Roma 1:6-14

⁶Ela kon nol mia, se kota Roma. Mi maam deng bangsa mamo nol deng mana mamo. Yesus Kristus huil nal mi son nol tek noan, “Maam tia! Maa le daid Auk atulin!”

⁷Undeng na le, auk tunang surat ni bel mi se kota Roma, le tek nuting mi noan, Ama Lamtua Allah namnau mia. Un kon nodan le mi daid Un atulin, man in nuli ka niuꞌ. Auk kohe-kanas se Ama Lamtua Allah, kit Aman na, nol Yesus Kristus, kit Lamtuan na, le tulu Oen dalen banan na, halin mi nuil babanan, dame, nol titu-tema.

⁸Auk bok auk surat tia, nol in nodan mamo-mamo se Ama Lamtua Allah, undeng Yesus Kristus daek ne mi dalen nas. Auk kon nodan mamo, undeng totoang atuil in daad ne pamarenta Roma la in prenta ngas, dehet apa deng mi in parsai se Yesus sa.

⁹Auk kohe-kanas bel mi baktetebes hidi nutus taan lo. Ama Lamtua esa tana noan, asa man auk in aa ni, toma. Un kon tana noan, auk in dake ki inu nol in makoe, le tek atuli li deng Un Ana ka Dehet Banan na.

¹⁰Taom auk kohe-kanas sam, auk nodan elia: “Ama Lamtua, auk taan un lalan na elola ka lo. Mo eta bole lam, Ama Lamtua sai bel auk lalan, le halin auk laok meo auk tapang nguas se kota Roma.”

¹¹Auk kohe-kanas ela, lole auk kom isi in tia meo mia, le bating bel mi kuasa deng Ama Lamtua Koo la, halin nam mi daid Ama Lamtua atulin man in tahang nal muun dui pait.

¹²Auk in nangan na elia: eta auk daid in tia le daad nol mia kam, auk le tao kuat-tes mi dalen nas, le halin mi in parsai ka muun keko lako. Nol auk in koma ka le mi tao kuat-tes auk daleng ngi kon.

¹³Kaka-pail in namnau me! Auk in koma ka le mi tana noan, auk nangan le tia meo mi se Roma oe-oe son. Mo maa lius leol neot ni kon, daid lo bii nabale. Eta auk daid in tia kam, auk in koma ka le muik atuli mamo daid in parsai se Kristus, banansila el maan tenga luas kon. Nini ela, lam auk in dake ki haup isin banan.

¹⁴Taon elol kon no, auk in koma ki le, auk musti tek Ama Lamtua Dehet Dais Banan na bel atuli li totoang. Nas atuil in aa dais Yunani, atuil in aa nini dais didang, atuil tene tamlom atuil ana, atuil in hkola tamlom atuil in hkol lo. Undeng na, auk mana son le tia meo mi se kota Roma.