ROMANOS 10:1-16 in Tzotzil

¹ Quermanotac, taca coluc ti jchi'iltique, nichim no'ox co'nton. Hech yu'un scotol c'ac'al ti jc'opombe Dios ti stojolic yu'un ac'o coluc.

² Lec ti toyol yo'ntonic ti stojol ti Diose, pero hovil. Mu hechuc ti ch'unel ti Diose hech chaj c'u che'el chch'unic.

³ Yu'un mu xch'unic ti chijyac'bucutic toj co'ntontic ti Diose. Yu'un tscuyic ti hech toj yo'ntonic chc'otic ti sventa yabtelic, hech yu'un mu sc'an ti ch-ac'batic toj yo'ntonic yu'un ti Diose.

⁴ Yu'un i'ay xa ti Cristoe hech yu'un ilaj sc'opilal ti mantaletique. Yu'un hech xu' ti toj yo'nton ch-ilat yu'un ti Diose scotol ti much'utic chch'unic ti icham yu'unic ti Cristoe.

⁵ Yu'un ti Moisese laj sts'iba ti c'u che'el toj co'ntontic chijyil yu'un ti jch'untic ti mantaletique. Hech laj yal: “Ti much'u chch'un scotol ti jmantale, ja' chcuxi sbatel osil”, xchi ti Diose, xchi ti Moisese. Pero mu'yuc much'u ihu' yu'un laj xch'un scotol.

⁶ Ti ho'ucutique ti toj co'ntontic chijyilucutic ti Diose ti sventa xch'unojel co'ntontique, mu yu'unuc ta to xba quic'tic tal ti vinajel ti Jcoltavanej cu'untique. Mu yu'unuc ta to xba jsa'tic yo' bu ti much'utic mucajtic ti ch'ene. Yu'un i'ay xa li' ti balumile ti Cristoe, icham, icha'cuxi loq'uel ti ch'en, patil isut batel ti vinajel, te xa oy ti ora to. Hech yu'un mu nomuc ti jcoleltique, li' xa oy ti jtojoltiqui. Yu'un mi jamal chcaltic ti ja' Cajvaltic cu'untic ti Jesuse, mi jch'unojtic ti icha'cusesat loq'uel tal ti ch'en yu'un ti Diose, hech chijcolucutic sbatel osil. Hech cac'oj jba ti jcholtutic.

¹⁰ Yu'un mi oy xch'unojel co'ntontic, ja' toj co'ntontic chijyilucutic ti Diose. Mi jamal chcaltic ti ja' Cajvaltic cu'untique, hech yu'un chijcolucutic o.

¹¹ Yu'un hech ts'ibabil comel ti sun ti Diose ti vo'one: “Scotol ti much'u chch'unic ti chcoltaat yu'un ti Jnich'one, mi jutuc mu xlaj ti lo'lael”, xchi ti Diose.

¹² Ti Diose mu'yuc sc'opilal mi judioucutic, mi yanlum crixchanooxuc. Ti Diose ja' ajvalil cu'untic jcotoltic. Co'ol chc'uxubin scotol ti much'utic chalbeic vocol ti stojole. Ep chijyac'bucutic bendición jcotoltic.

¹³ Yu'un scotol ti much'u chalbeic vocol ti stojol ti Cajvaltique, ja' chcolic sbatel osil.

¹⁴ ¡Bu ba yalbeic vocol ti stojol ti Cajvaltique mi mu xch'unic ti chcoltaatic yu'un! ¿C'u chut xch'unic mi mu ya'yojbuc sc'opilale? ¿C'u che'el cha'ibeic sc'opilal mi mu'yuc much'u chba xcholbe ya'yique?

¹⁵ ¡Bu ba xcholic ti sc'op ti Diose mi mu tacbiluc batel yu'un ti Diose! Hech ts'ibabil comel: “Lec ch-a'ibat sc'op ti much'utic chba xcholic ti lequil ach' c'ope”, ti xchie.

