Romanos 15:10-17

¹⁰Y ri ruch'abel ri Dios nubij chuka': Rix ri man ix israelitas ta, quixquicot quiq'uin ri israelitas, ri rutinamit ri Dios. Queri' nubij chupan ri tz'ibatel can.

¹¹Y chuka' nubij: Tiya' ruk'ij ri Ajaf chi'ivonojel rix ri man ix israelitas ta. Conojel vinek tiquiya' c'a ruk'ij ri Dios. Queri' nubij chupan ri tz'ibatel can.

¹²Y ri Isaías rutz'iban can: C'o jun riy-rumam ri Isaí xtic'oje' y xtoc K'atoy-Tzij pa quivi' ri man e israelitas ta, y ri vinek ri' can xticoyobej c'a chi niquil utzil riq'uin. Queri' ri rutz'iban can ri Isaías.

¹³Ri Dios nuben chike chi cukul-apo kac'u'x riq'uin. Y ri nurayibel yin chive rix, chi ri Dios nunojisaj ta ri ivánima riq'uin ronojel quicoten y uxlanen. Queri' xtuben chive vi can iniman rija'. Xquixruto' riq'uin ri ruchuk'a' ri Lok'olej Espíritu, richin chi can cukul ic'u'x nivoyobej ri rutzil ri Dios.

¹⁴Vach'alal, vetaman chi can utz vi ri ic'aslen. Vetaman chuka' chi can ix nojinek riq'uin etamabel y romari' tok yixtiquir nicukuba' ic'u'x chi'ivachibil ivi'.

¹⁵Pero c'o c'a ch'aka' tijonic ri nic'atzin chi xinnataj chive, y man xinpokonaj ta xintz'ibaj re tijonic re' chupan re vuj re'. Xintz'ibaj re tijonic re' chive, roma ri Dios ruyo'on ri rutzil chuve,

¹⁶y rubanon chuve chi xinoc rusamajel ri Jesucristo richin nintzijoj chique ri vinek ri man e israelitas ta, ri utzilej ruch'abel ri Dios ri nic'amon-pe colotajic. Y queri' rije' niquijech ri quic'aslen chire ri Dios, roma ri nusamaj yin. Can yeka-vi chuvech ri Dios, roma ri Lok'olej Espíritu nuch'ajch'ojirisaj ri quic'aslen.

¹⁷Ri Cristo Jesús c'o viq'uin, y romari' yin yalan yiquicot riq'uin ri samaj ri yo'on chuve roma ri Dios.