1 Macweꞌ joꞌ ꞌo nnꞌaⁿya na cwilaꞌyuꞌyoꞌ, ncꞌe na mꞌaaⁿ Tyꞌo̱o̱tsꞌom na jeeⁿ wiꞌ tsꞌoom jaa, macaⁿꞌa nda̱a̱ꞌyoꞌ yocheⁿ na cwitsaamꞌaⁿtiꞌyoꞌ na nñequiandyoꞌñꞌeⁿꞌyoꞌ na nlaꞌxmaⁿꞌyoꞌ chaꞌcwijom quiooꞌ na cwilaꞌcwjee nnꞌaⁿ judíos, cwii nnom na ljuꞌ, na cjaaweeꞌ tsꞌoom. Na nlꞌaꞌyoꞌ na ljoꞌ jeeⁿ xcwe nlaꞌtꞌmaaⁿꞌndyoꞌ jom.
2 Tancꞌomꞌyoꞌ na mati ꞌo cwilꞌaꞌyoꞌ ljoꞌ na cwintyꞌiaꞌyoꞌ na cwilꞌa nnꞌaⁿ tsjoomnancue, calaꞌchuiꞌyoꞌ cantyja na cwilaꞌtiuuꞌyoꞌ cha na luaaꞌ ntseixconaꞌ chaꞌtso cantyja na cwitsaamꞌaⁿꞌyoꞌ. Ee na nlꞌaꞌyoꞌ naljoꞌ nncueꞌntyjo̱ na nlaꞌno̱ⁿꞌyoꞌ chiuu waa na lꞌue tsꞌom Tyꞌo̱o̱tsꞌom ñꞌeⁿndyoꞌ, na juu joꞌ tjacantyja naya tseixmaⁿ, ndoꞌ cjaaweeꞌ tsꞌoom ndoꞌ canda̱a̱ꞌ tseixmaⁿnaꞌ.
3 Ncꞌe tsꞌiaaⁿ na jnda̱ tquiaa Tyꞌo̱o̱tsꞌom na matseixmaⁿya, joꞌ na matsjo̱o̱ya nda̱a̱ꞌyoꞌ, meiⁿcwiindyoꞌ ꞌo tincwinomꞌ na nncꞌoomꞌ tsꞌom cantyja ꞌnaaⁿꞌ nquii chaꞌxjeⁿ na matsonaꞌ na nncwjeiiⁿꞌeⁿ cwenta chiuu matseixmaaⁿ. Cwii ndoꞌ cwiindyoꞌ cwjiꞌya cwenta cwanti na jnda̱ tquiaa Tyꞌo̱o̱tsꞌom nnom na matseixmaⁿ na matseiyuꞌya tsꞌom ñꞌeⁿñê.
4 Tsꞌaⁿ ñecwiiñê sa̱a̱ jndye tjaacañjoomꞌñê, ndoꞌ cwii cwii joo na tjacañjoomꞌñê tiljoꞌyu tsꞌiaaⁿꞌnaꞌ ñꞌeⁿ ncꞌiaanaꞌ.
5 Maluaaꞌ waa na matseijomnaꞌ jaa nnꞌaⁿ na cwilaꞌyuuꞌa, meiiⁿ na jndyendyo̱ sa̱a̱ matseijoomꞌnaꞌ cantyja ꞌnaaⁿya na ñeꞌcwii seiꞌ cwiluiindyo̱ cantyja ꞌnaaⁿꞌ Cristo. Ndoꞌ tsꞌiaaⁿ na mañequiaa Tyꞌo̱o̱tsꞌom na calꞌaaya cwentaaⁿꞌaⁿ tjachuiiꞌnaꞌ na cwii cwiindyo̱.
6 Tsꞌiaaⁿ na mañequiaa Tyꞌo̱o̱tsꞌom na calꞌaaya, tiñecwii xjeⁿ joonaꞌ. Nqueⁿ matseijndaaꞌñê cwaaⁿ tsꞌiaaⁿ nntseixmaⁿ cwii cwiindyo̱. Sa̱a̱ macaⁿnaꞌ na calacanda̱a̱ꞌndyo̱ cwii cwii nnom tsꞌiaaⁿ na mañequiaaⁿ. Xeⁿ na jnda̱ tquiaaⁿ na ꞌnaaⁿꞌ tsꞌaⁿ na nnda̱a̱ nntseiteincooꞌ ñꞌoomꞌm nda̱a̱ nnꞌaⁿ, cwa catseicanda̱a̱ꞌñe tsaⁿꞌñeeⁿ juunaꞌ.
