1 Varavaragu e, taravatu mai dibamui taumui, na tore henimuimu. Asi dibamui taravatu ese taunimanima e lohiadiamu edia mauri dunadia iboudiai a?
2 Taravatu dainai hahine ta adavana enai baine tao ena mauri dinadia idoidiai; a adavana baine mase, ia na asi taravatuna.
3 Taunabunai, adavana maurina ai tau ta ma bema abia, ia na heuda-hanai hahinena; a adavana baine mase, ia na asi taravatuna, tau ta ma baine adavaia, una na dia heuda-hanai.
4 Unuhetomana, varavaragu e, umui danu Keriso tau-anina bagunai taravatu enai vada o mase; bena mase amo e tore isi tauna ese baine abimui, huahuada Dirava enai bae dobi helaoreana.
5 Badina be ita ese tau-anina ta badinaiava negana ai, kara dika ena laloani taravatu ena amo e varava bona tauda reḡedia lalodiai e vareaiva, bena huahuada mase enai e dobiva.
6 A harihari taravatu ese vada e kahuda nege, e dogoda taova ḡauna enai vada ta mase na heto; taunabunai harihari eda hesiai ilao-henina na lauma dainai, dia nega gunadia ai e tore herevadia daidiai.
7 Bena dahaka baitato? Taravatu na dika a? Lasi vaitani. Taravatu basinema hadibagu, lalogu basinema parara kara dika be dahaka. Bona taravatu basinema haduagu “Basio hekise-hekise”, lalogu na basinema parara hekise-hekise be dahaka.
8 A taravatu ena hahedua dainai dika ese hekisehekise idau-idau lalogu ai e havara; badina be taravatu bema lasi, dika bema mase.
9 Gunaguna lau na taravatu murimurinai na mauriva; a haheḡani egu ai e kau, bena kara dika e vara lou, a lau na na mase.
10 Taravatu na mauri ḡauna e tomamu, a lauegu ai ia na mase ḡauna ai ela;
11 badina be dika ese haheḡani amo e koigu bona e alagu mase.