¹⁶ Tsc'an ti Diose ti chcol scotolic pero mu scotoluc xch'unojic ti lequil ach' c'ope. Ja' no'ox hech laj yal uc ti Isaíase ti vo'onee. Hech laj yal: “Cajval, jun to mu'yuc much'u chch'un ti ac'op ti calojbetutique”, xchi ti Isaíase, xut ti Diose.

¹ Ti oyuc cꞌuxi xcolic li jchiꞌiltac ta israelale, jaꞌ ximuybaj o. Scotol cꞌacꞌal ta jcꞌoponbe Dios ta stojolic ti acꞌo colicuque.

² Ta sloqꞌuel yoꞌonic yichꞌojic ta mucꞌ Dios ti yalojique, pero altic. Yuꞌun mu jechuc smelol ta ichꞌel ta mucꞌ.

³ Yuꞌun mu xaꞌibeic smelol ti cꞌu sba ti muꞌyuc jmultic chijyilutic li Diose. Ta xalic noꞌox ti jaꞌ ta sventa li cꞌusi ta spasic stuquic ti muꞌyuc smulic ta xꞌileic o yuꞌun li Diose. Mu schꞌunic ti yaloj Dios ti jaꞌ ta sventa li Cristo ti muꞌyuc jmultic chijyilutic o li Diose.

⁴ Yuꞌun li buchꞌutic ta schꞌunic ti jaꞌ Yajcoltavanejic li Cristoe, muꞌyuc smulic ta xꞌileic o yuꞌun li Diose. Jaꞌ ta xvinaj o ti mu xijcol yuꞌun li smantaltac li Diose.

⁵ Li buchꞌutic ta xalic ti ta sventa mantal lec ch‐ileic yuꞌun li Diose, jaꞌ to jech xuꞌ muꞌyuc smul ch‐ileic mi ta schꞌunbeic scotol smantaltac li Diose jech chac cꞌu chaꞌal la stsꞌiba li Moisés ta voꞌonee.

⁶ Yan li joꞌotic ti muꞌyuc xa jmultic chijyilutic li Dios ta sventa ti jchꞌunojtic ti jaꞌ Cajcoltavanejtic li Cristoe, mu me xuꞌ chcaltic: “¿Buchꞌu xuꞌ ta xyal talel ta vinajel yoꞌ chiscoltautic? ¿Buchꞌu xuꞌ ta xchaꞌcuxi yoꞌ chiscoltautic?” mu me xuꞌ xijchi. Yuꞌun a xa chamuc ta jcojtic liꞌ ta balumil li Cristoe, pero ichaꞌcuxi. Jaꞌ jech chal li cꞌop ti chcale, jaꞌ chꞌunic. Yuꞌun mi jamal ta xcaltic ti jaꞌ tꞌujbil yuꞌun Dios ti chventainvan li Jesuse, schiꞌuc mi jchꞌunojtic ti ichaꞌcuxesat yuꞌun li Diose, jaꞌ chijcolutic o sbatel osil.

¹⁰ Mi jech jchꞌunojtique, muꞌyuc xa jmultic chijyilutic li Diose. Schiꞌuc mi jamal chcaltic ti jaꞌ xa sventainojutique, chijcolutic o sbatel osil.

¹¹ Yuꞌun jech tsꞌibabil ta scꞌop li Diose: “Scotol li buchꞌutic ta schꞌunic ti jaꞌ chcolic ta sventa li buchꞌu tꞌujbil cuꞌune, mu xlajic ta loꞌloel”, xi li Diose, xi tsꞌibabil.

¹² Muꞌyuc scꞌoplal mi jꞌisraelutic, mi maꞌuc jꞌisraelutic, yuꞌun jun noꞌox ajvalil cuꞌuntic jcotoltic, jaꞌ li Diose. Coꞌolcoꞌol chiscoltautic jcotoltic mi ta jcꞌan jcoleltique yuꞌun mu xlaj yoꞌon ta coltavanej.

¹³ Yuꞌun jech tsꞌibabil ta scꞌop li Diose: “Scotol li buchꞌutic ta scꞌan scolelic ta stojol li Cajvaltique jaꞌ ta xcolic o sbatel osil”, xi tsꞌibabil.

