Romanos 12:6-21 in Achi

⁶ I Dios, rumal i rutzil u cʼux chake, jalajuj i chac u yom chake; we u yom chake chi coj tiqui chu bixquil chique i winak wach u ʼalijinsam ire chake, chaka ʼana ʼuri ruʼ ronojel ka cʼux, rumal i nim laj u cubibal ka cʼux che i Jesucrísto.

⁷ We i Dios u yom chake chi coj tiqui chi qui toʼic i winak, xak chaka ʼana ruʼ ronojel ka cʼux. We u yom chake oj cʼutunel chique i winak, are ʼuri ile chaka ʼana.

⁸ We u yom chake chi coj tiqui chu yaʼic u cowil ka cʼux chakawach, chaka ya ʼuri. We u yom chake chi coj tiqui chi qui toʼic i nibaʼib, che ka to ʼuri lic ronojel ka cʼux. Jun, we cajʼatzil, chu ʼana pacha i usucʼ, o we i Dios u yom che chi aj ʼanol ʼutz chique i quiqui tij uyej, cha quicot ʼuri chu ʼonquil ile.

⁹ Chi ʼana che iwib chi ʼo cʼaxnabal i cʼux chiwach, lic sakil. Ronojel niʼpa i n-ʼus taj, tzel chiwila; niʼpa i ʼutz, chi ya i wach che.

¹⁰ Cʼax chi na iwib chiwach man iwatz i chaʼ iwib rumal i Crísto. Chi ya i cʼux chu cojic i ʼij chiwach.

¹¹ Lic chi ya i cʼux chu ʼonquil u chac i Kajwal; mi cʼayo.

¹² Chix quicotok, man iwetaʼam qui rik ni ʼutz chi u chʼobom i Dios chiwe rumal. We ʼo cʼax ca pe piwi, chi chʼija ruʼ u nimal i cʼux. Mix uxlan chu tzʼonoxic che i Dios.

¹³ Je niʼpa i je re i Dios, we ʼo uyej quiqui tijo, che i to; xak chi ya i posar chiwach.

¹⁴ Yix, we ʼo jun cu tzucuj i cʼax piwi, chi tzʼonoj i ʼutz puwi ire. Mi tzʼonoj i tojpen puwi, xui i ʼutz.

¹⁵ We ʼo jun ca quicotic, chix quicot ruʼ; we ca bisonic, xak chix bison yix ruʼ.

¹⁶ Chi na xak jun i cʼux chiwach. Mi ʼan toʼ nim che iwib; chi ʼana xak jun che iwib cuʼ i n-ti qui ʼij. Mi chʼob yix ʼis iwetaʼam.

¹⁷ We ʼo jun coʼon jun mal chiwe, i yix mi ʼan jun mal che ire. Chi bisoj u ʼonquil i ʼutz chiquiwach conojel i winak.

¹⁸ Chi tija i ʼij chu jeqʼuic iwib che tak i chʼoʼoj, man ʼutz, chom quix qʼuiji chiquiwach conojel.

¹⁹ Ix wachalal, we ʼo jun cu ʼan u mac chiwe, mi tzalij u wach che. Chi ya puʼab i Dios wach i tojbal-re ca yaʼ che. Man chupam u wuj i Dios, queje iri tzʼibtalic: “Xui pinʼab yin ʼo wi u tzalijbal che, we ʼo jun u ʼanom u mac; xui yin ca majawic quin ya i tojbal-re che, cu bij i Kajwal.”

²⁰ Xak cu bij: “We ʼo jun, tzel cat rilo, we ca numic, cha tzuku; we ca cʼatic, cha ya u yaʼ. We queje ile ca ʼano, cu na u be ʼuri chi qʼuixbal i ca tijin chu ʼanic.” (Queje ile tzʼibtalic.)

²¹ Mi ya che i n-ʼus taj quix u chʼaco; chi chupu i n-ʼus taj ruʼ i ʼutz.

⁶ Ekꞌu ri Dios, jalajuj taq rusipanik uyaꞌom chiqe chiqajujunal chaꞌ kaqaꞌan ruchak; waꞌ e chirij taq ri karaj Rire chiqe ruma ri unimal rutzil ukꞌuꞌx. E uwariꞌche, ri yaꞌtal che kaqꞌalajisan puwi runaꞌoj ri Dios, chuꞌana xew e chirij ri bꞌiꞌtal che ruma ri Dios.

⁷ Ri yaꞌtal che lik kebꞌutoꞌ jujun chik, e chuꞌana riꞌ. Ri yaꞌtal che kakꞌutunik, e chuyaꞌa ribꞌ che ri kꞌutunik.