7 Ndoꞌ xeⁿ mañequiaaⁿ na macandaaꞌ tsꞌaⁿ na candiꞌntjom quiiꞌntaaⁿ nnꞌaⁿ na cwilaꞌyuꞌ, catsꞌaa tsꞌiaaⁿꞌñeeⁿ ñequio na xcweeꞌ tsꞌom. Ndoꞌ juu tsꞌaⁿ na macandaaꞌ na maꞌmo̱ⁿ nda̱a̱ ncꞌiaaꞌ, queⁿñe tsꞌiaaⁿꞌñeeⁿ.
8 Tsꞌaⁿ na macandaaꞌ na mañequiaa na tꞌmaⁿ nꞌom nnꞌaⁿ, tsꞌiaaⁿꞌñeeⁿ catsꞌaa. Ndoꞌ juu tsꞌaⁿ na niom sꞌom lꞌo̱ tintseintycwiiꞌ na nnteijndeii ncꞌiaaꞌ ꞌnaⁿ na matseiꞌtjo̱o̱naꞌ joona. Tsꞌaⁿ na ꞌnaaⁿꞌ na nluiitquieñe catsꞌaa naljoꞌ ñequio na machꞌeeñe cwenta. Ndoꞌ tsꞌaⁿ na mateijndeii nnꞌaⁿ na ntyꞌiaandye catsꞌaa naljoꞌ ñequio na neiiⁿꞌ.
9 Cꞌomꞌyoꞌ na wiꞌ nꞌomꞌyoꞌ ncꞌiaaꞌyoꞌ ñequio na mayoꞌcheⁿꞌyoꞌ, nchii cweꞌ cwilꞌaꞌyaꞌyoꞌ. Catseiqueeⁿnaꞌ nꞌomꞌyoꞌ chaꞌtso yuu na ya, sa̱a̱ yuu na tia cꞌomꞌyoꞌ na jndooꞌyoꞌ.
10 Cꞌomꞌyoꞌ na jnda nquiuꞌyoꞌ ncꞌiaaꞌyoꞌ chaꞌxjeⁿ ñeⁿnquii tsꞌaⁿ ntseinda ꞌo, ñequiiꞌcheⁿ calꞌaꞌyoꞌ na joona tꞌmaⁿti caluiindye, ñecuaa meiiⁿ ꞌo tjaa ꞌñeeⁿ catseitꞌmaaⁿꞌñe.
11 Tilaꞌnchqueeⁿꞌndyoꞌ tsꞌiaaⁿ ꞌnaaⁿꞌ Tyꞌo̱o̱tsꞌom na laꞌxmaⁿꞌyoꞌ. Cjooꞌ nꞌomꞌyoꞌ na cwindyeꞌntjomꞌyoꞌ nnom Jesucristo.
12 Cꞌomꞌyoꞌ na neiⁿꞌyoꞌ chaꞌtso na matseijndaaꞌñe Tyꞌo̱o̱tsꞌom na nñequiaaⁿ na nndaꞌyoꞌ. Quia majuꞌwiꞌnaꞌ ꞌo, cꞌomꞌtꞌmaaⁿꞌndyoꞌ nꞌomꞌyoꞌ. Ndoꞌ ñequiiꞌcheⁿ calaneiⁿꞌyoꞌ nnoom.
13 Quia matseitjo̱o̱naꞌ ꞌnaⁿ nnꞌaⁿ na maqueeⁿ cwentaaⁿꞌaⁿ, quiaꞌyoꞌ cantyja na cwileiñꞌomꞌyoꞌ na nnteijndeiinaꞌ naⁿꞌñeeⁿ. Cateiꞌxꞌeeꞌyoꞌ nnꞌaⁿ na cwilaꞌyuꞌ na cweꞌ cwiquieya na mꞌaⁿꞌyoꞌ.
14 Quia matseita̱a̱ꞌ tsꞌom tsꞌaⁿ ꞌo, nchii mati nlcweꞌ ꞌo ñꞌoom wiꞌ cjooꞌ tsaⁿꞌñeeⁿ. ꞌO cataⁿꞌyoꞌ na Tyꞌo̱o̱tsꞌom catioꞌnaaⁿñê juu.
15 Quia cwintyꞌiaꞌyoꞌ na neiiⁿ ncꞌiaaꞌyoꞌ na cwilaꞌyuꞌ, mati ꞌo cꞌomꞌyoꞌ na neiⁿꞌyoꞌ ñꞌeⁿndyena. Sa̱a̱ quia cwitjoomna na matseichjooꞌnaꞌ nꞌomna, mati ꞌo cꞌomꞌyoꞌ na chjooꞌ nꞌomꞌyoꞌ ñꞌeⁿndyena.
