Romanos 15:6-31 in Ixil

⁶ Ech maꞌl chit evatz setoksa iqꞌii u Tioxh, viTat u kuBꞌaal Jesucristo.

⁷ Ech kꞌultaj vemol kam echaꞌ ikꞌultꞌex u Jesuus. Tan oj ech sebꞌan tziꞌ, iqꞌii u Tioxh netoksa.

⁸ Tan kꞌuxh ul u Cristo Jesuus, tiꞌ qꞌu Israeel ulka. Aꞌ ul itzojpi qꞌu kam tal u Tioxh tu qꞌu kukꞌuy kumam. Ech nojchit nikꞌuch u Tioxh aas nitzojpi qꞌul iyol.

⁹ Utz tiꞌ qꞌu puera aanima majte kꞌuxh ul u Jesuus. Tan aꞌ isaꞌ satoksa iqꞌii Tioxh qꞌu puera. Tan txumul vatz u Tioxh. Echaꞌ nital u Yolbꞌal Tioxh ech tzaꞌ: —Savoksa aqꞌii xoꞌl qꞌu puera aanima utz, sunbꞌitza vabꞌii.— Chia.

¹⁰ Utz nipajtal u Yolbꞌal Tioxh ech tzaꞌ: —Chiꞌbꞌojex, tuchꞌ vitenam u Tioxh, ex puera aanima.— Chia.

¹¹ Utz nipajtaleꞌ: —Oksataj iqꞌii u kuBꞌaal Amlika kajay ex, ex puera aanima. Utz kajay ex tenam, tꞌanbꞌaꞌtaj vibꞌii.— Chia.

¹² Utz itzꞌibꞌa paj u Isaias ech tzaꞌ majte: —Saitzꞌpu maꞌl ituꞌxh ixalam u Isaii. Utz ijlenal tetz qꞌu tenam kajayil siꞌaneꞌ. Tan aꞌ u kꞌujlebꞌal ikꞌuꞌl qꞌu aanima.— Chia.

¹³ Ech aꞌ koj txuqꞌtxunsanex u Tioxh vaꞌl nikuchꞌia. Aꞌ koj oksan chiꞌbꞌichil tetaanima bꞌaꞌnil. Utz aꞌ koj oksan paas texoꞌl bꞌaꞌnil majte. Tan aꞌ vaꞌl kꞌujlel ekꞌuꞌl tiꞌ. Utz aꞌ koj aqꞌon sibꞌ tereꞌn eyakꞌil tiꞌ ichꞌial u Jesuus tiqꞌaqꞌal u Tioxhla Espiiritu.

¹⁴ Hermanos, tiira nunnima aas kajay tek ex bꞌaꞌnla txumbꞌal atil tzexeꞌ. Utz kaana ootzajibꞌal atil tzexeꞌ. Ech saꞌtekveet taqꞌtu tibꞌ etxumbꞌal setibꞌilaj.

¹⁵ Pek kꞌuxh echi, nuntzꞌibꞌa opon talax unjolol kam sete tu u uꞌ tzaꞌ, ech yeꞌk sasotz sekꞌuꞌl vaꞌl chusel sete. Vatzsaj nival sete tu vibꞌaꞌnil u Tioxh vaꞌl aqꞌon u vijleꞌm.

¹⁶ Tan aꞌ aqꞌon u vijleꞌm tiꞌ ipaxsal itziiul u Jesucristo tu qꞌu puera aanima utz, tiꞌ ichusax u bꞌaꞌnla chusbꞌal te tetz chitpichil vaꞌl nitaqꞌ u Tioxh. Ech antu soꞌopon qꞌu puera aanima tzixeꞌ tu Amlika tiqꞌaqꞌal u vaqꞌon, qꞌuꞌl txaa el tu u Tioxhla Espiiritu. Utz ech siꞌaneꞌ u oya vaꞌl nitok viꞌ nachbꞌal aas tiira bꞌaꞌn niꞌenku te.

¹⁷ Ech nuntxuqꞌtxun tiꞌ. Tan techal u vaqꞌon nunbꞌan tiꞌ u Tioxh tiꞌ u Cristo Jesuus.