¹⁴ Pero ¿cꞌuxi xuꞌ tscꞌan scolelic mi muc bu schꞌunojic ti jaꞌ Yajcoltavanejic li Cajvaltique? Schiꞌuc ¿cꞌuxi xuꞌ nojtoc ta schꞌunic ti jaꞌ Jcoltavanej mi muc bu yaꞌiojbeic scꞌoplale? ¿Cꞌuxi xuꞌ chaꞌibeic scꞌoplal mi muc buchꞌu ta xꞌalbat yaꞌiique?

¹⁵ Li buchꞌutic chba yalique, ¿cꞌuxi xuꞌ yuꞌunic mi mu tacbilicuc batel yuꞌun li Diose? Yuꞌun jech tsꞌibabil ta scꞌop li Diose: “Lec ch‐aꞌibat scꞌopic li buchꞌutic chba yalic ti oy coltael ta sventa li Cajvaltique”, xi tsꞌibabil.

¹⁶ Pero li jchiꞌiltactique mu scotolicuc ta schꞌunic ti jaꞌ chijcol ta sventa li Cajvaltique. Jech chac cꞌu chaꞌal iyal li Isaías ta voꞌonee: “Cajval, muc buchꞌu tschꞌun lec la acꞌop li icalcutique”, xi.

¹ Quermanotac, ta sjunul coꞌnton ta jta ta cꞌoponel ti Dios yuꞌun ti jchiꞌiltaque, yuꞌun ta jcꞌan ti acꞌo colicuque.

² Ti jꞌisraeletique yacꞌojic persa ta yichꞌel ta mucꞌ ti Dios yilele. Pero mu xcoꞌolaj schiꞌuc ti cꞌusi oy ta yoꞌnton ti Diose.

³ Yuꞌun ti stuquique mu xaꞌiic smelol ti cꞌu sꞌelan ta spas ti Dios yoꞌ lec ta xil ti cristianoetique. Jaꞌ noꞌox ta saꞌ stuquic cꞌu sꞌelan yoꞌ jech lec ta xꞌilatic yuꞌun ti Diose. Jaꞌ mu xchꞌunic ti cꞌusi lec laj xa spas ti Diose.

⁴ Yuꞌun jaꞌ noꞌox ta sventa Cristo yoꞌ jech ta xichꞌ tael ti lec xijꞌilat yuꞌun ti Diose. Maꞌuc ta sventa smantal ti Moisese. Buchꞌuuc noꞌox ti ta xchꞌunic ti Cristoe ta staic ti lec xꞌilatic yuꞌun ti Diose.

⁵ Yan ti mi jaꞌ noꞌox ta jnoptic ti ta jtatic ti lec xijꞌilat yuꞌun ti Dios ta sventa ti mantale: “Ta scꞌan chꞌunel scotol ti mantale yoꞌ jech ta xicuxi”, xi laj stsꞌiba comel ti Moisese.

⁶ Ti mi ta jcꞌantic ti ta jtatic ti lec xijꞌilat yuꞌun ti Dios ta sventa ti ta jchꞌuntique, jech ta xacꞌ jnaꞌtic: “Mu xaval ta avoꞌnton un chaꞌe: Ta to scꞌan ta xibat ta vinajel yoꞌ chba jsaꞌ talel ti jcoltaele”, ti xachie. Ti jech ta xavale taje, ta xabaj ti talem xa ti Cristoe.

⁷ Jaꞌ jech xtoc: “Mu me xaval ta avoꞌnton: Ta to scꞌan ta xibat ta cꞌatimbac yoꞌ ta jsaꞌ talel ti jcoltaele”, ti xachie. Ti jech ta xavale, ta xabaj ti icham ichaꞌcuxi xa ti Cristoe.

⁸ ¿Cꞌusi ta xacꞌ jnaꞌtic ti jech ta xcalcutique? Ti lec xijꞌilat yuꞌun ti Dios ta sventa ti ta jchꞌuntic ti Jesucristoe, mu nomuc oy. Oy ta ave atiꞌ. Oy ta avoꞌnton. Jaꞌ ti lequil achꞌ cꞌop ti vuꞌun ta xcalcutique.