⁸ Ri yaꞌtal che kapixabꞌanik, e chuyaꞌa ribꞌ che ri pixabꞌanik. Ri yaꞌtal che kasipanik, e chuꞌana riꞌ ri kasipan rukꞌ ronoje ukꞌuꞌx. Ri yaꞌtal che kukꞌam kiwach jujun chik, e chuyaꞌa ribꞌ che uꞌanik waꞌ chi utz. Ri yaꞌtal che kukꞌut ri kꞌaxnaꞌbꞌal ukꞌuꞌx, e chuꞌana riꞌ rukꞌ kiꞌkotemal.

⁹ Kꞌax naꞌa ibꞌ alaq pa saqil wi, na xa ta rukꞌ kebꞌ palaj alaq. Makꞌul che ri bꞌinik silabꞌik alaq ri na utz taj; e taqej alaq uꞌanik ri utz.

¹⁰ Chijujunal alaq lik kꞌax naꞌa ibꞌ alaq pa saqil wi, ma chaqꞌ ibꞌ alaq chwach ri Qaqaw. Matzukuj ri yakbꞌal qꞌij ralaq; e yaka alaq kiqꞌij ri jujun chik.

¹¹ ꞌAna alaq ri lik alaq sakꞌaj, maꞌan alaq lik alaq xepu; e loqꞌnimaj alaq ri Qanimajawal rukꞌ ronoje kꞌuꞌx alaq.

¹² Rukꞌ kiꞌkotemal choyeꞌej alaq janipa ri ubꞌiꞌtisim ri Dios che alaq. Chꞌija alaq uchuqꞌabꞌ ri kꞌaxkꞌobꞌik kape pawiꞌ alaq y lik moqꞌotaj alaq uꞌanik orar.

¹³ Chetoꞌo alaq ri kikojom rubꞌiꞌ ri Cristo rukꞌ taq ri kajawax chike. Tijoj ibꞌ alaq che kikꞌulik chi utz janipa ri kebꞌopon chi ocho alaq.

¹⁴ Tzꞌonoj alaq ri rutzil ukꞌuꞌx ri Dios pakiwi ri kiternabꞌem alaq rukꞌ kꞌax; matzꞌonoj alaq ri na utz taj pakiwiꞌ, e tzꞌonoj alaq ri utz.

¹⁵ Kiꞌkota alaq kukꞌ ri e kꞌo pa kiꞌkotemal; choqꞌa alaq kukꞌ ri kebꞌoqꞌik.

¹⁶ Chuꞌana xa jun kꞌuꞌx alaq chiwach alaq. Maꞌan alaq nim che ibꞌ alaq; e ꞌana alaq xa jun kukꞌ ri na jinta kiwach. Machꞌobꞌ alaq lik kꞌo naꞌoj alaq chikiwa jujun chik.

¹⁷ Matzelej alaq uwach ri na utz taj kuꞌan junoq chiꞌij alaq. E choka alaq il che uꞌanik ri utz chikiwach konoje ri tikawex.

¹⁸ ꞌAna kꞌu alaq janipa ri kꞌo paqꞌabꞌ alaq chaꞌ kakꞌojiꞌ alaq chi utzil chomal kukꞌ konoje ri tikawex.

¹⁹ Ralaq nu hermanos ri kꞌax kannaꞌ alaq, we kꞌo kaꞌanaw ri na utz taj chiꞌij alaq, matzelej alaq ukꞌaxel che. E yaꞌa alaq puqꞌabꞌ ri Dios chaꞌ e Rire ri kayaꞌw ri tojbꞌal re, ma jewaꞌ tzꞌibꞌital chupa Ruchꞌaꞌtem: Panuqꞌabꞌ Riꞌin kꞌo wi kanqꞌat tzij pakiwi ri kebꞌanaw re ri na utz taj chiwij; In kꞌu riꞌ ri kinꞌanaw ukꞌaxel chike kacha ri Dios Qajawxel.

²⁰ Jekꞌuriꞌlaꞌ, e ꞌana alaq pachaꞌ ri kubꞌiꞌij Ruchꞌaꞌtem ri Dios: We kanum ri tzel kilow e la, yaꞌa la uwa. We katzajin uchiꞌ, yaꞌa la umiqꞌinaꞌ. Ma echiriꞌ kaꞌan la waꞌ, rire kujeq kakꞌix chiwach la yey kunaꞌ kꞌu ribꞌ riꞌ che ri na utz taj xuꞌan cheꞌla kachaꞌ.

²¹ Maya alaq luwar kasokotaj alaq ruma ri na utz taj; e chꞌija alaq uchuqꞌabꞌ ri na utz taj rukꞌ ri utz kaꞌan alaq.