¹⁸ Utz nikoꞌnkoxhunchuli aas kam nunbꞌaneꞌ. Pek taꞌxh nivaleꞌ kam qꞌuꞌl bꞌanel vaqꞌo tiqꞌaqꞌal u Jesuus xoꞌl qꞌu puera aanima, qꞌuꞌl nitok tiꞌ inimal u Jesuus. Tan nojchit paxsamal itziiul u yolbꞌal Tioxh vaqꞌo utz, bꞌanel qꞌu kam vaqꞌo qꞌuꞌl nivaleꞌ.

¹⁹ Mamaj xheenya tuchꞌ txaichil vetunbꞌan tiqꞌaqꞌal u Tioxhla Espiiritu. Aꞌ xeꞌtikkꞌasuꞌlin tu Jerusaleen; paalin tu tereꞌn tenam utz; ulyin tikuenta Iliirico. Maꞌxh paal vallu u bꞌaꞌnla chusbꞌal tetz u Cristo tu qꞌu aanima tu jankꞌal qꞌu txꞌavaꞌ tziꞌ.

²⁰ Vetunbꞌan yaꞌl vibꞌ tiꞌ ipaxsal itziiul u bꞌaꞌnla chusbꞌal tu qꞌu tenam qꞌuꞌl paat yeꞌsaj tabꞌitaꞌ. Yitꞌ tu koj qꞌu tenam qꞌuꞌl paxnaj tek itziiul u Jesuus tuul, ech yeꞌk savoksa vibꞌ tu u aqꞌon tetz vaꞌte.

²¹ Ech aꞌ vetunbꞌan vaꞌl nital u Yolbꞌal Tioxh ech tzaꞌ: —Saꞌtekmotxtabꞌi qꞌu aanima qꞌuꞌl paat yeꞌ abꞌimal taqꞌo. Utz samotxꞌel itxumbꞌal qꞌu aanima tuul qꞌuꞌl paat yeꞌt alax te.— Chia.

²² Ech tiꞌ qꞌu kam tziꞌ yeꞌxh nuntxꞌolpu tu oponchil tzexeꞌ, kꞌuxh jatpax koꞌxh unbꞌan tiꞌ aas soꞌoponin.

²³ Pek aatz cheel, yeꞌxhat veꞌt sunbꞌanvu u vaqꞌon tu qꞌu txꞌavaꞌ tzaꞌ. Utz kamal laꞌtekveeti leꞌnunqꞌilaꞌex. Tan jatvaꞌx koꞌn yaꞌbꞌ cheel nivachva seꞌnvilex.

²⁴ Ech kamal lapaalin tzexeꞌ aas labꞌenin tu España. Tan nivitzꞌa savilex. Utz laꞌtekꞌenechajpubꞌenin tiꞌ vunbꞌey aas maꞌt vatin bꞌoj tzexeꞌ.

²⁵ Pek aatz cheel tan, maꞌtꞌin tu Jerusaleen. Seꞌnvaqꞌka maꞌl lochbꞌal tu qꞌu niman tetz u Jesuus latziꞌ.

²⁶ Tan vetilak maꞌl kutxu qꞌu niman tetz u Jesuus aa Macedoonia tuchꞌ qꞌu aa Acaya, tetz qꞌu niman tetz u Jesuus qꞌuꞌl meꞌbꞌaꞌ atil tu Jerusaleen.

²⁷ Utz tiira bꞌaꞌn vaꞌl vetmotxiꞌana tziꞌ tan, ayaꞌl chit ikꞌuꞌl vetmotxiꞌana. Tan tiqꞌaqꞌal koꞌn qꞌu Israeel kꞌuxh vetꞌopon vilochbꞌal u Tioxh tzixeꞌ tiꞌ vichitpu tu paav. Utz echen salochon qꞌu puera aanima tiꞌ taqꞌax bꞌoj tetz qꞌu Israeel aas oj kam niyaꞌta.

²⁸ Aatz maꞌt voleꞌ tiꞌ vunchaj tziꞌ utz, maꞌt vaqꞌtu u kutxu, sapaalunqꞌilaꞌex. Ech sabꞌenin tu España.

