Romanos 10:10-21 in Achi

¹⁰ Man ruʼ ka cʼux caka cojo chi Jesucrísto are i Tolke; are ile ca ʼanaw chake oj ʼutz chuwach i Dios. Xak ruʼ ka chiʼ caka bij chi cul ka cʼux che i Jesucrísto; queje ile caka rik i ʼelbal ke chi sak.

¹¹ Chupam u wuj i Dios, queje iri cu bij: “Niʼpa i quiqui cuba qui cʼux che ire, cril na ʼuri chi sakil wach i xroyʼej che.” (Queje ile cu bij.)

¹² I winak, n-ta coʼono we je aj Israel, o we ne aj Israel taj, xa jun i Kajwal ʼo pakawi. Ire, nim i cu ya chique conojel niʼpa i quiqui tzʼonoj qui tobal che.

¹³ Ketaʼam ile, man chupam u wuj i Dios cakil i tzij-i: “Niʼpa i quiqui tzʼonoj qui tobal che i Kajwal, que totajic.” Queje ile cu bij.

¹⁴ Xui-ri, ¿wach u tzʼonoxic qui tobal che, we n-qui cubam ti qui cʼux che? Xak ¿wach i u cubaxic qui cʼux che, we n-qui tom ti u tzij? Xak ¿wach u tayic u tzij quiqui ʼano we n-ta jun ca bin chique?

¹⁵ ¿Wach u ʼenam jun chu bixquil u tzij i Dios chique, we n-ta jun ca takaw bic? Xui-ri, ketaʼam chi ʼo i que u tako man chupam u wuj i Dios queje iri cu bij: “¡Lic ʼutz lic chom i qui cʼunic i je ucʼawnak li tzij re uxlambal cʼuxij; chom i qui cʼunic i je aj paxsanel re i ʼutz laj tzij!” (Queje ile tzʼibtalic.)

¹⁶ Xui-ri, n-conojel taj quiqui coj i ʼutz laj tzij re i tobal-que. Queʼelok pacha xu bij i mam Isaías ujer: “Kajwal, ¿pachin nawi coj cojowic, wach i ka bim?” (Queje ile xu bij che i Dios.)

¹⁷ Mi jun cu cuba u cʼux che i Crísto we nu tom taj wach usucʼ. Xak mi jun cu ta usucʼ we n-ta jun ca bin che.

¹⁸ Woʼor quin tzʼonoj ʼut: ¿Xataba n-qui tom ti ʼutz laj tzij? ¡Qui tom pues! Ketaʼam chi qui tom, man chupam u wuj i Dios queje iri cu bij: I qui chʼawbal in takon, qui tom chic i winak ronojel u wach i jyub taʼaj; i qui tzij upon-nak chic cʼa naj pa ca ʼe qʼuis wi i jyub taʼaj. (Queje ile xu bij i Dios.)

¹⁹ Xak quin tzʼonoj chic: I aj Israel winak, ¿xataba n-xqui ta tu be wach cu ʼan ni Dios? Xqui ta pues. Nabe, i mam Moises mísmo cu ʼalijinsaj ile chake, man xu tzʼibaj i tzij-i chi xu bij i Dios chique i aj Israel: Yin quin ʼan na ʼo ni cʼaxnabal in cʼux chique i ne te aj Israel winak, tupu n-ta que chwe qui bij yix; rumal-i, ca tiʼan na chiwe yix wach i cʼax nabal-que quin ʼano. Yin quin ʼan na chi ca pe ni iwoywal yix cumal i juban tinimit chi n-ta kas qui nojbal, qui bij yix. (Queje ile xu bij i Dios.)

²⁰ Teʼuri i mam Isaías, co u cʼux, xu bij i tzij-i chi xbix che rumal i Dios: Ique chi n-xin qui tzucuj taj, xin qui riko; ique chi n-xqui chʼob ti in tzucuxic, xin cʼut wib chique. (Queje ile xu bij i Dios chiquij i ne te aj Israel winak.)

²¹ Péro, chiquij i aj Israel winak, Dios cu bij i tzij-i: “Yin n-in mayim ti qui siqʼuixic jun tinimit je kelkel, jun tinimit chi n-cacaj ta que cojon chwe.” (Queje ile xu bij i Dios, chi u tzʼibam i mam Isaías.)

¹⁰ Ma pa ri qanimaꞌ kaqakoj wi waꞌ chaꞌ kojuꞌan jusukꞌ chwach ri Dios; yey rukꞌ kꞌu ruchiꞌ qaqul, kaqaqꞌalajisaj Rire e Qajawal chaꞌ jelaꞌ kojkolobꞌetajik.

