Romanos 10:9-19 in San Blas Kuna

⁹ Ar dulemarga bela be sogele, “Jesús, Bab-Dummadye,” degine, be-gwagegi be bensulile, Bab-Dummad, we-Jesús burgwarmalad-abargi gannar odulosye, be abonolegodo.

¹⁰ Ar be isgussuliyob-daklegega, gwagegi Jesúsʼgi-bensuli be guergebed. Be abonolegegardi, gayagi be sogergebed, Jesús, Bab-Dummadye.

¹¹ Ar Bab-Dummad-Gardagi soged: “Ar dule agi bensulile, suli-suli itogosulid.”

¹² Ar Bab-Dummad Judíoʼmar, degi, Judíoʼsurmalad, akar-akar daksulid, emarbi daked. Ar Bab-Dummad ebi wargwenna bela dulemar-e-Dummadga maid, bela obinagwar dulemar-ese-goledga ibmar ukmaid.

¹³ Ar Bab-Dummad-Gardagi sognaid: “Bela dulemar Bab-Dummad e-Bab-Dummadga imakmaladi, bela abonolemaloed.”

¹⁴ Emisgi, ar Jesucristoʼgi amba benmalale, ¿igi-degite, e-Bab-Dummadga imakosunna? Ar Jesucristo-nug itodisurmalale, ¿igi egi bensuli gumalosunna? Ar dule ega Bab-Dummad-Gayaburba-Nuedgi-sunmaksulile, ¿igi-Jesucristo-nug itomalosunna?

¹⁵ Ar dule barmilesulile, ¿doa Bab-Dummad-Gayaburba-Nuedgi sunmakosunna? Ar weyob Bab-Dummad-Gardagi narmakar naid: “Ibibayobi nuedi, we-dulemar-gayaburba-nuegan-berbemalad-danikid, Bab-Dummad-Gayaburba-Nued sedanikid.”

¹⁶ Ar degite, bela Israel-dulemar Bab-Dummad-Gayaburba-Nued-sogedba imaksasurmalad. Agala Isaías sogsad: “Bab-Dummad, wede, ¿doa anmar-ibmar-sogsad bengussuli?”

¹⁷ Degisoggu, ar dule e-uayagwar Bab-Dummad-Gayaburba itogergebed. Geb agi Jesucristoʼgi bensuli gunonikoed. We-gayaburba-itogoedi, Cristoʼgi-sunmaklenaid itogoed.

¹⁸ Ar an egismosundo: ¿Wede Israel-dulemar, Bab-Dummad-gayaburba itossurmarsi? Itosmala. Ar Bab-Dummad-Garda soged: “Bab-Dummad-gayaburba-barsoglenaid, bela napneg-naidgi barmilesad. Ar sukun-gwen-bessuli e-gayaburba warmaknaid.”

¹⁹ Degine, an egisbarsundo: ¿Wede, Israel-dulemarde we gayaburba wisgussurmarsi? Wisgusmala. Ar Moisés-inse gebe-sogsad: Bab-Dummad soged: “An-dulasurmalad an sabguoed, bemar, a-dulemargi nobgumaloed. An dule-binsaed-satemaladgi nabir binsaoed, bemar, a-dulemargi uludoed.”

⁹ Ar dulemarga bela be sogele, “Jesús, Bab Dummadye,” degine, be-gwagegi be bensulile, Bab Dummad we-Jesús burgwarmalad-abargi gannar odulosad, be abonolegodo.

¹⁰ Ar gwagegi be Jesúsgi bensuli guer-gebed, iskussuliyob be daklegegar. Be-abonolegegardi gayagi be soger-gebed, Jesús, Bab Dummadye.

¹¹ Ar Bab-Dummad-Gardagi soged: Bela dulemar-egi-bensurmalad gwen bingeguosurmarye.

¹² Ar Judio, degi, Judiosurmalad Bab Dummad amar akar-akar daksulid, emarbi daked. Ar Bab Dummad na ebi wargwenna bela dulemar-e-dummadga maid, bela unnitiba dulemar-ese-goledga ibmar-imakmaid.

¹³ Ar Bab-Dummad-Gardagi sognaid: Bela dulemar-Bab-Dummadse-gormalad, amar bela abonolemaloye.

¹⁴ ¿Ar Jesucristogi amba benmalar, degite, igi ese gormalosunna? ¿Ar degite, igi Jesucristogi bensuli gumalosunna, ar itodisurmalar, doa Jesucristo? ¿Degite, igi itomalosunna doa Jesucristo, ar dule ega Bab-Dummad-gaya-burba-nuedgi sunmaksulir?

¹⁵ ¿Ar degite, igi Bab-Dummad-gaya-burba-nuedgi dule ega sunmakosunna, ar dule ese barmiledsulir? Suli, ega sunmakosuli. Ar weyob Bab-Dummad-Gardagi narmakar naid: Ibibayobi nuedi, we-dulemar-gaya-burba-nuegan-berbemalad, sogdanimalad, Bab Dummad dulemar-ebo igar nudakye.

¹⁶ Ar degite, bela Israel-dulemar Bab-Dummad-gaya-burba-nued-sogedba imaksasurmalad. Ar Isaías soged: Bab Dummad, ¿wede doa anmarba ibsasmala, anmar ibmar sogmaladba? Ichee wis anmarba ibsasmalad.

¹⁷ Degisoggu, ar dule e-uayagwar itoger-gebed, geb agi Jesucristogi bensuli-gunonikoed. We itogedi, Bab-Dummad-gaya-burba itoger-gebed.

¹⁸ Ar an egismosundo: ¿Wede Israel-dulemar Bab-Dummad-gaya-burba itossurmarsi? Itosmala. Ar Bab-Dummad-Garda soged: Bab-Dummad-gaya-burba-abingasad-barsogmalad, e-sunmaksamalad bela napneg-naidse barmilesye, ar sukun gwen bessuli e-gaya-burba barmilesye.

¹⁹ Degine, an egisbarsundo: ¿Wede, Israel-dulemarde we gaya-burba wisgussurmarsi? Wisgusmala. Ar Moisés-insa gebe soged: Bab Dummad sogye: “An-dulesulid an sabguoye, adi bemar a-dulemargi nobgumalagarye, An dulemar-binsaedsulidgi nabir binsaoye, adi bemar-ourwemalagarye.”