²⁹ Utz vootzajle aas kaana unyakꞌil iqꞌomal aas saoponin tzexeꞌ tu vibꞌaꞌnil u bꞌaꞌnla ichusbꞌal u Cristo.

³⁰ Pek nunjaj sete hermanos, aas selochꞌin. Tan maꞌl koꞌn kuvatz kꞌatz u kuBꞌaal Jesucristo tu u Tioxhla Espiiritu, qꞌilataj sikꞌletaj Tioxh viꞌ.

³¹ Jajtaj tu u Tioxh aas sikolin vatz qꞌu aa Judea qꞌuꞌl yeꞌ ninima Tioxh, qꞌu qelol. Utz jajtaj te majte aas ayaꞌl koj chit ikꞌuꞌl qꞌu niman tetz u Jesuus tu Jerusaleen likꞌul u lochbꞌal vaꞌl nitaqꞌax opon tu qꞌu aanima qꞌuꞌl oknaj tiꞌ u Jesuus tiqꞌaqꞌal u vaqꞌon.

⁶ Estiꞌeꞌ uvaꞌ jolol chit qoksat iqꞌii u Tiixheꞌ, tan unvatzul chit kuyol tiꞌ Aak, tan Aakeꞌ viBꞌaal u Kubꞌaal Jesucristo.

⁷ Estiꞌeꞌ la val sete, yeꞌ la etixva etibꞌ sevatzaj, tan yeꞌl oꞌ kat tixva oꞌ u Cristo. As ech ikꞌuchat u Cristo uvaꞌ nim talchu veꞌt u Tiixheꞌ.

⁸ Tan ileꞌ ni val sete uvaꞌ kat ul veꞌt u Jesucristo tiꞌ ilochat veꞌt unqꞌa tiaal Israel, as tiꞌ talat isuuchil ste uvaꞌ jik chiteꞌ u Tiixheꞌ, as tiꞌ itzojpisat u Cristo unqꞌa yoleꞌ uveꞌ alel kan taꞌn u Tiixheꞌ te unqꞌa qꞌesla kubꞌaaleꞌ.

⁹ As kat ul iloch veꞌt Jesucristo unqꞌa uxhchileꞌ uveꞌ jit tiaal Israel, aqꞌal uvaꞌ la toksa veꞌt iqꞌii u Tiixheꞌ tiꞌ uvaꞌ kat itxum Aak ivatz, echeꞌ uvaꞌ ni tal umaꞌl u yol uvaꞌ tzꞌibꞌamal kan uvaꞌ ech ni tal ileꞌ: La val vabꞌiieꞌ xoꞌl unqꞌa tenameꞌ uveꞌ jit tiaal Israel. As la ibꞌitza veꞌt unqꞌa tenameꞌ vabꞌiieꞌ unpajte, tiꞌk u yoleꞌ.

¹⁰ As ech ni tal umaꞌt u yol ileꞌ: Ex tenam uvaꞌ jit ex tiaal Israel, as chiibꞌojtaj ex kꞌatz vitenam u Tiixheꞌ, tiꞌk u yoleꞌ.

¹¹ As ni tal unpajte: Etoksataj iqꞌii u Kubꞌaaleꞌ, jankꞌal ex uveꞌ jit ex tiaal Israel. As nim talchu Aakeꞌ vatz unqꞌa tenameꞌ skajayil la ibꞌaneꞌ, tiꞌk u yoleꞌ.

¹² As ech ni tal umaꞌl u yol ileꞌ uvaꞌ kat tal kan u Isaías: La ul umaꞌl u tiaal u Isaí echeꞌ ixalmit umaj taqꞌil tzeꞌ. As aꞌeꞌ la ok ijlenaalil tiꞌ unqꞌa tenameꞌ skajayil vatz u txꞌavaꞌeꞌ. As tiꞌ Aak la ikꞌujbꞌaꞌkat unqꞌa tenameꞌ ikꞌuꞌl uvaꞌ jit tiaal Israel, tiꞌk u yoleꞌ.