⁶ Ecꞌu ri Dios, jalajuj tak rusipanic uyaꞌom chike chikajujunal chaꞌ cakaꞌan ruchac; waꞌ e chirij tak ri caraj Rire chike ruma ri unimal rutzil ucꞌuꞌx. E uwariꞌche, ri yaꞌtal che cakꞌalajisan puwi runaꞌoj ri Dios, chuꞌana xew e chirij ri biꞌtal che ruma ri Dios.

⁷ Ri yaꞌtal che lic quebutoꞌ jujun chic, e chuꞌana riꞌ. Ri yaꞌtal che cacꞌutunic, e chuyaꞌa rib che ri cꞌutunic.

⁸ Ri yaꞌtal che capixabanic, e chuyaꞌa rib che ri pixabanic. Ri yaꞌtal che casipanic, e chuꞌana riꞌ ri casipan rucꞌ ronoje ucꞌuꞌx. Ri yaꞌtal che cucꞌam quiwach jujun chic, e chuyaꞌa rib che uꞌanic waꞌ chi utz. Ri yaꞌtal che cucꞌut ri cꞌaxnaꞌbal ucꞌuꞌx, e chuꞌana riꞌ rucꞌ quiꞌcotemal.

⁹ Cꞌax naꞌa ib alak pa sakil wi, na xa ta rucꞌ queb palaj alak. Macꞌul che ri binic silabic alak ri na utz taj; e takej alak uꞌanic ri utz.

¹⁰ Chijujunal alak lic cꞌax naꞌa ib alak pa sakil wi, ma chakꞌ ib alak chwach ri Kakaw. Matzucuj ri yacbal kꞌij ralak; e yaca alak quikꞌij ri jujun chic.

¹¹ ꞌAna alak ri lic alak sacꞌaj, maꞌan alak lic alak xepu; e lokꞌnimaj alak ri Kanimajawal rucꞌ ronoje cꞌuꞌx alak.

¹² Rucꞌ quiꞌcotemal choyeꞌej alak janipa ri ubiꞌtisim ri Dios che alak. Chꞌija alak uchukꞌab ri cꞌaxcꞌobic cape pawiꞌ alak y lic mokꞌotaj alak uꞌanic orar.

¹³ Chetoꞌo alak ri quicojom rubiꞌ ri Cristo rucꞌ tak ri cajawax chique. Tijoj ib alak che quicꞌulic chi utz janipa ri quebopon chi ocho alak.

¹⁴ Tzꞌonoj alak ri rutzil ucꞌuꞌx ri Dios paquiwi ri quiternabem alak rucꞌ cꞌax; matzꞌonoj alak ri na utz taj paquiwiꞌ, e tzꞌonoj alak ri utz.

¹⁵ Quiꞌcota alak cucꞌ ri e cꞌo pa quiꞌcotemal; chokꞌa alak cucꞌ ri quebokꞌic.

¹⁶ Chuꞌana xa jun cꞌuꞌx alak chiwach alak. Maꞌan alak nim che ib alak; e ꞌana alak xa jun cucꞌ ri na jinta quiwach. Machꞌob alak lic cꞌo naꞌoj alak chiquiwa jujun chic.

¹⁷ Matzelej alak uwach ri na utz taj cuꞌan junok chiꞌij alak. E choca alak il che uꞌanic ri utz chiquiwach conoje ri ticawex.

¹⁸ ꞌAna cꞌu alak janipa ri cꞌo pakꞌab alak chaꞌ cacꞌojiꞌ alak chi utzil chomal cucꞌ conoje ri ticawex.

¹⁹ Ralak nu hermanos ri cꞌax cannaꞌ alak, we cꞌo caꞌanaw ri na utz taj chiꞌij alak, matzelej alak ucꞌaxel che. E yaꞌa alak pukꞌab ri Dios chaꞌ e Rire ri cayaꞌw ri tojbal re, ma jewaꞌ tzꞌibital chupa Ruchꞌaꞌtem: Panukꞌab Riꞌin cꞌo wi cankꞌat tzij paquiwi ri quebanaw re ri na utz taj chiwij; In cꞌu riꞌ ri quinꞌanaw ucꞌaxel chique cacha ri Dios Kajawxel.

²⁰ Jecꞌuriꞌlaꞌ, e ꞌana alak pachaꞌ ri cubiꞌij Ruchꞌaꞌtem ri Dios: We canum ri tzel quilow e la, yaꞌa la uwa. We catzajin uchiꞌ, yaꞌa la umikꞌinaꞌ. Ma echiriꞌ caꞌan la waꞌ, rire cujek caqꞌuix chiwach la yey cunaꞌ cꞌu rib riꞌ che ri na utz taj xuꞌan cheꞌla cachaꞌ.

²¹ Maya alak luwar casocotaj alak ruma ri na utz taj; e chꞌija alak uchukꞌab ri na utz taj rucꞌ ri utz caꞌan alak.