ROMANOS 10:11-20

¹¹In ulal an T’ocat Thuchlab abal jitats quim bela’ a Cristo yab ne’ets ca tithebe ti belom.

¹²A Dios yab im poc’oth tsu’tal an Israelchic ani axi yab Israel. Cum pel i Ajatic c’al patal an inicchic in lej lablinchal jitats c’al ta ca palenchat.

¹³Antsana’ ti thuchathits abal patal jitats quim palenchi im bij an Ajatic ne’ets ca jec’ontha.

¹⁴Biyat yabaye im belamalchic yab ne’ets quim palenchi, ani yab ne’ets quim bela’ max yab ca olchinchatchic im bij an Ajatic. Ani yab ne’ets ca olchinchatchic max yab hua’ats i olchinchix.

¹⁵Ani ni jita’ yab in ejtohual ti olchinchix max yab ca abatna c’al a Dios. An T’ocat Thuchlab in olnal axi olchinchix antse’: Lej alabel in xe’tsintal jitats xe’ets ti olchinchix c’al an alhua’ cau c’al ca jun ejetbethanchat in ichich an inicchic c’al a Dios.

¹⁶Yab patal an inicchic axi ca olchinchat an alhua’ cau ne’ets quim bina’ in xutsun quin ats’a’. Antsana’ in tsalpay a Isaías tam in conoy a Dios jita’ ne’ets quim belchi in cahuintal.

¹⁷An inicchic quin ats’a’ an alhua’ cau ani tam ne’ets quin ejtou quim belchi. Quin ats’anchi jahua’ ca olnanchat tin cuenta a Cristo.

¹⁸Auxe’ max an inicchic yab in ats’amal an alhua’ cau. Jal i in ats’amalits jant’ini’ tin ulal an T’ocat Thuchlab antse’: A Dios in aba’ i olchinchixchic tim puhuel an tsabal quin olchinchi an inicchic in cahuintal. Ulthanchatits in cahuintal ma ju’tamits hua’ats i inic.

¹⁹Hualam max an Israelchic yab in lej t’ajchi ti cuenta in cahuintal a Dios antse’. Moisés in thucha’ jahua’ in ulu a Dios: Ne’ets cu t’aja’ abal tata’ an Israelchic ca pa’ixna’ i bichou axi yab pel u c’al. Ne’ets quit tsacuychic tam nan cu tolmiy am bichou axi yab tin ejtinchal u cahuintal.

²⁰C’al i lej inictalab a Isaías in olna’ jahua’ in ulu a Dios antse’: Tin ela’ i inicchic axi yab tin aliyamal. U tejhua’metha’ tu ba’ c’al axi yab in luba’chic tiquin exla’.