¹¹ Ma Ruchꞌaꞌtem ri Dios jewaꞌ kubꞌiꞌij puwi ri Cristo: China ri kakubꞌiꞌ ukꞌuꞌx rukꞌ, na kakꞌixbꞌesax taj ma kukꞌul na ri royeꞌem che Rire kachaꞌ.

¹² Echiriꞌ kubꞌiꞌij «china», waꞌ keꞌelawi tobꞌ e aj judiꞌabꞌ o na e ta aj judiꞌabꞌ, ma xaqi junam kiwach. Ma ri Qanimajawal e Kajawal ke konoje, tobꞌ junwi taq ri kitinamit. Yey Rire kuya ri unimal rutzil ukꞌuꞌx chike konoje ri kakitzꞌonoj toꞌbꞌal ke che.

¹³ Ma Ruchꞌaꞌtem ri Dios jewaꞌ kubꞌiꞌij: E janipa ri kakitzꞌonoj kolobꞌetajik chupa rubꞌiꞌ ri Qanimajawal, riꞌ kekolobꞌetaj na kachaꞌ.

¹⁴ ¿Suꞌanik kꞌu riꞌ kakitzꞌonoj kolobꞌetajik chupa rubꞌiꞌ ri Qanimajawal we na kikojom ta rubꞌiꞌ nabꞌe? ¿Yey suꞌanik kakikoj rubꞌiꞌ we na kitom ta puwi Rire? ¿Yey suꞌanik kakita ri tzijonik puwi Rire we na jinta junoq katzijow re chike?

¹⁵ ¿Yey suꞌanik e kꞌo ri ketzijon puwi ri Qanimajawal we na jinta junoq kataqaw bꞌi ke chaꞌ kakiꞌan wa tzijonik? E pachaꞌ ri tzꞌibꞌital kan chupa Ruchꞌaꞌtem ri Dios: ¡Lik chom ri kikꞌunik ri kakikꞌam lo ri tzijonik re ri utzil chomal, ri kekꞌun che utzijoxik ri Utzilaj Tzij! kachaꞌ.

¹⁶ Noꞌj na konoje ta kꞌut xekojow re ri Utzilaj Tzij xtzijox chike. E pachaꞌ ri xubꞌiꞌij kan ri Isaías: Qajawal, ¿kꞌo nawi junoq kojoyom re ri qatzijom chik? xchaꞌ.

¹⁷ Ri kubꞌulibꞌal kikꞌuꞌx ri tikawex kujeqo echiriꞌ kakita ri katzijox chike; yey waꞌ wa kakito, e Ruchꞌaꞌtem ri Dios puwi ri Cristo.

¹⁸ Noꞌj kantzꞌonoj kꞌut: ¿Na xkita ta nawi ri Utzilaj Tzij? ¡Qatzij, xkito! Ma e pachaꞌ ri kubꞌiꞌij Ruchꞌaꞌtem ri Dios: Che ronoje ruwachulew xtataj wi ri kiqul ri xetzijon puwi ri Dios; y ri kichꞌaꞌtem oponinaq pa ronoje luwar che ruwachulew kachaꞌ.

¹⁹ Kantzꞌonoj tanchi kꞌut: ¿Raj Israel na ketaꞌam ta nawi waꞌ? ¡Ketaꞌam! Nabꞌe na, e pachaꞌ ri xutzꞌibꞌaj kan ri Moisés puwi ri xubꞌiꞌij lo ri Dios chike raj Israel: Riꞌin kanꞌan chiwe kuꞌan kꞌax ikꞌuꞌx chirij jun “tinamit” na tinamit taj; kampetisaj iwoyowal chirij jun tinamit na jinta ketaꞌam puwi ri Qꞌijsaq xchaꞌ.

²⁰ Jekꞌulaꞌ, ri Isaías xuchꞌij ubꞌiꞌxikil ri ubꞌiꞌim lo ri Dios pakiwi ri na e ta aj Israel: Xinriqitaj kꞌu kuma ri na kinkitzukuj taj, yey xinqꞌalajisaj kꞌu wibꞌ chikiwach ri na xinkitzꞌonobꞌej taj xchaꞌ.

²¹ Noꞌj pakiwi raj Israel, jewaꞌ xubꞌiꞌij lo ri Dios: Lik xinelaj chike jun tinamit e aj palajiy tzij y e titzꞌitaq chaꞌ ketzelej tanchi lo wukꞌ xchaꞌ.