¹³ As aꞌ u Tiixheꞌ, u aqꞌol tetz u nimla bꞌaꞌnileꞌ uvaꞌ nu kutxꞌebꞌon stiꞌ, as Aakeꞌ la oksan u chiibꞌichileꞌ tu vetaanxelaleꞌ as tukꞌ uvaꞌ bꞌaꞌn veꞌt etatin sevatzaj, as kꞌujleꞌl veꞌt ekꞌuꞌl tiꞌ Aak taꞌn u Tiixhla Espíritu, tul uvaꞌ netxꞌebꞌon tiꞌ u nimla bꞌaꞌnileꞌ.

¹⁴ As ootzimal svaꞌn, vitzꞌin vatzik, as kꞌujleꞌl chit unkꞌuꞌl setiꞌ uvaꞌ nim vibꞌaꞌnil u Tiixheꞌ tu vetaanxelaleꞌ. As at etxumbꞌal tiꞌ echusat etibꞌ sevatzaj, tan ootzimal vitxumbꞌal u Tiixheꞌ setaꞌn.

¹⁵ As yeꞌ kat xoꞌv in tiꞌ untzꞌibꞌat bꞌen kaꞌl unqꞌa yoleꞌ sete tiꞌ vulsat unqꞌa yoleꞌ sekꞌuꞌl, tan tukꞌ vibꞌaꞌnil u Tiixheꞌ

¹⁶ as kat toksa in Aak alol tetz viyol u Jesucristo tiꞌ bꞌen valat isuuchil u bꞌaꞌnla yoleꞌ sete, ex uvaꞌ jit ex tiaal Israel, tiꞌ uvaꞌ ex veꞌt tetz u Tiixheꞌ la ibꞌaneꞌ taꞌn u Tiixhla Espíritu, aqꞌal uvaꞌ la ebꞌaneꞌ kam uvaꞌ nisaꞌ Aak setiꞌ. As ech exeꞌ echeꞌ umaj oy vatz Aak uvaꞌ la chiibꞌ taama Aak stiꞌ.

¹⁷ Estiꞌeꞌ nuntxuqꞌtxuneꞌ tiꞌ u vaqꞌoneꞌ uvaꞌ kat taqꞌ u Tiixheꞌ sve, tan tukꞌ vibꞌii u Jesucristo nunbꞌankat.

¹⁸ As yeꞌl umaj yol la valeꞌ tiꞌ u vaqꞌoneꞌ. Pet taꞌn kuxh umaꞌl u yoleꞌ la valeꞌ tiꞌ itxakonsat in u Cristo tiꞌ valat u bꞌaꞌnla yoleꞌ sete, ex uvaꞌ jit ex tiaal Israel, tiꞌ uvaꞌ kam kat unbꞌan sexoꞌl, as tiꞌ uvaꞌ kat val sete.

¹⁹ As tiꞌ unqꞌa kꞌuchbꞌal tetz u tijleꞌm u Tiixheꞌ uvaꞌ kat teqꞌo taama unqꞌa tenameꞌ stiꞌ. As tukꞌ unqꞌa iyakꞌil u Tiixhla Espíritu. As aꞌ kat xeꞌtikkat tzan in tu u Jerusalén tiꞌ valat isuuchil u bꞌaꞌnla yoleꞌ skajayil. As kat pal in tu unjoltu unqꞌa tenameꞌ techal kat oon in tu u Ilírico tiꞌ valat isuuchil u yoleꞌ,

²⁰ tan aꞌeꞌ kat vitzꞌa tu vaanxelaleꞌ uvaꞌ la bꞌen val u bꞌaꞌnla yoleꞌ tulaj unqꞌa tenameꞌ uvaꞌ yeꞌ alaxojkat itzibꞌlal u Cristo, tiꞌ uvaꞌ in la xeꞌtisan u aqꞌoneꞌ tzitziꞌ xoꞌl unqꞌa uxhchileꞌ bꞌaxa.

