayaquëꞌ lao lato lao chula. Rnaoyaquëꞌ neza mala ga cuiaguiꞌyaquëꞌ. Bizu benꞌ rue tahuen, ni tuyaquëꞌ.
13 Ca tu yerobá neyalon ga rlaꞌ zigo, canaꞌ naca diꞌidzaꞌ rero luꞌu ruꞌayaquëꞌ. Ta rziꞌjëꞌ yëꞌ ruꞌelëjëꞌ benëꞌ diꞌidzaꞌ. Ca veneno quie bëla naca diꞌidzaꞌ rero luꞌu ruꞌayaquëꞌ.
14 Rudzeꞌdeꞌyaquëꞌ laguedyiyaquëꞌ, rnëjëꞌ diꞌidzaꞌ ziꞌ.
15 Tariara rdayaquëꞌ rbeꞌnidyiyaquëꞌ benëꞌ ta gutiyaquëꞌ leyaquëꞌ.
16 Con ga zioyaquëꞌ rudyiaguiꞌyaquëꞌ benëꞌ, rucaꞌnyëchiꞌyaquëꞌ laguedyiyaquëꞌ.
17 Bineziyaquëꞌ tzuꞌulëyaquëꞌ laguedyiyaquëꞌ dyëꞌëdi.
18 Ni siquiera ruejëꞌ pensari chi hue Diuzi lëjëꞌ castigo.
19 Canaꞌ rnën lëꞌë guichi laꞌiya quie Diuzi. Naꞌra raꞌo neziro con cabëꞌ rna lëꞌë guichi ley pcaꞌn Diuzi lao naꞌa Moisés dza naꞌte. Neziro rnabëꞌn lao ja benꞌ nao len cuenda biibin yaca benëꞌ bi yequëbiyaquëꞌ lao Diuzi dza gaca juicio, dza rue yugulu benëꞌ cuenda lao Diuzi.
20 Pero quele por nun quie danꞌ rue quiero con cabëꞌ rna lëꞌë guichi ley pcaꞌn Diuzi lao Moisés ilëꞌë Diuzi raꞌo benꞌ laxtaꞌo yëri. Conforme con cabëꞌ rna lëꞌë guichi ley naꞌ neziro de dulaꞌ xquia quiero.
21 Pero naꞌa barioñeꞌero cabëꞌ nacan ilëꞌë Diuzi raꞌo benꞌ laxtaꞌo yëri. Cala por nun quie chi hue quiero con cabëꞌ rna lëꞌë guichi ley pcaꞌnnëꞌ lao naꞌa Moisés ilëꞌënëꞌ raꞌo benꞌ laxtaꞌo yëri. Lenaꞌ rguixogueꞌn lëꞌë guichi ley naꞌ lente ja guichi bë ja benꞌ udixogueꞌ diꞌidzaꞌ quie Diuzi dza naꞌte.
22 Tanun quie danꞌ rzudyiꞌilëro Jesucristo, canaꞌ ilëꞌë Diuzi raꞌo benꞌ laxtaꞌo yëri. Ilëꞌë Diuzi benꞌ laxtaꞌo yëri yugulu benꞌ rzudyiꞌilë lëbëꞌ. Tuz ca ilëꞌënëꞌ benꞌ rzudyiꞌilë Jesucristo, ilëꞌënëꞌ raꞌo benꞌ laxtaꞌo yëri, laꞌacazi benꞌ Israel, laꞌacazi benꞌ binaca benꞌ Israel.
23 Yuguluro de dulaꞌ xquia quiero. Yuguluro biuzuero huero yugulu ca reꞌen Diuzi huero.
24 Pero naca Diuzi benꞌ huen ilëꞌënëꞌ raꞌo benꞌ laxtaꞌo yëri. Bibiquiz̃uroguëꞌ ilëꞌënëꞌ raꞌo benꞌ laxtaꞌo yëri como danꞌ Cristo Jesús gutinëꞌ udiz̃uguëꞌ quie dulaꞌ xquia quiero, canaꞌ ruꞌen lato ilëꞌë Diuzi raꞌo benꞌ laxtaꞌo yëri.
25 Useꞌelaꞌ Diuzi Cristo lao yedyi layu ta gutiëꞌ lëꞌë yaga cruzo ta gataꞌ yelaꞌ huenitilao quiero lao Diuzi. Tanun quie lenaꞌ hueziꞌz̃e Diuzi quie dulaꞌ xquia quie nu benꞌ sudyiꞌilë Cristo. Canaꞌ bë Diuzi lao naꞌa Cristo ta tzioñeꞌero naca Diuzi benꞌ rue ta yuꞌu niꞌa xnezi. Pues talicazi cabëꞌ bë Diuzi, ulezëꞌ bibënëꞌ castigo quie yaca benꞌ bë xquia tu bineguida Cristo.
26 Lëscanꞌ bë Diuzi canaꞌ ta tzioñeꞌero biusan Diuzi huenëꞌ ta yuꞌu niꞌa xnezi dza quiero, dza rdaro lao yedyi layu. Pues ta yuꞌu niꞌa xnezi neruenëꞌ, rlëꞌënëꞌ yaca benꞌ rzudyiꞌilë Jesús benꞌ laxtaꞌo yëri.
27 Bireyaꞌalaꞌ huero cuinro benꞌ z̃e tanun quie danꞌ rlëꞌë Diuzi raꞌo benꞌ laxtaꞌo yëri. ¿Bixquienꞌ bireyaꞌalaꞌ huero cuinro benꞌ z̃e? Bireyaꞌalaꞌ como danꞌ cule quie Diuzi naꞌ rlëꞌënëꞌ raꞌo benꞌ laxtaꞌo yëri, quele yelaꞌ benꞌ huen quiero. Rlëꞌë Diuzi raꞌo benꞌ laxtaꞌo yëri por nun quie rzudyiꞌilëro Cristo, cala por nun quie chi ruero ca mandado rue lao ley quienëꞌ pcaꞌnnëꞌ lao naꞌa Moisés.