¹⁰ Ma pa ri kanimaꞌ cakacoj wi waꞌ chaꞌ cojuꞌan jusucꞌ chwach ri Dios; yey rucꞌ cꞌu ruchiꞌ kakul, cakakꞌalajisaj Rire e Kajawal chaꞌ jelaꞌ cojcolobetajic.

¹¹ Ma Ruchꞌaꞌtem ri Dios jewaꞌ cubiꞌij puwi ri Cristo: China ri cacubiꞌ ucꞌuꞌx rucꞌ, na caqꞌuixbesax taj ma cucꞌul na ri royeꞌem che Rire cachaꞌ.

¹² Echiriꞌ cubiꞌij «china», waꞌ queꞌelawi tob e aj judiꞌab o na e ta aj judiꞌab, ma xaki junam quiwach. Ma ri Kanimajawal e Cajawal que conoje, tob junwi tak ri quitinamit. Yey Rire cuya ri unimal rutzil ucꞌuꞌx chique conoje ri caquitzꞌonoj toꞌbal que che.

¹³ Ma Ruchꞌaꞌtem ri Dios jewaꞌ cubiꞌij: E janipa ri caquitzꞌonoj colobetajic chupa rubiꞌ ri Kanimajawal, riꞌ quecolobetaj na cachaꞌ.

¹⁴ ¿Suꞌanic cꞌu riꞌ caquitzꞌonoj colobetajic chupa rubiꞌ ri Kanimajawal we na quicojom ta rubiꞌ nabe? ¿Yey suꞌanic caquicoj rubiꞌ we na quitom ta puwi Rire? ¿Yey suꞌanic caquita ri tzijonic puwi Rire we na jinta junok catzijow re chique?

¹⁵ ¿Yey suꞌanic e cꞌo ri quetzijon puwi ri Kanimajawal we na jinta junok catakaw bi que chaꞌ caquiꞌan wa tzijonic? E pachaꞌ ri tzꞌibital can chupa Ruchꞌaꞌtem ri Dios: ¡Lic chom ri quicꞌunic ri caquicꞌam lo ri tzijonic re ri utzil chomal, ri quecꞌun che utzijoxic ri Utzilaj Tzij! cachaꞌ.

¹⁶ Noꞌj na conoje ta cꞌut xecojow re ri Utzilaj Tzij xtzijox chique. E pachaꞌ ri xubiꞌij can ri Isaías: Kajawal, ¿cꞌo nawi junok cojoyom re ri katzijom chic? xchaꞌ.

¹⁷ Ri cubulibal quicꞌuꞌx ri ticawex cujeko echiriꞌ caquita ri catzijox chique; yey waꞌ wa caquito, e Ruchꞌaꞌtem ri Dios puwi ri Cristo.

¹⁸ Noꞌj cantzꞌonoj cꞌut: ¿Na xquita ta nawi ri Utzilaj Tzij? ¡Katzij, xquito! Ma e pachaꞌ ri cubiꞌij Ruchꞌaꞌtem ri Dios: Che ronoje ruwachulew xtataj wi ri quikul ri xetzijon puwi ri Dios; y ri quichꞌaꞌtem oponinak pa ronoje luwar che ruwachulew cachaꞌ.

¹⁹ Cantzꞌonoj tanchi cꞌut: ¿Raj Israel na quetaꞌam ta nawi waꞌ? ¡Quetaꞌam! Nabe na, e pachaꞌ ri xutzꞌibaj can ri Moisés puwi ri xubiꞌij lo ri Dios chique raj Israel: Riꞌin canꞌan chiwe cuꞌan cꞌax icꞌuꞌx chirij jun “tinamit” na tinamit taj; campetisaj iwoyowal chirij jun tinamit na jinta quetaꞌam puwi ri Kꞌijsak xchaꞌ.

²⁰ Jecꞌulaꞌ, ri Isaías xuchꞌij ubiꞌxiquil ri ubiꞌim lo ri Dios paquiwi ri na e ta aj Israel: Xinrikitaj cꞌu cuma ri na quinquitzucuj taj, yey xinkꞌalajisaj cꞌu wib chiquiwach ri na xinquitzꞌonobej taj xchaꞌ.

²¹ Noꞌj paquiwi raj Israel, jewaꞌ xubiꞌij lo ri Dios: Lic xinelaj chique jun tinamit e aj palajiy tzij y e titzꞌitak chaꞌ quetzelej tanchi lo wucꞌ xchaꞌ.