Romanos 11:23-34 in Ixil

²³ Utz oj sataqꞌka qꞌu Israeel viqelbꞌalil tziꞌ utz, saꞌtekkꞌujeꞌ ikꞌuꞌl tiꞌ Tioxh, saveeti saqꞌaavoꞌk kꞌatz u Tioxh. Tan mam Tioxh u Tioxh aas ech siꞌaneꞌ. Echaꞌ qꞌaav toksal qꞌul iqꞌabꞌaj u tzeꞌ kꞌatz imukanil.

²⁴ Tan echaꞌ ex. Kꞌuxh tiira paarten etetz bꞌanel, vettoksaꞌex u Tioxh kꞌatza. Ech koꞌn ex viqꞌabꞌ u xoꞌl tzeꞌil olivo vaꞌl nichikax jeꞌ viꞌ viqꞌabꞌ u nojla olivo, kꞌuxh yitꞌeꞌch koj chit u tetz. Ech oj vetiꞌan u bꞌaꞌnil u Tioxh sete, ex puera aanima, ¿aꞌ chixh qꞌu Israeel yeꞌ siqꞌaavixsaꞌ ok u Tioxh sikꞌatza? Tan aal meero itenamnale. Ech siꞌan te u toksal viqꞌabꞌ u nojla olivo kꞌatz vaꞌl imukanil atkoꞌxhtuꞌ.

²⁵ Uncheeꞌ, aꞌ unsaꞌ setootzaji hermanos, aas kam tok qꞌu kam iꞌan u Tioxh, qꞌuꞌl yeꞌ ootzajibꞌe. Tan oj yeꞌk setootzaji, bꞌaꞌn siꞌaneꞌ aas setꞌanbꞌaꞌ etibꞌ vatz qꞌu Israeel. Tan kꞌuxh vetmotxitiibꞌixsa taanima unjolol qꞌu Israeel, saꞌnalmotxqꞌaavoꞌk kꞌatz Tioxh atziꞌ. Loqꞌ tzojpu nal vitiempoil qꞌu puera aanima.

²⁶ Ech xamtel saok kajay qꞌu Israeel. Utz sachitpi tu qꞌul ipaav. Echaꞌ vaꞌl nital u Yolbꞌal Tioxh: —Aꞌ sakꞌaskuꞌl u Chitol tu Sioon utz, suꞌlichit qꞌul ituꞌxh ixalam u Jacoob tu qꞌul ipaav.

²⁷ Tan aꞌ u nukꞌuꞌm sunbꞌan tuchꞌ aas saveesa qꞌul ipaav kꞌatza.— Chu u Tioxh.

²⁸ Ech koontra nibꞌenku qꞌu Israeel vatz u Tioxh tan, yeꞌ nimotxikꞌul u bꞌaꞌnla chusbꞌal. Pek kꞌuxh echi, tii u Tioxh tiꞌ majte tan, iꞌan maꞌl u nukꞌuꞌm u Tioxh tuchꞌ qꞌul ikꞌuy imam. Ech jolol tetz u Tioxh.

²⁹ Tan kam u oya vaꞌl nitaqꞌ u Tioxh, yeꞌxhkam niqꞌaavimaaeꞌ. Utz kam vaꞌl nitaleꞌ, yeꞌ koj nitzojpi.

³⁰ Echaꞌ ex. Exich qelol maꞌxh tiempo majte. Pek vetikuylex u Tioxh tiꞌ viqelon qꞌu Israeel.

³¹ Tan jolol qelol cheel. Pek tu vibꞌaꞌnil u Tioxh vaꞌl niꞌan setiꞌ. Antu qꞌu Israeel samotxkꞌulun vibꞌaꞌnil u Tioxh majte.

³² Tan taqꞌ tzii u Tioxh tiꞌ qꞌu aanima kajayil aas saqeloni. Loqꞌ aꞌ isaꞌ aas xamtel sitxum ivatz qꞌu aanima kajayil majte.

³³ ¡Tan tiira mam bꞌaꞌnil atil xeꞌ u Tioxh! ¡Mam txumbꞌal! ¡Mam ootzajibꞌal! ¡Ootzajibꞌe koj kam ech niꞌaneꞌ aas nitiqꞌo tibꞌ qꞌu kam taqꞌo! ¡Yeꞌxhabꞌil sapaal itxumbꞌal tu qꞌu kam niꞌaneꞌ!

³⁴ Tan ¿abꞌil maꞌj ootzajin tetz kam qꞌu kam nititzꞌa u kuBꞌaal? Utz ¿abꞌil saꞌalon itxumbꞌal aas kam siꞌaneꞌ?

²³ Pet asoj la ikꞌujbꞌaꞌ veꞌt unqꞌa tiaal Israel ikꞌuꞌl tiꞌ u Jesús, as ech la ibꞌan chajnajeꞌ echeꞌ kat ulbꞌel umaj qꞌabꞌ tzeꞌ uvaꞌ la oksal ok kꞌatz u tzeꞌeꞌ unpajte, tan at iyakꞌil u Tiixheꞌ tiꞌ toksat ok Aak chajnaj skꞌatz unpajte.