⁹ Yuꞌun ti mi ta xlocꞌ ta ave ti jaꞌ Avajval ti Jesuse, ti mi ta xachꞌunic ti ichaꞌcuxesat yuꞌun Dios ti Jesucristoe, ta xacolic.

¹⁰ Ta jtatic ti lec xijꞌilat yuꞌun ti Dios ta sventa ti ta jchꞌuntic ta sjunul coꞌntontique. Jaꞌ jech xtoc ta xlocꞌ ta quetic ti jaꞌ Cajvaltic ti Jesucristoe yoꞌ jech ta xijcol.

¹¹ Yuꞌun jech tsꞌibabil ta scꞌop Dios: “Scotol ti buchꞌu ta spat yoꞌnton ta stojole, mu xloꞌilaj ti yoꞌntonique”, xi.

¹² Manchuc mi jꞌisraeletic, mi jyanlumetic, mu yanuc ti Cajvaltique. Jaꞌ Ajvalil cuꞌuntic jcotoltic ti Cajvaltique. Jech o xal buchꞌuuc noꞌox ti ta scꞌanbe vocole, ep ta xꞌacꞌbatic ti cꞌusi ta scꞌanique.

¹³ Yuꞌun jech onoꞌox ta xal ti tsꞌibabil ta scꞌop Diose: “Scotol ti buchꞌutic ta scꞌanbeic vocol ti Cajvaltique, jaꞌ ta xcolic”, xi.

¹⁴ Pero ¿cꞌusi ta xutic ta scꞌanbeic vocol ti mi muꞌyuc to xchꞌunojic ti Cajvaltique? ¿Cꞌusi xut ta xchꞌunic ti mi muꞌyuc yaꞌbinojic scꞌoplal ti Cajvaltique? ¿Cꞌusi xut ta xaꞌibeic scꞌoplal ti Cajvaltique ti mi muꞌyuc buchꞌu ta xbat yale?

¹⁵ ¿Cꞌusi xut ta xalic ti lequil achꞌ cꞌope ti mi muꞌyuc buchꞌu ta xtacatic batele? Yuꞌun jech ta xal ti tsꞌibabil ta scꞌop Diose: “Toj yan noꞌox yutsil scotolic ti buchꞌutic ta xalic ti lequil achꞌ cꞌop ti jaꞌ ta xacꞌ jun coꞌntontique”, xi.

¹⁶ ¡Cꞌu stu un! Mu scotolicuc ta xichꞌic ta mucꞌ ti lequil achꞌ cꞌop ti jaꞌ colebale. Jaꞌ coꞌol sꞌelan jech chac cꞌu chaꞌal ta xal ti Isaíase: “Cajval, mu scꞌan xchꞌunic ti acꞌope”, xi.

¹ Quermanotac, ti oyuc c'uxi colicuc li jchi'iltac ta israelale, xcuxet no'ox co'nton. Scotol c'ac'al ta jc'opanbe Dios ta stojolic yu'un ta jc'an ti ac'o colicuque.

² Lec ti scotol yo'nton yich'ojic ta muc' Dios yalojique, pero altic. Yu'un li c'usi xch'unojique mu xco'laj xchi'uc li c'usi melel ta ch'unele.

³ Yu'un mu sc'an xa'yic ti c'u x'elan xu' mu'yuc jmultic chijyilutic Diose. Tscuyic ti ja' ta sventa c'usi tspas stuquic ti jech mu'yuc smul ch‑ilatic yu'un Diose. Ja' mu sc'an xch'unic ti yaloj Dios ti ja' ta sventa Cristo mu'yuc jmultic chijyilutique.

⁴ Yu'un li boch'otic ta xch'unic ti ja' Jcoltavanej yu'unic li Cristoe, mu'yuc smul ch‑ilatic yu'un Dios. Jech chvinaj ti mu xijcol yu'un li smantaltac Diose.

⁵ Li boch'otic tsnopic ti ta sventa mantal lec ch‑ilatic yu'un Diose, laj ono'ox sts'iba Moisés ta vo'one ti ja' to xu' mu'yuc smul ch‑ilatic me ta xch'unbeic scotol smantaltac Diose.