²¹ As ech la bꞌen unbꞌaneꞌ echeꞌ ni tal umaꞌl u yol uvaꞌ tzꞌibꞌamal kan uvaꞌ ech ni tal ileꞌ: Unqꞌa tenameꞌ uvaꞌ yeꞌ kat alax itzibꞌlal vibꞌaꞌnil u Tiixheꞌ ste, as aꞌeꞌ la ilon vibꞌaꞌnil Aakeꞌ. As unqꞌa tenameꞌ uvaꞌ yeꞌ kat abꞌin itzibꞌlal Aak, as aꞌeꞌ la pal tisuuchil u yoleꞌ, tiꞌk u yoleꞌ.

²² As, vitzꞌin vatzik, jatpajux kuxh val unbꞌeneꞌ tiꞌ bꞌen vilat ex. As yeꞌ kat uchi tiꞌ voon sexoꞌl.

²³ As cheel kat tzojpiy veꞌt in tiꞌ u vaqꞌoneꞌ tzitzaꞌ. As la bꞌen vil veꞌt ex, tan naꞌytzan kuxheꞌ valat veꞌt voon sexoꞌl. As yeꞌ ni tucheꞌ.

²⁴ Pet la bꞌen in tu España uvaꞌ ni valeꞌ. As la pal vil ex tzitziꞌ tu u Roma, aqꞌal uvaꞌ la eloch in tiꞌ unbꞌen tu u España. As maꞌt vatin unbꞌooj sexoꞌl tiꞌ kuchiibꞌisat qibꞌ setukꞌ sukuvatzaj. As aꞌn la bꞌen veꞌt ineꞌ tu u España.

²⁵ As bꞌennal in bꞌaxa tu u Jerusalén tiꞌ bꞌen vaqꞌat u lochbꞌaleꞌ te unqꞌa qitzꞌin qatzikeꞌ tzitziꞌ,

²⁶ tan kat ok veꞌt tu u taanxelal unqꞌa qitzꞌin qatzikeꞌ uvaꞌ echen tu unqꞌa tenameꞌ uvaꞌ Macedonia tukꞌ u Acaya tiꞌ toyat bꞌen puaj, lochbꞌal tetz unqꞌa meebꞌaꞌeꞌ xoꞌl unqꞌa qitzꞌin qatzikeꞌ uvaꞌ echen tu u Jerusalén.

²⁷ As techal chiteꞌ uvaꞌ la lochon unqꞌa qitzꞌin qatzikeꞌ uvaꞌ jit tiaal Israel, tan ibꞌaꞌnil kuxh unqꞌa tiaal Israel uvaꞌ kat tootzi veꞌt vibꞌaꞌnil u Tiixheꞌ. Estiꞌeꞌ uvaꞌ techal la taqꞌ bꞌen unbꞌooj lochbꞌal te unqꞌa qitzꞌin qatzikeꞌ uvaꞌ tiaal Israel uvaꞌ yeꞌl tetz ati.

²⁸ As tul la bꞌen vaqꞌ kan u puajeꞌ te unqꞌa qitzꞌin qatzikeꞌ tu u Jerusalén, as la pal vil veꞌt ex, tan la bꞌen veꞌt in tu u España uvaꞌ ni valeꞌ.

²⁹ As at sunkꞌuꞌl uvaꞌ tul la pal vil ex, as nimal vibꞌaꞌnil u bꞌaꞌnla yoleꞌ tetz u Cristo eqꞌomal svaꞌn. As aꞌeꞌ la val sete.

³⁰ Vitzꞌin vatzik, tukꞌ vibꞌii u Kubꞌaal Jesucristo, as tukꞌ vibꞌaꞌnil u Tiixhla Espíritu nunjaj bꞌaꞌnil sete uvaꞌ ayaꞌloj chit ekꞌuꞌl la eloch in tiꞌ unnachat Tiixh. As enachtaj Tiixh sviꞌ unpajte,

³¹ aqꞌal uvaꞌ yeꞌ la itxey in unqꞌa uxhchileꞌ tu u Judea uvaꞌ tiaal Israel, uvaꞌ yeꞌ ni niman u Jesús, tan aꞌ ni valeꞌ uvaꞌ bꞌaꞌn vooneꞌ la oon in, as bꞌaꞌn koj chit ikꞌulat unqꞌa qitzꞌin qatzikeꞌ u lochbꞌaleꞌ uveꞌ la oon svaꞌn.