²⁴ ¿As aꞌ kol chit yeꞌ la ibꞌan Aak qꞌa te chajnaj uvaꞌ ech tatin chajnajeꞌ echeꞌ u qꞌabꞌ tzeꞌeꞌ uvaꞌ atik chit stiꞌ bꞌaxa? Tan kat toksa ok ex Aak skꞌatz echeꞌ unqꞌa qꞌabꞌ tzeꞌeꞌ uvaꞌ bꞌex eqꞌoloj tzan tu koobꞌaleꞌ. As kat oksal ok tiꞌ u tzeꞌeꞌ.

²⁵ Vitzꞌin vatzik, aꞌ ni valeꞌ uvaꞌ la etootzi isuuchil umaꞌl u yol uvaꞌ nisaꞌ u Tiixheꞌ uvaꞌ la qootzi veꞌteꞌ, aqꞌal uvaꞌ yeꞌ la ejeꞌsa etibꞌ tukꞌ vetxumbꞌaleꞌ. As palojtaj oꞌ stuul uvaꞌ kat itiibꞌisa veꞌt Aak u taanxelal unjolol unqꞌa tiaal Israel. As lanal ok veꞌt unqꞌa tenameꞌ skajayil uvaꞌ txaael taꞌn Aak uvaꞌ jit tiaal Israel.

²⁶ As aꞌn la ok veꞌt unqꞌa tiaal Israel skajayil kꞌatz Aak, echeꞌ uvaꞌ ni tal u yol uvaꞌ tzꞌibꞌamal kan uvaꞌ ech ni tal ileꞌ: Tan echen la tzaakat u qꞌalpun tetz unqꞌa tenameꞌ tu u Sion. As la ul teesa veꞌt Aak unqꞌa paasan tziileꞌ tu u taanxelal unqꞌa tiaal u Jacob.

²⁷ As aꞌ u akꞌ tzaqꞌiteꞌ uvaꞌ la unjej kan xoꞌl unqꞌa tiaal u Jacob tul uvaꞌ la unsotzsa vipaaveꞌ, tiꞌk Aak.

²⁸ Asoj la qitzꞌa u bꞌaꞌnla yoleꞌ, as la pal oꞌ stuul uvaꞌ kat ixval kan unbꞌiil unqꞌa tiaal Israel taꞌn u Tiixheꞌ, aqꞌal uvaꞌ la aqꞌax etokebꞌal tiꞌ etabꞌit isuuchil u bꞌaꞌnla yoleꞌ, ex uvaꞌ jit ex tiaal Israel. Pet xoꞌntel unqꞌa tiaal Israel te Aak, tiꞌ uvaꞌ maꞌtik itxaat Aak unqꞌa qꞌesla ibꞌaal unqꞌa tiaal Israel bꞌaxa,

²⁹ tan taꞌneꞌ kat taqꞌ Aak vibꞌaꞌnileꞌ te unqꞌa tiaal Israel, as yeꞌle la imaa veꞌt Aak ste. As kat imolo Aak unqꞌa tiaal Israel tiꞌ tok sitenam Aak, as yeꞌle la isotzsa Aak skꞌuꞌl.

³⁰ As echeꞌ taꞌ ex tan yeꞌ nik enima u Tiixheꞌ bꞌaxa. As kat itxum veꞌt Aak evatz, tul kat tixva veꞌt unqꞌa tiaal Israel Aak.

³¹ As ech kat ibꞌan unqꞌa tiaal Israel, tan kꞌuxh nipaasa tzii, as techal la ilej umaꞌl u qꞌii uvaꞌ la itxum veꞌt u Tiixheꞌ ivatz chajnaj echeꞌ kat ibꞌan Aak tiꞌ itxumlu evatz, tul uvaꞌ nik etixva Aak.

³² As kat tal veꞌt Aak uvaꞌ at ipaav unqꞌa tenameꞌ skajayil tiꞌ ibꞌanat u paasan tziileꞌ vatz Aak. Pet ech kat ibꞌan Aak ileꞌ, tiꞌ uvaꞌ la itxum Aak ivatz unqꞌa tenameꞌ skajayil.

³³ ¡As yeꞌl iyaꞌtebꞌal as mitaꞌn imoxtebꞌal vibꞌaꞌnil vitxumbꞌal Aakeꞌ, tan Aakeꞌ ootzin tetz skajayil! ¡As yeꞌxhebꞌil chiteꞌ la pal tu vitxumbꞌal Aakeꞌ uvaꞌ kam ni tal taama Aak as tukꞌ uvaꞌ nibꞌan Aak!

³⁴ As yeꞌxhebꞌil ootzin tetz vitxumbꞌal u Kubꞌaal Tiixheꞌ. As yeꞌxhebꞌil la alon itxumbꞌal Aak unpajte.