⁶ Yan vu'utic ti mu'yuc xa jmultic chijyilutic Dios ta sventa jch'unojtic ti ja' Jcoltavanej cu'untic li Cristoe, mu xa jechuc ta jnoptic: “¿Boch'o xu' chyal tal ta vinajel yu'un chiscoltautic? ¿Boch'o xu' ta xcha'cuxi yu'un chiscoltautic?” mu xa xijchi. Yu'un ay xa chamuc li' ta banamil li Cristoe, pero icha'cuxi. Ja' jech chal li c'op ta jcholcutique jech xu' chach'unic. Yu'un me jamal chcaltic ti ja' xa cac'oj jbatic ta sc'ob li Jesuse, xchi'uc me jch'unojtic ti icha'cuxesat yu'un Diose, jech chijcolutic sbatel osil.

¹⁰ Me jech jch'unojtique, mu'yuc xa jmultic chijyilutic li Diose. Xchi'uc me jamal chcaltic ti ja' xa sventainojutique, jech chijcolutic sbatel osil.

¹¹ Yu'un jech ts'ibabil ta sc'op Dios: “Scotol boch'otic ta xch'un ti ja' chcolic ta sventa li Boch'o t'ujbil cu'une, mu xlajic ta lo'lael”, xi li Diose, xi ts'ibabil.

¹² Mu'yuc sc'oplal me israelutic, o me muc israeluticuc. Yu'un jun no'ox ajvalil cu'untic jcotoltic, ja' li Diose. Co'ol chiscoltautic jcotoltic me ta jc'antic coltael ta stojole yu'un mu x'ech' yo'nton ta coltavanej.

¹³ Yu'un jech ts'ibabil ta sc'op Dios: “Scotol boch'o ta sc'anic coltael ta stojol Cajvaltique ja' chcolic sbatel osil”, xi ts'ibabil.

¹⁴ Pero ¿c'uxi xu' tsc'anic coltael ta stojol me mu'yuc xch'unojic ti ja' Jcoltavanej yu'unique? Xchi'uc ¿c'uxi xu' ta xch'unic ja' Jcoltavanej me mu'yuc ya'yojbeic sc'oplale? ¿C'uxi xu' cha'ibeic sc'oplal me mu'yuc boch'o ch‑albat ya'yique?

¹⁵ Li boch'otic chbat xcholbe ya'yique ¿c'uxi xu' yu'unic me mu tacbilicuc batel yu'un Diose? Yu'un jech ts'ibabil ta sc'op Dios: “Lec ch‑a'ibat sc'opic li boch'otic chbat xcholic li coltael ta sventa Cajvaltique”, xi ts'ibabil.

¹⁶ Pero li jchi'iltactique mu scotoluc ta xch'unic ti ja' chijcol ta sventa Cajvaltique. Jech chac c'u cha'al laj yal Isaías ta vo'onee: “Cajval, mu'yuc ep boch'o ta xch'un li ac'op la jcholbecutique”, xi.

¹ Voꞌotic ti jchiꞌil jbatic ta xchꞌunel li scꞌop Rioxe, jaꞌ ta jcꞌan ti chcuxiic ta sbatel osil li jchiꞌiltac ta israelale. Scotol cꞌacꞌal ta jcꞌoponbeic Riox yoꞌ ti xcuxiic o ta sbatel osil uque.

² Ti yalojique, sjunul yoꞌonic yichꞌojic ta mucꞌ ti Rioxe pero maꞌuc yech ta ichꞌel ta mucꞌ.

³ Yuꞌun mu scꞌan xaꞌiic ti cꞌusi chꞌabal o jmultic chiyilotic ti Rioxe. Ti yalojique, persa oy cꞌusi tspasic yoꞌ chꞌabal o smul ch-ileic yuꞌun ti Rioxe. Mu xchꞌunic ti yaloj ti Rioxe ti jaꞌ chꞌabal o jmultic chiyilotic mi chquichꞌtic ta mucꞌ ti Cristoe.

⁴ Ti muchꞌutic ta xchꞌunic ti jaꞌ istoj jmultic ti Cristoe, chꞌabal xa smul ch-ileic yuꞌun ti Rioxe. Jaꞌ chvinaj o ti maꞌuc chicuxiotic o ta sbatel osil li smantaltac Rioxe.

⁵ Ti muchꞌutic chalic ti chꞌabal o smul ch-ileic yuꞌun Riox li mantaletique, jaꞌto ti mi ixchꞌunic scotole chac cꞌu chaꞌal stsꞌibaoj comel ti Moisese, chꞌabal smul biꞌa.

⁶ Ti chꞌabal xa jmultic chiyilotic Riox li voꞌotique, jaꞌ ti jchꞌunojtic xa ti jaꞌ istoj jmultic ti Cristoe. Mu jnoptic chac liꞌi: “¿Muchꞌu ta xyal tal ta vinajel ti chtal stoj jmultique? ¿Muchꞌu ta xchaꞌcuxi ti chtal stoj jmultique?” mu xichiotic. Yuꞌun iꞌay xa chamuc ta scoj jmultic ti Cristoe, pero ichaꞌcuxi.

⁸ Li cꞌusi xa noꞌox tscꞌane, jaꞌ mi jchꞌunojtique, xchiꞌuc mi jamal chcaltic ti jchꞌunojtique. Jaꞌ yech smelol li cꞌusi chcalticotic aꞌyuque.

⁹ Mi jamal chcaltic ti jaꞌ cajvaltic ti Jesuse, mi jchꞌunojtic ti ichaꞌcuxesat yuꞌun ti Rioxe, chicuxiotic ta sbatel osil.

¹⁰ Lavi jchꞌunojtique, chꞌabal xa jmultic chiyilotic ti Rioxe. Jaꞌ noꞌox yech jamal chcaltic ti jaꞌ cajvaltic ti Jesuse, chicuxiotic o ta sbatel osil.

¹¹ Jaꞌ yech tsꞌibabil ta scꞌop Riox chac liꞌi: “Ti muchꞌutic chichꞌic ta mucꞌ li muchꞌu jtꞌujoje, mu xꞌaqꞌueic ta qꞌuexlal yuꞌun mu loꞌloeluc xchꞌunojic”, xi ti Rioxe, xi tsꞌibabil.

¹² Muc ta alel mi jurio, mi maꞌuc, jun noꞌox ti cajvaltique, jaꞌ ti Rioxe. Scotol ti muchꞌutic chcꞌoponone ti ch-ichꞌon ta muqꞌue, chacꞌ cuxlicuc ta sbatel osil.

¹³ Yuꞌun tsꞌibabil onox ta scꞌop Riox chac liꞌi: “Scotol ti muchꞌutic tscꞌoponic ti Cajvaltique ti chichꞌic ta muqꞌue, chcuxiic ta sbatel osil”, xi tsꞌibabil.

¹⁴ Pero ¿cꞌu ma xi tscꞌoponic mi mu xchꞌunic ti jaꞌ cajvaltic ti Jesuse? ¿Cꞌu ma xi ta xchꞌunic mi muc bu xaꞌiique? ¿Cꞌu ma xi chaꞌiic mi muc muchꞌu xꞌalbon yaꞌiique?

¹⁵ Jaꞌto onox mi oy muchꞌu itaque echꞌel ta yalel aꞌyuc yuꞌun ti Rioxe. Jaꞌ yech tsꞌibabil ta scꞌop Riox chac liꞌi: “Toj lec ti tal yalbelotic ti jaꞌ chacꞌ jcuxlejaltic ta sbatel osil ti Cajvaltique”, xi tsꞌibabil.

¹⁶ Pero mu scotoluc jchiꞌiltactic ta xchꞌunic ti jaꞌ chacꞌ jcuxlejaltic ta sbatel osil ti Cajvaltic Jesuse. Jaꞌ chac cꞌu chaꞌal iyal ti Isaías ti ta voꞌnee: “Cajval, mu epuc ti muchꞌu tscꞌan chchꞌun lacꞌop ti chcalticotic aꞌyuque”, xi.